噚晚毛爸去咗公司嘅annual dinner，我同毛毛就喺屋企等毛爸返，９點時毛毛已經瞓咗，但係９點幾佢就好似發噩夢，突然間彈起，但又即時瞓返，過咗無一分鐘佢就用兩隻手仔抓對眼，好似好痕咁，見到已經嚇呆咗，即時阻止，但都已經抓咗兩吓啦！當時即刻幫佢睇吓，無紅，無腫，手術個傷口都無事，咁以為無事啦！
瞓覺前照平時咁幫佢洗眼仔，一切正常！
到夜晚兩點到，毛毛開始唔瞓覺，周圍行，抱佢又唔鍾意，行嚟行去，好似唔知自己想點咁，抱佢有時都瞓到一陣，就係咁樣瞓吓醒吓到４點，毛爸覺得有Ｄ唔妥，就開燈睇吓，做手術隻眼仔紅晒，又張唔開！都知道出事，但無辦法，都要等到朝早先有醫生睇........
今日本來我要返工，好在搵到老友小鄉菇肯幫我返，如果唔係都唔知點算，個女咁，毛爸一個人實搞唔掂，十萬個唔該呀小鄉菇，唔好意思搞到你無咗個假期.......
１０點打去診所book，毛毛睇開個醫生要２點先返，我哋最快都係book到２點９，已經係"lur"返嚟架啦，唔理咁多，我哋１點１０就到診所等，如果有人遲到，我哋就可以即刻補上，可以睇早幾多得幾多啦.......
今日算不幸中之大幸，２點睇嗰個遲到，我哋２點就有得睇啦，經醫生診斷後，手術嘅傷口無事，不過就抓傷咗角膜，要食藥同查眼膏，角膜損咗會好痛，醫生即時幫毛毛打咗支止痛針，今日毛毛個樣仲辛苦過嗰日做完手術，好慘呀！
毛毛呢幾個月都唔知做咩成日病，希望新一年毛毛健健康康，唔使再受咁多苦！
打咗止痛針，查咗眼膏，食埋藥，成晚無瞓嘅毛毛已經攰到呢......
聽日開始我返工嘅時間毛毛會喺嫲嫲屋企，我一放工就會去嫲嫲度，等毛爸放工就嚟接返我哋，夜晚我哋會自己照顧毛毛，等嫲嫲可以休息吓，呢個小朋友又要人哋２４小時監察同戴返個大蛇餅啦！
本來下個星期我同毛爸嘅曼谷之旅亦都要即時改期，不過唔知改唔改到，聽朝先知，算啦，改唔到都唔去啦，去咗都唔會安落，日日都心掛掛，唔去就算啦，遲ｄ先返去還神，我諗四哥都唔會嬲我嘅.......
本來可以鬆一鬆，而家噩夢又開始，又要重新作戰，但我深信呢個小魔怪一定會好快好返嘅！
，可以自由瞓囉，不過阿媽就慘ｄ，唔可以蓋眼瞓，要全程監察住，R到隻眼仔就大獲架啦！
....
