2009年12月31日 星期四

除夕大餐

喺2009年最後一日,Daddy同媽咪帶咗我去食除夕大餐,一如以往梗係去歡迎我哋小朋友嘅麗豪酒店啦!


今次我仲有3位朋友仔同我一齊食大餐迎接新一年,歡歡好似好鍾意個蠟燭喎,我就鍾意和牛啦~~~      


細毛今年無飯食呀,要2010年先有得食!


出晒名爹嘅CoCo~~~


大人嘅晚餐,我哋小朋友淨係分到d麵包碎咋!


之後d小朋友同大朋友,仲有d無嚟食飯嘅MOS街坊就嚟晒我哋屋企倒數,因為Daddy同媽咪未完全搞掂晒間屋,無嘢招呼d朋友,就連櫈都無得d大人坐,真係唔好意思,遲d搞掂晒,再叫Daddy媽咪請你哋嚟坐吖!


PS : 嗰日我媽咪唔記得影相,你哋有影過相嘅好快d出blog,我要去偷相呀!


新一年祝大家新年快樂,身體健康!!!


2009年12月26日 星期六

2009日本東北之旅 - Day 8

松島 →仙台→東京→成田→香港


松島 →成田 (399.6KM 6時32分 8,350円-IC 357.8KM)


今日全部係車程,總共要揸400公里,辛苦晒你啦毛爸!


食完早餐,9點就出發,中途淨係會停d休息站,無其他行程啦!


雖然係無行程啫,休息站都好多嘢睇同好多嘢買架~~~


小狗便當,好似好好味咁,當然要買返盒俾毛毛試啦


仲有d卜卜趣好似蝦條嘅狗零食,唔使問,掃.....


沿途已經無晒雪啦,我哋又返反去腳踏實地嘅環境啦~~~


午餐都係喺其中一個休息站食,味道都唔錯!



”友部”我哋最後停嘅一個休息站~~~


還車 - 成田空港[東京] at 3:30 pm,毛爸8日之內足足揸咗1,604公里,=佢喺香港揸成個幾月嘅長度~~~



飛機準時起飛,準時到達!
CX 505 TOKYO NARITA - HK (1820-2235) 05HR 15MIN


今日個飛機餐竟然有金沙食喎!


今日毛毛又增添咗2款手信~~~


第2日一早去接返毛毛,俾去試吓張新床,佢竟然肯瞓喎,好開心呀買到張毛毛肯瞓嘅床,我之前買過兩張佢都唔肯瞓,死都要瞓返張舊嘅,但張舊床已經用咗6年半,霉霉爛爛架啦,再唔啱都唔知點算,好在,今次呢張佢鍾意啫!


毛毛:好啦,都幾舒服,我今次收貨啦!




2009年12月25日 星期五

2009日本東北之旅 - Day 7

志戸平温泉 → 松島


朝早浸一浸就去食早餐,呢間酒店實在太舒服太好,如果時間許可我哋真係希望可以喺度住多一晚,慢慢去體會同發掘佢嘅獨特同心思,今年喺呢度過咗一個好有聖誕氣氛而又寧靜嘅平安夜,好喜歡呢種感覺!但唔可以成日都係咁,已經兩年無陪毛毛過聖誕,下年一定要留返喺香港陪毛毛!


我喜歡呢間酒店仲有一個原因,就係佢唔招待12歲以下嘅小朋友,咁樣我哋先可以享受到一個咁寧靜嘅平安夜!日本d酒店好好,有好多都會講明招唔招呼小朋友,好似我呢d唔鍾意小朋友嘅人可以好容易選擇到適合嘅酒店,仲有呢度係11點先check-out架~~~ 




雖然係一個簡簡單單嘅早餐,但都睇得出廚師們所付出嘅心思,每一味都經過細心嘅配搭,味道都係好夾,我哋用咗一個半小時去品嚐呢一份早餐,唔好浪費咗廚師們嘅心思,好滿足嘅一餐!              

 
 
 
 



拜拜啦”游泉 志だて”有機會我哋會再嚟架!


志戸平温泉 → 泉屋蕎麥麵 (56.9KM  1時03分 1,250円 IC - 34.1KM)


我哋差唔多11點先離開志戶平,下一站準備去平泉食蕎麥麵,而喺途中嘅休息站見到呢d咁美味嘅便當,日本人真係好幸福~~~


前沢限定嘅Cheese cake,我哋當然唔會放過啦,不過唔係買咗而家食,係準備做下午茶啫!                


喺就怏到泉屋時,我哋經過中尊寺,咁就順便入去行個圈啦~~~


”中尊寺”一間古老佛寺,但太過多人工化嘅嘢,破壞咗佢嘅原始美,喺上下呢兩幅相度你哋都可以見到佢有幾多電線同燈泡掛係d樹同寺廟度~~~


由中尊寺再開車幾分鐘就到咗”泉屋”,呢間麵屋已經開咗一百一十幾年,而且而家都仲係用石臼磨麵粉架,佢d麵條係粗而深色,但入口係滑而煙靭....


午餐 : 泉屋蕎麥麵 (Tel : 0191-46-2038)
営業時間 : 9:00-16:30 (週三休息)
地址 : 平泉字泉屋75


室內嘅佈置好古色古香~~~




開始講食啦,呢碟係用蕎麥麵粉做嘅餅,佢仲有特別嘅一款茶去送餅架,不過我就覺得d餅甜咗d!           


蕎麥麵餐,所有嘢都係由蕎麥麵做架,好好味~~~


我呢款係期間限定嘅麵,不過唔記得叫咩名,唔緊要啦,最緊要係好味道啫!       


呢度個老板好好人,佢將呢間店嘅歷史遇講咗一次俾我哋聽,雖然我哋唔係明好多,但係佢都好努力講,希望我哋可以明多d,日本人就係咁,做咩事都係咁認真!之後佢仲請我哋飲酒,但知道毛爸要揸車之後就收返佢嗰杯俾我,仲打開咗一度房門,入面有一尊神像,神像係保佑駕車者嘅安全,老板就叫毛爸拜吓,話可以保佑我哋路上平安,我鍾意鄉下地方,就係因為呢d人情味囉!   



”泉屋”就係JR平泉駅對面,呢幅相就係企係”泉屋”門口影~~~


食飽飽就去shopping啦,目的地"Sendai-Izumi Premium Outlets"


泉屋蕎麥麵 → Sendai-Izumi Premium Outlets (87KM  1時26分 2,050円 IC - 75.1KM)


呢個零鐘嘅車程度,我哋又搞掂埋個前沢限定嘅Cheese cake,日本嘅Cheese cake真係無邊次令我哋失望架,又滑又香,俾多個我哋都食得落呀!


到咗啦,呢個outlet好靚同同大,只可惜我哋時間有限,得個幾鐘行!


Sendai-Izumi Premium Outlets
宮城縣仙台市泉區寺岡6-1-1 郵遞區號:981-3204
TEL:022-342-5310
http://www.premiumoutlets.co.jp/cht/shop/sendai-izumi/index.php


當然全力進攻寵物用品啦!



Pet Paradise當然唔可以放過啦~~~ 



5點半已經離開outlet,不過遇上塞車,終於又要成7點先去到酒店...


Sendai-Izumi Premium Outlets → Breezbay seaside resort Matsushima (24.6KM  52分)                 


晚餐 : 薬膳火鍋


味道一般啦,不過8,900円包2餐一宿,咁嘅價錢都算唔錯架啦!



 
 



今日毛毛嘅收穫最多,第2排嗰隻零食係毛毛最鍾意嘅,但係香港已經斷咗成半年貨,今次咁啱喺日本見到梗係掃佢幾包啦!



ブリーズベイ シーサイドリゾート松島(Breezbay seaside resort Matsushima)
http://breezbay-group.com/bbs-matsushima/stay.html
〒981-0213 宮城県宮城郡松島町松島犬田1-10
Tel : 022-353-8333
1部屋: 8,900円×2=17,800円 (1泊2食)