Lake Louise Ski Resort
落去食早餐等lift時，見到每層lift口都有個信箱，好奇怪，個信箱要嚟做咩？
落到地下大堂先發現，有個大嘅喺地下嗰層，
即係上面可以寄信，直落大堂，又幾得意喎！
酒店每一個地方都係咁靚，經過嘅每一個窗口望出去都係無敵靚景～
時間可以停住就好啦～
早餐餐廳～
好可愛嘅牛油～
早餐食物款式好多，質素都唔錯，係有一個中國女煎蛋員差Ｄ囉！
我呢個蛋白奄列，由我order到有得食起碼等咗廿分鐘，
而我前面係無其他人order的，你話個中國女煎蛋員幾咁勤力，
等食期間我有經過個煎蛋檔口，見到佢喺度睇手機！
返房途中，被呢個靚影吸引咗出去～
平時人山人海，呢刻好寧靜～
換好衫就坐車去滑雪啦，呢度有免費shuttle bus車我哋去雪場～
大概15分鐘就到雪場，每15分鐘一班車，好方面～
個場望落唔錯喎！
排咗一輪隊先上到纜車，張相見到嘅屋大部份係餐廳，
亦有租用具嘅地方同Ski school~
纜車直上到山頂
每個角度望出去都係一張畫咁～
呢度要搵位食lunch好艱難，我見有好多人就咁坐喺地下食，
喺日本Ｄ人食完就會讓個位俾其他人，從來未試過要等位食飯，
呢度唔係，食完都唔走，吹水嘅吹水，瞓覺嘅瞓覺，
我好辛苦先拉到兩個位，仲要係無咩好食，求其叫咗Ｄ嘢食填飽個肚就算！
本來打算嚟呢個場滑兩日，算把啦，聽日去行街好過啦！
D人嚟滑雪唔知點解要帶隻狗，我見佢齌企係度無人理...
呢個場最正嘅係Magic carpet，幾咁長，初學就真係開心囉～
唔滑雪，呢個都好好玩！
呢個場Ｄ初級雪道勁過日本Ｄ中級，有Ｄ真係俾佢嚇一跳～
上到另一面山頂可以見到Lake Louise同我哋住嗰間酒店～
呢度又係成個山任你滑，雖然有話你知邊個位置係咩級數，不過唔係好準囉～
我試過行行吓綠色突然見前面咁斜，要急停望吓先知係黑色雪道，
搵咗一輪先見到有條綠色係個好隱蔽嘅位置，要轉個彎先去到，
如果頭先我停唔切又或者無懷疑點解咁斜，就直衝落黑色架啦！
玩過幾次歐洲同加拿大場之後都係覺得日本最好，
以後唔洗嘥時間同錢嚟咁遠滑啦～
喺回程嘅chairlift又遇到一架車要被迫坐滿４個人，我都知Ｃ架啦，
我坐中間，毛爸坐最邊邊，另外兩隻鬼係ski人，到落lift時我唔夠佢哋快，
第一吓俾人頂住起唔到身，第二吓再起身時，隻腳已經離地，
再唔落就會返落山，千鈞一髮嗰吓我決定跳車，因為我唔跳，
而坐唔穩喺架chairlift度，分分鐘會蹗落山!
人生第一次滑雪跳竟然係落lift...好彩都安全落地～
睇我個樣就知對今日個場有幾咁不滿啦～
晚餐喺返酒店食，噚日已經訂好位，呢間係呢度好出名嘅餐廳喎～
都算係幾好食，但未到可以攞獎個級數囉～
甜品麻麻地～
銀餐具咁嘅色真係有點兒那過，打理唔到就唔好學人用銀啦～
好一般的咖啡～
我呢杯Swiss coffee好Ｄ～
食飽喺酒店裡面散吓步，順便行埋噚日未行嘅地方～
酒店裡面都有間便利店，如果想簡簡單單食份三文治，呢度都有幾多選擇～
辛苦咗一日，今晚早Ｄ瞓，明天去血拼啦！
The Fairmont Chateau Lake Louise
111 Lake Louise Drive, Lake Louise, Alberta, Canada, T0L 1E0
US & Canada Toll Free: 1(866) 540-4413
Local: (403) 522-3511
沒有留言:
張貼留言