Tomamu→占冠村→夕張 →札幌新千歲機場→香港
就係因為呢張相我就嚟咗Tomamu啦，第一眼睇到以為係瀑布，睇真ｄ原來係雲海，真係唔敢相信嗰ｄ係雲，真係好似前兩年我去阿根廷睇嗰個尹瓜蘇瀑布，而且個看台今年只係開會3個幾月(19/6-11/10)，啱啱好夾到我地去日本嘅時間，咁就go go go啦！
唔係日日都可以睇到雲海，要好天與唔好天之間，落雨就一定無得睇，太好天又無雲，所以睇唔睇到真係好講運氣，噚日落雨所以係睇唔到架～～～
今朝一早起身開電視睇，酒店話”雲海發生中”喎，咁就拿拿臨洗面出發啦，早餐都無食呀，因為纜車開5:30，遲咗去就有排先上到車架啦！
朝早5點幾喺房望出去，好大霧，幾乎連對面兩座數都睇唔到～～～
到我哋梳洗完出門口已經睇得清楚ｄ啦～～～
Go go go 去雲海露天平台睇雲海啦～～～
嘩！周圍都好大霧.....唔知山上咩情況呢??
就嚟到我哋上車啦，好興奮呀！
要上山頂，首先要穿過一層厚厚嘅雲先！
過咗ｄ雲，發現好好天呀！
仲睇到日出添呀！
望返轉頭重見到我哋全間酒店（最左手邊嗰幢呀）～～～
今日太好天，ｄ雲唔夠多，所以睇唔到張相咁嘅效果，有ｄ失望架，不過就好過噚日咩都睇唔到囉，睇唔睇到真係要講緣份呀.........
見唔見我喺度呀！
到我哋走時仲少雲，真係散得7788啦！
坐纜車嗰張飛其實係一張post card，你寫好咗，唔洗貼郵票，放落呢個郵筒度就可以寄返屋企架啦，我呢張係寄俾毛毛架！
７點幾就返落山啦，又要穿過舊雲～～～
落到山，好好天呀！
仲見到有鹿仔喺度搵食～～～
散場lu，返酒店食埋早餐就向夕張出發啦～～～
返到酒店，ｄ雲霧散咗好多，對面兩座酒店都睇得好清楚啦！
Tomamu Alpha Resort→夕張(Tel 0123-52-2211)***(112.8KM 3時27分 IC-27.2KM) 一般道路 95.6KM 3時20分
離開Tomamu，經過占冠，再去夕張，山長水遠去夕張係因為毛爸超愛夕張蜜瓜，不過今次好失望呀，經過幾間賣蜜瓜店舖都無得賣，仲貼埋張通告話無夕張蜜瓜賣啦，真係激C人！
淨係得返ｄ富良野蜜瓜，仲貴過我哋噚日買ｄ好多呀，梗係啦喺夕張買富良野蜜瓜，唔貴就假啦，好彩噚日買咗盒咋！
最後都係夕張買咗盒富良野蜜瓜，講出嚟真係會俾人笑囉～～～
夕張→新千歲機場 (Tel : 0123-23-0100)***(60.7KM 1時34分 IC-30.2KM) 一般道路 56.7KM 1時34分
買完要起程去機場啦，當我哋就嚟到機場嘅時候，唔覺意經過一個賣新鮮蔬果嘅市場，有好多又平又靚嘅生果賣，我哋梗係唔放過，又去掃貨啦！
呢隻桃同我個女一樣名喎***黃毛毛***
最後買咗一盒日本水蜜桃，真係靚到呢.....
入埋油就要去還車啦，毛毛我哋返嚟啦！
CX 581 SAPPORO CHITOSE - HK (18:40-20:50)
今次班機飛得好快，早咗成個頭到，仲有毛舅父嚟接我哋機，所以今晚就可以接返毛毛啦，唔見咗７日，個傻妹仔有無肥到呢？
但係毛毛最關心唔係爸爸媽媽，而係佢ｄ手信喎，呢個肥妹吖.......
毛毛：媽咪點解有貓貓食嘅雞雞嘅？我係狗狗嚟架！
其實ｄ雞雞係買俾歡歡同毛毛下個月去日本旅行時食架，歡歡同毛毛每日都要食一條蒸雞架，香港揾買唔到包裝好made in Japan嘅蒸雞雞，全部都係made in China，祖國嘅出品，我係絕對唔會俾毛毛食，俾人食嘅嘢，佢哋都可以加咁多嘢落去，俾狗食嘅更難想像......所以今次好辛苦揾到made in Japan嘅蒸雞，就算係俾貓貓食都照買囉～～～
毛毛最大興趣唔係零食，佢係最鍾意新玩具呀！你哋睇吓佢又有目標啦...
毛毛有樣嘢都幾乖架，所有嘢如果唔係我哋俾佢，擺係度佢係唔會自己攞，最多都係睇吓同聞吓架咋～～～
富良野粟米有兩種，一種可以生食，一種唔可以生食，而可以生食嘅係貴ｄ架，唔好搞錯呀！
咁真係好好味，又好抵吖麻！ 
