旭川 → 夕張
今日無安排行程，諗住開車去夕張，見到邊度靚就停車去睇，所以今日會好輕鬆，日式早餐加北海道牛奶，我最鍾意嘅早餐選擇！
食咗一份好滿足嘅早餐之後，就去攞車向夕張出發啦！
我哋泊車嘅停車場係自動泊車嘅，抽條鑰匙落去，"禁"幾吓，架車就會自動送落嚟，唔使自己揸，好正呀，我屋企個停車場係咁就好啦！
我哋行行吓見有個路口有好多車轉出嚟，咁我哋又跟住轉入去睇吓，嘩！原來係Ken&Mary Pension (0166-92-4194)，其實我哋都有諗過住呢間，不過佢係食西餐，所以我哋放棄咗，原來呢度咁靚架喎，早知住呢度啦！
如果要入去Ken&Mary Pension嘅平台影相係要俾100Yen入場費嘅，不過如果你係佢嘅Cafe食ｄ嘢，或者係佢間shop買嘢就可以免費入場，我梗係揀shopping啦！
入到去最開心係毛爸，見到ｄ古董車不知幾雀躍，猛叫我幫佢影相！
佢哋呢個花園平台真係好靚，最好就係一個人都無，我哋又包場啦！
喺Ken&Mary Pension可以望到北西の丘展望公園，當然順便去行個圈啦！今日陰天，涼咗好多，我諗得16/17度，帶咗嚟幾日都無著過嘅褸終於可以出場啦！
北西の丘展望公園 (Tel 0166-92-4445)
影吓影吓已經12點幾開飯啦！午餐去咗超市買魚生同壽司食，唔錯呀！
行行吓又見到一間好大嘅超市物體，叫做Bestom (Tel 0167- 39-3000)，嘩！有嘢買，即刻叫毛爸駛入去，有無好嘢發現呢？
呢間嘢好大，咩都有得賣，由裝修整屋到柴米油鹽都有，最重要係有個超大型賣寵物用品嘅部分吖麻，真係慢慢睇幾個鐘都睇唔晒呀！喺香港買唔到日本製造嘅罐頭俾毛毛食，呢度大把，結果當然係．．．．掃掃掃掃掃貸啦！
柴犬專用狗糧，日本國寶食得嘅一定係正嘢，唔抵之下，買咗兩包返嚟俾毛毛試！
搞吓搞吓，已經３點幾啦，要去夕張啦！
喺路途上有好多指示牌，叫司機小心有狐狸過路，我哋個幾鐘頭嘅車程已經遇到兩隻狐狸，好在停到車，如果唔係.........................
又可以停一停啦，見到有停車場就應該有嘢睇，落車睇吓原來係"三段滝"！
三段滝公園 (北海道芦別市) (01242-2-2111)
睇完，繼續上路啦，呢條係桂澤大橋～～～
5點幾已經到咗酒店，今次揀呢間酒店係因為佢有夕張蜜瓜任食，因為毛爸好好好鍾意食蜜瓜，不過因為今日客人太少，無開自助餐，改咗任叫，仲正，唔使出去攞，而且即叫即整，味味都整得好好味架！
食晒上面咁多碟，本來已經好飽，甜品都唔想食啦，不過諗住試吓味啦，點知一試唔得掂，又全部掃晒，真係好好味呢！呢度ｄ甜品係自家製架，唔怪之得咁正啦！
最精彩嘅夕張蜜瓜出場啦，因為太飽，我同毛爸夾埋都係食咗一個咋，前段放得太盡添！
今次我哋間房係包兩餐嘅，如果唔包食，散叫半個蜜瓜要成1,260円架！
你睇吓毛爸個樣就知佢幾滿意呢餐啦！
間房都好大好舒服！
食飽要休息一陣先可以去浸溫泉，無聊時間，攞毛毛ｄ手信出嚟影吓先！
酒店個溫泉好大，好乾淨，今晚成間酒店得５枱客，好少人，所以今晚我哋又係包池浸呀！
Hotel Mount Racey
http://yubari-resort.com/mtracey/
大人＠ 12,750 円 x 2 名 = 25,500 円
