Hi，各位朋友仔，唔好意思咁遲先同你哋拜年，我個傻媽咪去完旅行返嚟就無停過，佢話要一日之內拜好晒ｄ年貨喎，噚日見佢一袋袋咁買返嚟，都唔知買咗幾多袋，今日就同我去咗爺爺嫲嫲同婆婆度拜年，到夜晚終於得閒同我update吓嗰blog啦！
其實年２９嗰日我已經返咗屋企啦，我等咗Daddy同媽咪足足32日，終於等到啦，掛到我吖！本來Daddy同媽咪話夜晚７點先落機，起碼要１０點先可以去嫲嫲度接我，點知夜晚７點已經見到Daddy同媽咪啦，原來佢哋早咗一班機返嚟，嘩！開心到我都唔知點算好，淨係識得錫，錫完媽咪，錫Daddy，錫完Daddy又再錫媽咪，總知錫唔停啦！下次唔好去咁耐啦，掛屎我啦！
一返到屋企就有件新玩具等緊我喎，好開心呀，又見到Daddy同媽咪，又有新玩具！
玩到攰就痴住Daddy同媽咪瞓覺覺，仲有我唔見咗好耐嘅玩具，你哋唔好再無端端失蹤啦，咁會掛屎我架！
南美之旅第30-32天 (22-24/1/2009 星期四-六)
復活節島(Easter Island) →聖地牙哥(智利)→紐約→香港
Date Itinerary Flight time Hour Min 22/01/2009 Thu Easter Island --> Santiago 1145 – 1825 (LA834) 4 40 Santiago --> New York (JFK) 2245 – 0735(23/01/2009) (LA532) 10 50 23/01/2009 Fri New York(JFK) --> Hong Kong 0915 – 1425 (24/01/2009) (CX841) 16 10
漫長嘅回家機程，見到都怕怕！
食咗埋呢個早餐就要準備出發去機場，離開呢度啦，真係好唔捨得，本來係諗住陪Daddy嚟睇moai，估唔到自己都咁鐘意，有機會我會再嚟架！
嚟嗰陣只係俾你帶20kg行李，走時就可以帶40kg，復活節島真係一個鼓勵消費嘅地方！ 
菲律賓版蘇絲黃，喺嚟嗰日喺智利機場認識，以為會喺呢個小小嘅島上再遇上，但竟然要到走時先喺機場再見！蘇絲黃係菲律賓人，住喺紐約，佢個樣好似中國人，好好傾，跟住佢會坐郵輪繼續佢嘅旅程，而我哋就要起程回家啦，已經有30日無見過小毛毛啦，好掛住佢呀！
31個鐘頭飛機，你準備好未呀？
好唔捨得走，喺飛機度都不停咁影相，留返多ｄ回憶先～～～
呢兩張係智利嘅上空！
４小時４０分嘅機程捱完，攞完行李要再去check-in，雖然有４小時轉機時間，但搞嚟搞去都無幾多時間去"hea"，話咁快又上機啦！
再嚟11小時飛機，第一次覺得南美ｄ飛機餐好食，我同Daddy都食晒！
我哋喺紐約落機時，啱啱日出，好靚，Daddy即刻話唔好成日話佢唔陪我睇日出，而家陪啦，激死！
７點幾落咗機，下午１點先再上機，諗住去完就揾間Lounge休息吓啦，８點鍾去到國泰check-in ，一去到就聽到ｄ好親切嘅聲音，廣東話呀，個職員哥哥問我哋幾點機，我哋話下午１點，佢話９點有機走唔走，我個心就係度諗，我啱啱係個地獄度跳出嚟咋，即刻跳返入去，唔好啦掛，鬆一鬆先好喎，咁就問吓佢架機會唔會好full，如果唔full都OK嘅，佢笑一笑話，俾個好位你哋啦，咁我哋以為佢一人俾一行位我哋瞓啦，因為搞好晒ｄ嘢已經８點３，登機證都無睇就雞咁腳入閘，去到閘口ｄ人已經上緊機，咁我哋就攞張登機證出嚟睇吓坐邊行啦，吓！商務客位?咁益我哋？
商務客位真係商務客位，嘢又好食，服務又好，仲可以有張六呎床瞓，正！本來最擔心嘅一程機，而家話咁快就過咗啦，Daddy一瞓就５個鐘，起身睇吓戲，食吓雲吞麵，雪糕都未有時間食吖，16小時就咁過完啦！都未試過坐長途唔想落機嘅，呢一程機為我哋嘅32天南美之旅劃上一個極其完美的句號！
南美之旅第29天 (21-1-2009 星期三)
復活節島(Easter Island) - Day 4
West Coast Tour : From 10:00 to 15:30 hrs.
Ana Kai Tangata--Painted cave ...
Rano Kau--The largest crater on the island
Orongo--Birdman village
Vinapu--Unique ("Inca-style??") Ahu
Puna a Pau--Topknot Quarry
Ahu Akivi--Seven Statues, represent the 7 navigators
Te Pahu--Large garden cave
我哋每日都會喺呢個咁靚嘅小客廳食早餐，Edith除咗會每日幫我哋預備唔同嘅早餐之外，仲會特別為我哋調配一杯新鮮果汁，所有生果都係喺佢哋個花園新鮮摘落嚟，每杯都好特別，好好飲！ 
今日第一站會去AnaKai Tangata Cave，呢個洞穴雖然經過咗咁多年嘅海浪洗禮，但仍然可以好清晰睇到Rapa Nui 族人畫嘅畫，不過今日出師不利，一落車就跌壞咗部相機，影ｄ相出嚟唔見咗一半！
好奇怪，我架傻瓜機，無端端會好返，又影得返喎！哈哈．．．
今日我哋有4位美國團友~~~
呢個島除咗moai好睇之外，其實風景都好靚，環境亦都好寧靜！
Rano Kau係島上最大嘅火山口，而家已經變成咗一個火山湖，好靚，從來無諗過火山口可以靚成咁！我哋個導遊Helen話佢哋細個時成日爬落去個火山口度玩，但係而家已經唔准啦！
島上每一個地方風景都咁靚，復活節島絕對是一生人必到一次嘅地方，雖然旅費好貴，但當你踏足島上，你就會覺得係值得嘅！
Orongo--Birdman village
鳥人村係喺Rapa Nui國家公園裡面，所以首先要俾10蚊美金入場費先可以參觀到呢個鳥人村。以前島上住咗唔同嘅部族，每年佢哋嘅族長都會派精英游水去相中又尖又高嘅Kao Kao島，再爬上峭壁度攞嗰一年第一隻生出嚟嘅鳥蛋，第一個可以完整咁攞到隻鳥蛋返嚟嘅代表，佢所代表嘅族長未來一年就會成為島上嘅領袖，呢個比賽其實好危險，浪好大，風好大，而且海入面仲有鯊魚，所以唔係個個人都會有命返嚟架！好在而家已經無咗呢ｄ咁危險比賽啫！
呢ｄ用石頭搭建成嘅屋就係以前ｄ鳥人住，因為怕有敵人偷襲，所以呢ｄ屋嘅門口都係好細，每次只可以供一個人出入！
喺呢個觀景台望出去，係一望無際嘅超藍海洋同天空，真係靚到無人有，就係我寫緊呢段文字嘅時侯，Daddy問我有機會會唔會再去多一次，我諗都唔諗答佢會，咁你話呢個島有幾吸引啦！
喺我哋離開前，導遊帶我哋去咗一個乜都無嘅草地睇moai，個個團友都好奇怪，睇咩呀？原來個moai而家喺大英博物館，即係又俾英國佬偷咗囉！呢個moai要留返下次去英國先睇到啦！
好藍，好藍，好藍嘅海水！
呢個Ahu係島上比較特別嘅一個，佢係似印加族嘅Ahu，其實我唔知印加族嘅Ahu有咩特別，但呢個Ahu嘅手工就特別精細啦！
以前咩重型工具都無,點可能有咁精細嘅切割面呢,真係頭髮都插唔入呀!
呢個係一個女moai，基本上moai係代表管治者，所以全部都係男人，因為呢位族長非常愛佢嘅另一半,所以都特別為太太做咗呢個女moai!
再去睇一個以前Rapa Nui人戰爭時逃避戰火住嘅地方!
呢個就係入口啦,係咪唔覺呢!
一棵樹幹嘅化石! 
喺下面望上去個入口,真係幾隱蔽架!
呢個喺我哋好期待要去睇嘅一個Ahu，一共有７個moai，島上嘅moai全部都係面向陸地，因為d moai係代表佢哋族長，向住陸地就係為咗看護住佢嘅子民，但係呢７個就全部面向海！
呢７個moai係代表探索者，佢哋係第一批嚟到呢個島嘅人，呢７位航海家為咗佢哋嘅族人，不怕危險，飄洋過海咁去搵地方俾佢哋嘅族人落腳，佢哋到咗之後就接埋佢哋嘅同胞嚟呢個島住，後來族長就起咗呢７個moai嚟記念佢哋啦！
Puna Pau係一個做Topknot(moai頭上個髮髻）嘅工場，因為呢度嘅石係紅色，所以被選中！喺呢度完成咗嘅Topknot會運到海邊，裝到moai嘅頭上，但呢個運送過程就真係好漫長！
我哋今日嘅導遊係Helen，佢係我哋前兩日個導遊Ian嘅媽媽，就係因為佢哋兩個都係Rapa Nui人，所以我哋聽咗好多關於佢哋祖先嘅故事，跟細嘅團就有ｄ咁嘅好處，可以慢慢聽Helen同Ian嘅講解，你願意聽，佢哋會好樂意講，你問，佢哋亦會樂意解答！今次我哋聽咗好多關於Rapa Nui嘅故事！
Topknot係用以下兩種方法放上moai個頭上架！
Topknot中間都會有個"隆"，穿支棍就可以轆佢去ｄmoai度！
呢度除咗睇Topknot之外，風景都好靚架，一ｄ都無經過人工修飾，就係鐘意呢度嘅原始美！ 
今日又行到３點先返酒店食飯，真係好攰呀，又係喺酒店旁邊嘅餐廳度食，自從嚟到南美，對食嘢已經無咗要求，求其食ｄ啦！
今日晚餐食埋最後一罐鮮炸鯪魚同兩包麵，仲加咗兩棵生菜添，之後再嚟半個大西瓜，好豐富嘅一餐!
Hotel : Tauraa Hotel
Address : Hanga Roa - Easter Island - Chile
Telephone : 56-32-2100463
Fax : 56-32-2551310
Price/night : $86,625 pesos chilenos = HK$1,070.00
URL : www.tauraahotel.cl
e-mail : tauraa@entelchile.net
