非常繁忙嘅一日，廚櫃枱面，全屋嘅櫃同地台都會一次過嚟晒，因為裝修公司知道我哋趕住搬返屋企，而且每次送貨都要請假，特登幫我哋安排一日做多ｄ嘢，佢哋office嘅周小姐真係好好人！
10點幾，廚櫃枱面到先，枱面開嘅電磁爐安裝位錯咗，唔怕師父話即改，我驚改完之後會見到有問題，不過師父話唔會喎，好啦，咁就改啦，改完真係睇唔出改過！
12點傢俬到啦，兩架大貨車先裝得晒，搬到上嚟，成條走廊都放滿晒
屋入面就更加唔使講啦，行都無得行呀！
地台床－建設中～～～
廳嘅櫃做得好fit，裝好要等下星期師父嚟埋做收口先算完成～～～
房ｄ櫃就慘啦，頂櫃全部做高咗一吋，放唔到上去，要收返去工場改，唔知要改幾耐，希望下星期頭可以再返嚟啦！
全個廳放晒ｄ櫃喺度等人嚟收，行都無得行呀～～～
等等等...裝修完成後就一直等傢俬，今日終於等到廚櫃啦，整體都算幾好，有少少地方花咗，同埋吧枱向聽嗰面送多咗隻手揪，傢俬公司話會換返一隻無手揪嘅門俾我，枱面就要下個星期先有～～～
最近知道住喺泰國嘅大舅父已經病重入院，一直叫媽咪快D買機票去睇大舅父，但媽咪怕為大舅父家人帶來更多麻煩，一直唔敢起行。
舅父家住嘅地方比較偏遠，而且無公車，就算想坐Taxi都唔得，出入全靠私家車，如果媽咪去到，佢哋就要負責接送佢，媽咪知道佢哋已經為舅父嘅病疲於奔命，唔想再為佢哋增加麻煩，唯有晚晚打電話去問住舅父嘅病情。
11月12日晚上接到表妹電話，得知大舅父已經病重，而且正處於離留之際，本來已經打算幫媽咪訂15號嘅機票去泰國，即時要改，但又擔心媽咪知道後，身心唔知可唔可以支持度佢去泰國呢個旅程，於是當晚同阿哥夾定，話星期六日機票好full，未必揾到，星期五會好ｄ，嗰晚就叫佢執定嘢，而我自己都執定行李，希望第二朝可以買到下午機票，亦希望媽咪可以見到舅父最後一面！
11月13日朝早9點，打俾一位好朋友揾機票，經佢嘅努力，9點半confirm到２張下午３點飛曼谷嘅機票，心想太好啦，希望趕到啦！第一時間通知表妹叫佢準備接我哋機，但同時亦收到一個最壞嘅消息，舅父已經離世！
當時真係唔知點好，不過唔諗咁多，過到去先算啦，即時請假，阿哥車我返酒店攞行李，我同媽咪就趕去機場啦，見到阿哥非常擔心媽咪，無奈佢唔可以即時請到假，陪媽咪去泰國，放心啦阿哥，我會好好照顧媽咪～～～
一路上我都扮無事，去到機場check-in之後，盡量叫媽咪食多ｄ嘢，怕佢之後會無心情食，最終連自己都食到幾乎行唔郁。
下午５點終於到達泰國機場，表妹有事叫咗朋友同表哥嗰女營營嚟接我哋，車程中，我諗緊應該喺咩時間張事實講俾媽咪聽嘅時候，營營就幫我講咗呢句最難開口嘅說話，媽咪嘅反應比我預料中好。
放低行李就第一時間去舅父嘅靈堂，靈堂係設喺佛寺裡面，好寧靜，舅父生前已經講明喜歡簡單，所以今次嘅喪禮會喺５日內完成，頭３晚會有法師念經，第４晚就係潮州儀式，第５日火化。
11月14日及11月15日每日早午晚我哋都會送飯去靈堂俾舅父，夜晚就聽埋法師念經先返屋企，泰國人嘅喪禮好寧靜！
11月16日最忙嘅一日，早上６點搞到夜晚差唔多12點先返到屋企，好攰，但總算為舅父佢老人家盡咗少少力，希望佢放心走啦～～～
11月17日舅父火化嘅日子，我今年嘅假期實在燃燒得太勁啦，已經放突咗３日，所以呢幾日見媽咪心情OK，亦已經接受咗舅父走咗嘅事實，我就改咗機票，今日早機返香港，媽咪會留係曼谷直至舅父嘅身後事全部完晒先返。
舅父算有錢，泰國王子係佢嘅鄰居，但舅父係一個完全無架子嘅人，記得我同毛爸初初去泰國時，唔太熟路，佢老人家自己揸車去機場接我哋，又帶我地去唐人街ｄ鐵皮屋食牛腩麵，行街市。有次我哋去泰國喺佢屋企住，朝早我哋會陪佢晨運，佢又會帶我哋去行吓高爾夫球場，游吓水，真係估唔到佢可以咁樣對我哋ｄ細嘅。
今次舅父走得好輕鬆，所以大家嘅心情都算ok，希望舅父佢安息，我哋會永遠記住你，大家總會有再見嘅時候！
裝修嗰部份前兩日已經完工，不過我哋今日先得閒入去睇，比預期早咗成個幾星期交貨，而且好多嘢做出嚟嘅效果都比我哋預期嘅好，呢位龍哥真係唔話得，好多嘢都仲係佢催住我哋去做，小吉媽真係好介紹，唔該晒你呀小吉媽！
地板隻色好靚，成幅出嚟嘅效果比我見單一件時靚好多！
牆紙我哋揀咗隻好日本feel嘅款，效果出嚟唔錯呀！
襯埋日式燈，好有日本民宿feel 呢
而家裝修工程已經完成咗９成９，仲有少少嘢要裝咗傢俬先做得，所以龍哥就叫我哋去揾定ｄ廚房同浴室嘅掛架，等第日裝好傢時時就可以順便幫我哋裝埋～
其實之前都有用開ｄ廚房掛架，買時ｄ舖頭話係不銹鋼，但用幾年就生銹，所以今次想揾隻好ｄ嘅，睇咗好多都唔啱，最後係網上揾到呢個德國牌子Kessebohmer出嘅掛架，德國嘢一向品質都有保證，就決定用佢啦，不過好難揾呢，行晒成條砵蘭街搵到２間有得賣咋，揀佢嘅原因除咗因為佢ｄ料靚之外，好大原因係因為佢係磨沙銀色，我同毛爸都唔鍾意好反光嘅物體，呢隻磨沙銀色啱晒我哋心水！不過而家仲未決定到揀邊幾款掛架，好似隻隻都幾好咁
，可惜我廚房細，只可以揀４－５件！
頭痛中.......
