2008年12月31日 星期三

南美之旅第8天 (31-12-2008)

南美之旅第8天 (31-12-2008 星期三)


加拉法第(El Calafate)→布宜諾斯艾利斯(阿根廷)




















Date ItineraryFlight time
   HourMin
31/12/2008WedEl Calafate (FTE)  Buenos Aires (Jorge Newbery AEP) 1021 – 1417 (AR1803)256


今日早機,食飽早餐就要告別呢間咁正嘅酒店啦!架車8:30嚟接我哋,唔使半個鐘就到機場啦,呢個機場好細,一眼睇晒!


今日我哋好黑仔,首先check-in時佢哋話我哋件手提行李超重要我哋寄艙,寄艙本來都無問題,不過我無鎖喎,咁唯有嘥六十幾蚊去幫件行李打包啦!


到入閘過X-ray時俾人發現我哋帶咗把瑞士軍刀(把刀陪咗毛爸16年架啦),毛爸好唔捨得咁放低咗佢喺Calafate機場,好在我哋帶咗兩把,如果唔係,餘下嘅旅程都無刀仔用架啦,同一時間仲跌爛咗個Aigle水樽,激到毛爸屎,水樽對我哋嘅旅程好重要架麻,而家要兩個人用一個水樽,唔係幾夠囉,希望遲d遇到啱心水買返一個啦,毛爸嬲到一返到酒店就寫emailAigle投訴佢哋d產品質地差,成日話自己d嘢點好點好,點知係唔夠一米高嘅枱面跌落地都爛得!


還好就係架機都叫準時起飛,不過又嚟個超級難食嘅飛機餐,d飯,唔係,係d米完全未煮過,再攞去急凍就攞嚟俾你食!


第一次喺個機蘿柚落機!


呢度d人都好興帶狗去旅行,程程機都有狗狗同行架,而且佢哋會放喺行李帶度轉轉吓,主人見到就拎返佢哋落地,同日本有d唔同架!


返到酒店已經三點幾,呢間酒店麻麻地,睇個樣都ok,不過用落d嘢全部都唔就手,仲要好多嘢係爛嘅,如果唔係book唔到先前住嗰間Carlton都唔會揀佢!


個厠所先舊得神奇呀,再加一個閂唔到嘅圓窗,再凍d沖涼一定凍屎!


今日係大除夕,諗住同毛爸去食餐好架啦,黃昏5點鐘我哋就出動啦,不過喺部電梯度睇到一張通告,話酒店餐廳同room service今晚8點就會停止服務,我哋開始覺得有d唔妥,走去問大堂經理,出面d餐廳開唔開架,佢拍晒心口話開,好啦,咁我哋就坐taxi去d網友介紹嘅牛扒店,諗住食返餐阿根廷燒牛扒嚟近接2009啦,沿途見到d舖頭係全部閂晒門嘅,架taxi越行我哋就越驚,因為真係全部閂晒門,終於到咗我哋要去嘅餐廳,老細啱啱喺度落緊閘,有兩隻鬼仲喺門口度唔肯走添,咁我哋車都唔落啦,直去我哋第二個選擇,去到着晒燈,好似開門喎,好,我哋就落車睇吓啦,好失望,原來又係閂緊門,周圍舖頭都已經閂晒啦,諗住Burger King都剎啦,點知都閂埋,想截taxi,架架都唔載客,咁點算,係唔係要行路返酒店吖,跟住仲要落埋雨,使唔使黑成咁呀!


咩都唔諗啦,淨係想拿拿聲返酒店餐廳求其食d嘢啦,幾經艱苦先截到架taxi,不過個司機好奇怪,著住件爛鬼T恤,再加條格仔起毛頭短褲同拖鞋,仲有個超級蓬鬆頭,直頭係全套睡衣look,上車仲唔記得落錶,到我哋落車時佢先醒起,佢係完全唔清醒之下車我哋返嚟酒店,不過算啦返到嚟都唔錯啦!


我哋6點返酒店餐廳,求其點咗d嘢食,諗住呢間酒店都唔會有咩好嘢食架啦,我哋入去餐廳時仲俾個waiter發我哋脾氣添,不過算啦,都明白嘅,佢哋等放工去威吖麻,我都最唔鍾意人哋阻住我收工!咁我哋都好識做,大概6點8就食晒埋單,等佢哋多d時間執嘢收工!6點半時有2個鬼佬想入嚟食嘢,佢哋都唔做佢哋生意,連話買走都唔得,見佢哋個樣都好無奈同徬徨,今晚佢哋唔知揾唔搵到嘢食呢?我哋都算執返個尾彩啦!


我嘅薯溶+牛扒,又出奇哋好食喎!HK$80.00


毛爸嘅豉油雞胸肉,個豉油汁幾好喎,唔知係咪因為好耐無食過豉油,好掛住嘅原因呢!HK$70.00       


沙律都唔錯,今晚算好彩有得食仲要幾好味!HK$50.00


無事做嘅晚上就梗係攞d毛毛嘢出嚟睇吓啦,點知原來毛爸連BB同安安張年曆卡都帶埋嚟喎!小狗們,好掛住你哋吖!


Hotel : Dazzler Suites Arroyo Hotel
Address : Suipacha 1359, C1011ACC Buenos Aires
Telephone : (54-11) 5276-7700
Fax
Price/night
URL : http://www.dazzlersuites.com/esp/
e-mail : reservas@dazzlersuites.com


2008年12月30日 星期二

南美之旅第7天 (30-12-2008)

南美之旅第7天 (30-12-2008 星期二)


加拉法第(El Calafate)-自由活動


今日我哋係自由人時間,無預備任何節目,諗住悠悠間休息吓咁啦!

呢間酒店嘅早餐喺送到我哋嘅屋仔嘅,個早餐好簡單,不過都夠食嘅,最好味就係杯鮮搾橙汁!        


嘆完早餐,我哋”hea”咗一陣就出動去shopping啦,順便俾時間人哋执吓屋!行咗成朝都無咩買到,於是乎又去食囉,午餐我哋又去返第一日嗰間小店,因為佢又平又好食,今次我哋叫咗兩個crepe加一個湯,超正!喺呢度想搵到好嘢食係好難架!


毛爸嘅蕃茄,吞拿魚,洋蔥crepe” HK$80.00


我嘅火腿,芝士,乾蕃茄crepe” HK70.00


呢碗係洋蔥加大蔥(leek)湯,非常之正,好清甜,喺度好多湯都落好多cream,難得有碗咁清得嚟又好味嘅湯呀!HK$48.00


加多兩罐可樂,今餐埋單都要HK$250,喺度食嘢已經算平架啦!


我哋酒店旁邊有間教堂仔,我見到好多鬼都會入去祈禱架!


食飽又係午睡時間啦!zzzzz


我哋嚟咗呢度幾日,發現呢度d人同香港人養狗嘅文化好唔同,佢哋養狗,但唔多打理佢哋,好多時喺街見到d狗都好污漕,d毛一餅餅,仲有就係呢度無人用狗帶拖狗出街架,全部狗狗都係自由行,好多時仲見佢哋自己出嚟散步,無主人同行架!呢度唯一要用帶拖出街嘅寵物就係羊啦!












仲發現d狗狗好乖架,d舖頭唔俾狗狗入,佢哋就個個乖乖喺門口等,唔會走開又唔會走入去架!


今日仲見到架由德國揸過嚟嘅旅行車,好鬼靚,不過無人喺度,如果有真係想上車參觀吓呀!     


你睇吓佢去咗幾多地方!


司機位設備幾完善!


仲有呢隻雀,佢每日早晚都經過我哋間屋,好準時,唔知有無人養呢,呢度d動物全部都咁自由嘅!      


佢仲識過馬路架!   


晚餐又係自備嘅麵同粉絲加腸仔!


Hotel : Santa Monica Aparts
Address : Josefa Freile 42 (9405) El calafate - Sta. Cruz, Patagonia Argentina
Telephone : (0054 2902)491-835
URL :  
http://www.santamonicaaparts.com.ar/spanish/santamonica.html
e-mail : santamonica@cotecal.com.ar

2008年12月29日 星期一

南美之旅第6天 (29-12-2008)

南美之旅第6天 (29-12-2008 星期一)


加拉法第(El Calafate)→莫蘭路冰川 (GLACIAR MONERO)
Excursion to Perito Moreno Glacier (minitrekking over the ice of Moreno Glacier)


今日我哋book咗去行冰川嘅local tour,晨早8:30就有車嚟接我哋,大概坐2小時嘅巴士就去到國家公園,買張入場劵,架巴士就會繼續向碼頭嘅方向駛去,途中會停一個站俾我哋落車影相,遠距離俾你望吓先!


再開多十幾分鐘就到碼頭啦,個碼頭好簡單,但都幾靚!



我哋大概坐十幾廿分鐘船過對面岸嘅一個休息站,喺船度成日都見到呢d甩出嚟嘅冰,有大有細,好自由咁喺度漂吓漂吓!


我哋隻船埋岸啦,我好期待嘅踏冰之旅就嚟實現啦!!!


我哋喺休息站食咗少少嘢,休息咗一陣,導遊就摧促我哋要出發準備上冰川啦,呢度環保做得好,所有人要將自己帶嚟嘅垃圾帶返去,我哋食完香蕉d皮掉落厠所裡面嘅垃圾桶都俾人話,無引得嚟又覺得佢哋做得幾啱喎,咁靚嘅冰川,大家都應該盡力去保護佢,我咁想快d嚟睇冰川,就係怕佢好快會消失,人類始終係大自然最大嘅敵人!


行過一段山路就到咗呢個咁靚嘅石灘~~~


教練喺度講解冰川嘅形成同一陣我哋上冰川要注意嘅事項,由於冰川上有好多暗藏嘅危險,所以叫我哋一定要跟實教練行,而行緊嘅時候唔好影相,佢會有停抵俾我哋影相嘅時間~~~  


上山前影返張留念相先!


再行多一段山路就嚟到一個距離冰川十幾米嘅地方,教練會喺呢度幫我哋著上一對專為行冰川而設嘅"鐵爪",對"鐵爪"鬼咪咁重呀,一陣間就要著住佢行冰川啦!




著好鞋我哋就出發啦,呢個係第一個可以停抵影相嘅地方,我哋個個都要好似幅相入面嘅人咁用兩個雪插爬上去架,我哋而家就係排緊隊等爬上去啦!


你哋真係信呀,其實邊有咁勁呀,呢位係教練,佢試俾我哋睇如果好企可以點樣爬上去!我哋喺旁邊有條無咁斜嘅路行上去架!呢個係冰川上嘅一個小湖,我哋啱啱學識咗水上飄輕功呀!








爬上爬落,唔經唔覺我哋喺冰川度行咗2個幾鐘啦,由於毛爸要負責影相,又要拍DV,所以大部分嘅行李都放咗係我個背囊度,入面加加埋埋有成十幾磅,我都估到揹住個咁重嘅背囊都可以全程跟得上,我前面嗰兩個就係我哋今次嘅教練啦!      


行到我哋今次旅程嘅尾聲,教練就帶我哋行咗去一個有枱嘅地方,呢度仲放咗d朱古力餅同威士忌喺度,佢哋專登再爬過高d,去我哋無行過嘅地方,攞d底層嘅冰返嚟開威士忌~~~            


為我哋可以順利完成呢次踏冰之旅飲杯!Cheers!


呢杯用冰川冰開嘅威士忌真係透心涼吖!



飲完酒,我哋就帶住依依不捨嘅心情行返去先前著"鐵爪"嘅中途站,除底對"鐵爪"


然後再行大概20分鐘嘅山路就會返到去先前嘅休息站,我哋喺休息站食咗噚晚毛爸整嘅愛心漢堡飽做午餐,其實都唔算係午餐,因為嗰陣已經2點幾啦,我哋食飽咗,影一陣相,隻船差唔多3點半就嚟接我哋返對面岸啦!




坐完船,我哋就上返我哋先前坐嗰架旅遊巴,再去另一個觀景台睇呢個咁震撼嘅冰川,Monero冰川高60米,係目前公認的唯一成長中的冰川,每日會向前推進2米,個個都想去睇佢d冰跌落嚟嘅情景~~~




我哋等咗一陣,只係見到少少冰跌落嚟,由於時間到,我哋要返上車啦,見唔到d冰大型咁跌落嚟,真係有d失望架,不過無計啦,夠鐘都要走架!


返到加拉法第已經成夜晚7點啦,我哋攰到屎咗,完全唔想出去食飯,好在帶咗唔少罐頭同公仔麵啫,今日晚餐超正!


呢碗係我嘅鮮炸鯪魚+美味粉絲!


毛爸嘅鮮炸鯪魚+壽桃牌鮑魚雞湯麵!


食飽,沖個涼,10點唔夠就瞓到不醒人事啦!


Hotel : Santa Monica Aparts
Address : Josefa Freile 42 (9405) El calafate - Sta. Cruz, Patagonia Argentina
Telephone : (0054 2902)491-835
URL :  http://www.santamonicaaparts.com.ar/spanish/santamonica.html
e-mail : santamonica@cotecal.com.ar