裝修進行中...

一頭煙，新屋裝修進行中，希望好快可以運作正常啦！等我呀！

搬屋啦!

我搬去呢度呀：

http://momo-wong.blogspot.hk/

得閒嚟坐啦！

遲來的嗜好

早兩個月開始學snowboard，其實好多年前已經想學，不過喺外國毛爸唔俾我學，佢驚如果受傷會好麻煩，所以一路都無得玩，最近知道香港有得學，拿拿聲去報名學啦！

哈哈...我d細膽鬼姿勢真係無得頂

毛爸就好好多啦



學咗幾堂之後，覺得好好玩，咁嚫而家淡季減緊價去買返套“架撐“先

毛毛：點解無我份？



Snowboard d 衫真係好靚，我同毛爸買咗呢兩套

一切準備就緒，點知就喺一次練習中撞傷隻手，有少少骨裂，要休息4－6個星期，希望快d好返啦，我驚咁耐唔練會唔記得晒之前學嗰d嘢呀！

新鮮無添加＂粒珠月餅＂

而家出面食咩都話有問題，係咪咩都唔洗食呢...

我咁為食當然無可能啦，好在有粒珠，我今年又有新鮮無添加嘅手工月餅食，好老實講月餅本來我淨係食美心，其他品牌都唔食，但係當我食過粒珠月餅之後，我發現而家有兩個品牌我可以選擇，但講新鮮，一定係粒珠贏，噚日出爐，今日就已經喺我個肚入面，哈哈....

今次粒珠仲攞咗罐法國鴨肝醬俾我試，聽講好好味，星期六買條法包慢慢嘆先！

Italian Wine Dinner

我同毛爸都係好少飲酒嘅人，第一次參加Wine Dinner，但志不在酒，因為今次係應大廚嘅邀請嚟試菜嘅！

每人有６隻酒杯，而且隻隻杯都做咗marking，好認真架！

第一杯係一隻汽酒，好好飲，又易入口，啱晒我哋呢ｄ少飲酒嘅人！

其實幾隻酒都幾好飲，不過我就唔係好識分邊隻打邊隻，但都全部飲晒！

毛爸就全部留返嚟養魚～～～

巨牛配紅酒，兩樣都"正"！

甜品係我嘅至愛”Golden Tiramisu”

最後兩個好少飲酒嘅人都買咗支汽酒返屋企再慢慢嘆！

 

Lock & Lock

我好多時都喺一田會買羊髀俾毛毛食，一田會提供切件服務，但當你返到屋企唔將ｄ凍肉一件件用保鮮紙分開包開，下次你喺雪櫃度再攞出嚟嘅時侯，佢就會變返一隻完整嘅羊髀，除咗等佢溶咗雪，如果唔係你唔好諗住可以攞一塊出嚟蒸！

有時包好鮮紙都包成半個鍾，又唔環保，又煩～～～

最近行街時見到喱個盒，一層層，又薄薄地，佢個標籤話係放喺冰箱放凍肉用，wow 啱晒，咁又解決咗我一個疑難啦！

放一隻羊髀啱啱好，唔使3分鐘攬掂！

叠起放係冰箱又慳位！

Panasonic Lumix DMC-GF1 到手啦！

等咗成個月，心儀嘅女朋友１號終於到手啦，粉紅色好靚呀，不過對於我喱個淨係識用傻瓜機嘅傻人嚟講就需要ｄ時間去學習學習！

今日好在有一班好朋友陪我去試機，佢哋都係玩開大機，好多我唔知嘅嘢佢哋都幫我問晒，真係唔該晒，我唔識用會打俾你哋架啦～～～

而家部機叉緊電，等我練習吓再影ｄ相上嚟俾你哋睇啦!

 個個角度睇都係咁靚～～～

仲跟埋個原裝機袋，珍珠色，無得頂！

最後當然要多謝毛爸啦，今年喱份生日禮物我好鍾意呀！

Nespresso 咖啡機 - 你愛咖啡嗎？

近排唔知咩事，對於敗家嘅玩具樣樣都想要，早排同毛爸行街時，唔覺意見到佢，停喺度睇咗兩眼，個sales姐姐第一時間沖咗杯俾我試吓啱唔啱飲～

噢！好好味呢～

個sales姐姐仲話俾我聽好方便用，又易洗，每一杯都係＄５，仲要有十幾隻咖啡味可以揀，喺屋企都可以飲到Starbucks質素嘅咖啡！馬鞍山無Starbucks， 每次毒癮發都要出新城市廣場先有得飲，有咗佢我咪喺屋企都有得飲囉！中晒我想要嘅嘢，好想要呀，呢ｄ嘢梗係各毛爸埋手啦～～～

最後佢成為咗我嘅情人節禮物，嘻嘻......多謝毛爸！

一返去就試飲啦，好正呀！右手邊個黑色杯係要嚟打奶泡架，仲要可以打凍同熱嘅奶泡都得，沖凍飲同熱飲都咁方便架～

呢ｄ就係我沖咖啡三寶啦！

一杯美味咖啡，唔使一分鐘就誕生啦～～～

Dyson DC26

屋企用開部吸塵機已經用咗差唔多６年，吸力開始減弱，一直想揾架吸力好，易清理同size細嘅機，最好有埋蒸汽就最好，不過揾咗好耐都未啱心水～～～

前排毛毛病喺屋企陪佢嘅時候，唔出得街，唯有成日係個internet度游，有一日俾我喺一間日本酒店嘅網頁度揾到以下呢部吸塵機，間酒店係狗狗都可以入住嘅，所以酒店好標榜房間清潔，佢哋講明係用呢隻牌子機做房間清潔嘅，日本人要求高大家都知架啦，如果佢標榜得一樣嘢一定有返咁上下嘅～～～

好，於是周圍揾，發現香港都有得賣，今日喺一田搬咗部返屋企，初部試機，吸力好勁，機身好輕，個吸塵頭又夠滑，好慳力，正機一部，啱晒攞嚟對付我隻甩毛豬！　　　　　

等我介紹吓呢部DC26嘅特點啦，Dyson氣旋以高速旋轉空氣， 高速的離心力將灰塵及垃圾甩出氣流外， 並將垃圾蒐集在集塵筒中，而非卡在集塵袋或是濾網上。而且機身夠細，輕巧嘅機身可放入A4紙盒，夠晒慳位！　　　　　　　　　　　　　　　　　　　　

佢嘅功能唔詳細講啦，有興趣嘅朋友可以去以下嘅網頁睇吓：http://www.dyson.tw/store/product.asp?product=DC26-THCOMPLETE

安裝好容易，三兩下手勢就搞掂！

佢個樣真係好靚呀！

DC26嘅用法介紹：

唯一美中不足嘅就係無蒸汽囉～～～