上星期菲律賓事件令人唔開心咗好耐，今日又要返朝９晚１０更唔高興，８月可唔可以快ｄ過呢???
2010年8月21日 星期六
貴夫人生機精華萃取機
而家個個都講健康飲食，行過一田時又見人介紹”生機精華萃取機”，好似幾好咁（呢ｄ係女人通病，一行街就跌錢），就同朋友一齊買咗，有伴一齊玩會開心ｄ嘛！
團購又平ｄ呢，多謝大魔幫我哋講價講到咁平，有咁多嘢送，仲要去訂埋貨，好耐都唔該呀！
等咗幾日，今日終於有貨收啦，一入門，好嚇人，使唔使咁大盒???
除咗部機仲有好多配件同贈品～～～
毛毛都要一齊嚟睇吓有咩玩～～～
點知最後俾毛爸玩，話賣咗佢喎！
毛毛：玩夠未呀你兩個，都唔細啦，仲玩！快ｄ放我出嚟呀！
將貴夫人放喺我部咖啡機隔離，一齊為我哋毛家服務啦！
佢個樣又幾高貴嘅！
夫人準備開工打佢第一杯熱情果＋火龍果汁啦！
多謝coolcool喺中環買ｄ咁靚嘅生果返嚟俾我哋打果汁！
60秒就打好啦，真快手！
好好味，連熱情果ｄ子都打爛晒，食晒幾肚，正！
不過毛毛就唔肯飲，嘥咗！
2010年8月16日 星期一
清晨的海濱長廊
一直都覺得自己太肥，心肺功能差，又易病，之前都想運動吓等自己健康ｄ，不過由於同會所 gym room 開放時間唔夾，一個星期都去唔到一次，真係有鬼用咩！
樓下海濱長廊，等咗好幾年，最近終於都開咗，就的起心肝去做吓運動，一開始時係夜晚10點去，但有時等毛爸收工食飯都等到８點幾，食完都夠鐘瞓覺唔使去啦，無辦法之下改咗朝早去，要咁早起身，最初都幾辛苦，不過一個星期到已經習慣咗，６點嘅空氣真係清新ｄ架，仲有就係好多人都咁早起身架，６點幾已經成街都係人～～～
喱條就係我日日跑嘅緩跑徑，起初我只係跑到１km，有３km係急步行，仲要條氣索到就嚟斷咁，而家已經有進步，跑2.5km－行3.5km，希望遲ｄ可以去到跑４km－行２km咁就very good 啦～～～
2010年8月7日 星期六
2011 MOS狗狗街坊春季旅行 - 準備篇１
一班mouli圍埋一齊搞咩呢？咪係為我ｄ老細去旅行安排行程囉！
今次真係唔講得笑，有11人5狗，雖然大家都已經去過日本，亦都知道同狗狗一齊去旅行嘅手續點搞，不過今對大家嚟講都係一個幾大嘅挑戰，因為真係人多狗多，好多細節都要得別小心處理，不過我相信我哋呢班mouli應該可以應付嘅！
今次目的地”東京＋伊豆”
首先梗係要confirm咗出發日期先啦，11個人嘅假期真係要夾清楚！
跟住仲有行程同酒店要傾～～～
另外仲要傾分工嘅問題，真係幾多議題架！
好！半場要休息啦，Tea一Tea先，今日有喺”粒珠甜點”度訂咗個法國白芝士蛋糕，好好味，仲超滑呀，真係粒珠出品，必屬佳品！
呢個蛋糕連個內心都好美麗架！
因為有兩個團友唔食得奶同芝士，訂多個戚風蛋糕俾佢哋～～～
和風朱古力綠茶雪球，唔好俾佢個樣厄到呀，係曲奇餅嚟架！
呢個係我最鍾意嘅杏仁薄脆，個個都食到停唔到口！
食咗咁多嘢，都喺時候再努力啦！
大人傾咁耐，小朋友就開始唔耐煩啦，歡爸出絕招安撫菇菇～～～
CoCo : 我都係上嚟睇吓你哋幾時先傾完啫，唔使一齊指住我架.....
大人傾嘢，ｄ小朋友幾無聊！
傾到差唔多７點，要去醫肚啦！地點？可以帶小朋友，又可以坐得舒舒服服，仲要有好嘢食嘅，別無他選啦，麗豪酒店－意廊！
唔該晒大廚同MAX哥哥悉心安排，我哋今晚呢張十幾人長枱，坐得好舒服，大家都超讚呀！
歡歡 : 呢碟咁細嘅，係唔係我哋小朋友架？
當然唔係啦，呢個係餐前小食，係蟹肉同芒果整嘅，好味！仲有前菜－生和牛薄片配火箭菜沙律及黑松露菌油醋汁，龍蝦湯，和牛肉眼扒配大蝦 ～～～
歡歡：嗰碟無我份，呢碟有啦掛？
今晚一直都好好天，點知到我哋食完主菜就開始落雨，拿拿臨走鬼，要坐埋晒太陽傘下面，好在都係落一陣就停咗，都好呀，坐密ｄ，食埋個甜甜蜜蜜嘅甜品！
食飯淨返ｄ錢，一致決定攞去買個希望，希望我哋會有免費旅行去啦！
mouli們，星期二記得對六合彩啦！
2+5+8+9+11+23+39 (7個字複式)
32+33+36+38+39+41+48 (7個字複式)
1+3+32+39+40+41 (運財號碼)
11+17+28+31+34+37 (運財號碼)
9+42+44+45+46+49 (運財號碼)
3 + 7 + 27 + 30 + 31 + 46 (運財號碼)
今日細毛家有事無嚟，放心啦，我哋遲ｄ會update返你哋架啦～
訂閱：
文章 (Atom)