2011-09-11-12 澳門2天遊

我諗我應該有十年無去過澳門，今次去係因為有間我好鍾意嘅酒店喺澳門開咗，而新張價又好吸引，終於的起心肝去走一轉！

去程團購買咗巨龍船飛，HK$80有頭等坐，好抵！



午餐時間去到酒店，未入去已經感受到佢嘅豪華！





一入門口，棧水晶燈又大又靓，好氣勢！

但我鍾意嘅唔係呢Ｄ，再行入Ｄ先到我哋住嘅酒店Banyan Tree，但原來我唔記得影佢個大堂喎！

酒店詳情睇吓呢段片啦！
http://www.facebook.com/video/video.php?v=10150796322615237


因為太早仲未有房攞，放抵行李就出去揾食啦！今日午餐去咗亞利咖哩屋，佢好出名，所以晚餐就唔洗諗，我哋揀咗lunch time去試！

等位中。。。

門口有Ｄ露天位，熱到Ｃ，點都要等Ｄ有冷氣嘅位！

餐廳對面就係澳門觀光塔！

等咗15分鐘就有位，都算好彩啦！

蜜汁豬手，好多汁，好好味！

咖哩牛仔骨，唔太辣，好香，無椰奶，我最鍾意嘅咖哩味！

食飽飽返酒店攞房啦！

早幾個月前，呢間酒店有個新張promotion，住一晚送一晚，我見咁抵，就book咗間最平嘅房試吓，上房啦！


房門口有個雀籠，唔知要嚟做咩嘅呢？


係呀，呢間係最平嘅房嚟架！毛爸仲問我係咪俾人upgrade咗喎！


衣帽間～

　

睡房～

浴缸～






每間房都有個 Relaxation Pool 架！




仲有香熏可以點～

就連illy咖啡機都有，真係照顧周到！

瞓醒晏覺已經７點幾，係時候去搵食啦！見早早地，去咗泳池行一轉！

咁啱撞到激光表演，又企喺度睇咗一陣～～～

個泳池好靚，聽朝落嚟游吓先！

晚餐去咗皇冠小館食竹昇麵同蟹粥，竹昇蝦子雲吞撈面，普普通通，無特別！

反而呢碟蝦醬炒通菜非常正，好夠鑊氣！

奄仔蟹粥，鮮甜無比，好滿足嘅一餐！

 

食飽就梗係想瞓啦，不過都要試吓房個池架，沖完涼浸咗一陣就算啦，間房Ｄ冷氣好勁呀！

嘆埋杯illy coffee就去瞓，明天繼續hea啦！

酒店包埋早餐，不過唔係喺Banyan Tree餐廳食，要去銀河嗰邊餐廳，勁多國內同胞，好嘈！食物就普普通通啦！

食完早餐返房休息一陣就去游水啦！呢個天浪淘園一定要去感受吓啦，有沙玩同有浪衝，不過好多細路，好嘈，好煩！

 

影咗幾張相就走返過去Banyan Tree自己嘅泳池，呢度清靜好多，又少人，正呀！

 

午餐去咗新濠天地嘅喜迎樓食中餐，今次呢個餐好抵架，喺團購買，兩張$880水舞間門票加埋呢個午餐都係$1388，超值！個餐仲要幾好味添呀！

 

食飽仲未夠鐘睇show，就去威尼斯人行吓啦，第一次去威尼斯人，覺得佢好大，周圍都好靚！

但我接受唔到嘅就係佢周圍都煙霧瀰漫，行咗１５分鐘就走咗去Starbucks度hea...

5點準時開場！好精彩，我拍到手掌都紅晒，未睇嘅朋友快ｄ去睇啦！

本來可能睇埋煙花先走，不過中秋節唔想毛毛一個人過，所以一睇完就飛奔去碼頭坐7:15返香港接毛毛，中秋要人月兩團圓麻！