今日Daddy同媽咪本來話帶我嚟西貢游龍舟水,不過去到沙灘先發現個灘唔見咗,水漲呀,成個沙灘浸晒,無得游,咁唯有喺西貢碼頭行吓啦!
你哋睇吓,D水幾高,平時D賣海鮮嘅船,而家同個碼頭一樣咗嘅level,揀海鮮好方便!
去游船河,可以直接喺碼頭落船,唔使落樓梯,好方便喎!
我都要影返幾張相先!
玩咗一陣就要去日本姐姐度沖涼,咁又玩咗一日囉!
2009年5月26日 星期二
南美之旅 - 完結篇
３２日嘅南美之旅，當中有苦有樂，由幾年前想去睇吓同我哋相距半個地球咁遠
嘅國家係點，當時想去真係知道自己真係得個想字，亦知道需要再過一段比較長
嘅時間先有機會去，到今日已經去完返嚟，感覺都好唔真實。
由毛爸答應肯帶我去到今日已經９個月啦，一個月嘅旅程，我哋用咗４個月去
準備，唔知幾時開始毛爸對我安排旅行嘅事已經十分有信心，所以基本未上飛機
前佢都完全唔理，通常係喺飛機度有時甚至乎可能去到第一晚住嘅酒店瞓醒一覺
佢先會問我攞行程睇，都已經習慣咗啦，我亦知道佢唔係唔想理，只係無時間理
，因為佢要放假就必須完成手頭上工作先得，呢樣我好理解。好多人都問點解
我兩公婆咁鍾意去旅行，鐘意玩係中一個原因啦，另一個好大嘅原因係我想毛爸
有真正休息嘅時間，所以我哋好多時都係自由行，仲要係好悠閒嗰隻，佢喺香港
一定有公司嘢要做，佢要離開咗香港，先可以暫時離開佢嘅工作，好在小毛毛有
爺爺同嫲嫲照顧，如果唔係我哋去旅行唔會去得咁無憂無慮！講返毛爸，佢都幾
好嘢架，你唔好睇佢咩都唔理，每次睇完d資料佢就會跟到晒成個行程，之後我
就嘆啦，因為通常喺旅途上再遇到嘅嘢佢都會照顧晒，我就會好似跟團咁啦！
今次都係一樣，上機前一晚，本來話早ｄ收工去食團年飯，毛爸都係要做到７點
幾先收得工，去同屋企人食埋團年飯返到屋企已經１０點啦，再執吓行林，終於
今次毛爸又係喺機上面睇行程！
３０個鐘頭飛機真係搞到我哋想死咁濟，落機時都唔知係邊年邊月邊日，都有一
個好處，就係今次我哋完全無時差，因為搭機都搭到傻咗啦！
我哋第一個踏足嘅係阿根廷，呢個國家d人好得意，好熱情同我哋中國人好唔同
，佢哋每個人都係為咗開心而生活，佢哋覺得生活就係要開心嘅，喺街度三唔識
七嘅人都佢哋都會同你打招呼，同你笑，你聽唔明佢講咩都好啦，佢都不停咁同
你講嘢，生活好悠閒，佢哋真係為生活而生活，而唔係為工作而生活。但可能就
係咁，發覺佢哋經濟好差，就算係好旺嘅遊客區都有好多吉舖。真係好在佢哋有
兩個咁出名嘅旅遊勝地「莫蘭路冰川」同「伊瓜蘇瀑布」咋，如果唔係呢兩大名
勝帶俾佢哋咁多收入，相信佢哋嘅生活仲會更艱難！
「莫蘭路冰川」一個可以令你睇到會停止呼吸同心跳嘅冰川，每個人去到「莫蘭
路冰川」都講唔出嘢，就算好多人喺度都好，你通常聽到嘅都係個「嘩」字！而
「伊瓜蘇瀑布」都係靚到唔知點講，企係個瀑布前，俾ｄ瀑布水整到成身濕晒都
唔肯走，淨係睇呢兩個靚景已經絕對值得坐３０個鐘頭飛機去啦！
至於郵輪方面就有ｄ失望，同１０年前第一次去郵輪嘅感覺同質素相比，真係差
咗好多。先講吓人先，當年喺船度你會覺所有嘅工作人員都好開心，笑都係由心
度笑出嚟，７日嘅船程已經同佢哋好似朋友咁，走時真係好唔捨得佢哋！今次你
會感覺到佢哋唔開心，我哋每日嘅晚餐都會由同一個侍應負責，第一二晚嘅侍應
都麻麻地，第二晚仲坐抵咗成２０分鐘都無人理，但我哋都無怪佢，因為我哋見
佢都完全無停過手，只係佢技巧唔夠，應該過嚟打過招呼，咁我哋感覺會好ｄ，
以前每個侍應只係負責１０－１２位客人，仲有一個私人嘅助理侍應幫佢哋手，
所以以前真係有５星酒店嘅服務架，而家呢，一個侍應＋助理侍應就要照顧
２０－２２位客人，佢哋仲邊有時間去特別照顧你嘅感覺吖，夠時間俾晒５度菜
你食已經唔錯啦！第三晚因為我哋唔想餐餐飯都要應酬其他人，就要求轉咗張
２人枱，好好彩俾我哋轉到，仲轉咗個好好嘅侍應同助理侍應，同第一二晚嗰個
差好遠，其中一個原因係我哋轉咗食早一輪嘅晚餐，第一輪嘅晚餐係比較少人揀
，所以我哋個侍應只係負責１２位客人咋，所以又有返ｄ５星酒店服務啦！
早餐時好奇怪我見到噚晚ｄ侍應係１０樓嘅自助餐廳掃地，抺玻璃，幫手做挾嘢
食俾客，呢ｄ工作以前全部都有清潔工同廚房工人做架，做咩而家要佢哋做埋嘅
，如果我係佢哋都會唔開心囉，唔怪得成隻船嘅氣氛同以前唔同晒啦！梗係公司
慳錢而咁做啦，但ｄ船公司老板有無諗過ｄ客見到咁樣，而質素又差咗咁多，就
算你做到再平，ｄ客未必會再返轉頭架，起碼我哋唔會再揀呢間船公司啦，惡性
循環，有時ｄ嘢真係睇長線ｄ好！
復活節島係超乎我哋想像嘅一個地方，好多人都覺得幾舊石頭，有咩好睇呢，我
未去前都係咁諗，而且最初我編行程嘅時候都無揀呢個地方，不過毛爸話想去，
我先加埋落我哋嘅行程表度，點知真係一去不可收拾，我同毛爸都鍾意到不得了
！我最怕曬同戶外活動，係香港只有小毛毛有能力要我陪佢去行下山，曬吓太陽
，但我哋喺復活節島時係朝10朝晚８咁曬住行，日日三十幾度同勁曬，但都無損
我哋嘅興致，最後變咗兩個黑人返嚟，我哋都決定有機會會再去一次！
今日終於完成咗我哋嘅壯舉，３２日內搭咗１２程飛機，好辛苦，使咗天文數字
嘅錢，有排先儲得返，影咗４千幾張相，返嚟整相簿都整咗６本，用咗３個幾月
時間，而換返嘅係無限美好回憶，去旅行就係咁好，去完返嚟可以回味，回味，
再回味．．．
2009年5月12日 星期二
2009年5月9日 星期六
新環境，舊工作！
剛畢業嘅時候，我係銀行工作咗好多年，但到1997年時，覺得銀行工作開始有好大嘅變化，而且工作時間越嚟越長，所以決定放抵我10年嘅工作經驗，希望轉一份時間同工作量都比較適合我嘅工，如果你哋有睇過毛毛點點頭都知我係一個對工作無鬥心嘅小女人啦，準時放工對我嚟講係好重要！
展轉之下就轉咗去圖書館，即係而家做緊嘅呢份工呀，哈哈，當年我都唔明我老細點解會請我呢個一ｄ經驗都無而年紀又唔細嘅人呢，可能好多嘢上天已經靜靜咁幫我哋安排好啦！
喺而家呢個部門已經工作咗11年5個月，剛剛入職嘅時侯對圖書館嘅工作真係一無所知，淨係知圖書館員會係出入口做借還書嘅服務，但原來呢ｄ只係圖書館工作嘅好少好少一部分，其實背後仲有好多好多嘅人同好多好多嘅工作要做，一本書先可以上架！所有工作由零開始學，之後開始慢慢上手，到後來，一有新種工作或者project，老細(L)一定叫我第一個去接手做，做到咁上吓就pass俾其他人做，之前成日埋怨佢點解次次都揀我，喺咪偏心其他同事！
真至三年前佢要調職，離開咗我哋，於是我換咗一個新老細(E)，呢位老細(E)嚟咗我先知，嗰８年嘅時間老細(L)教咗我幾多嘢，原來我之前怪錯咗佢！有人好多嘢都唔識，咁都唔緊要，唔好扮識吖麻，搞到ｄ嘢亂七八糟，之前老細(L)嘅特訓令我可以捱得過呢兩年零９個月非人生活～～～
之前諗過唔做，但係我覺得為咗佢唔值得，佢未有咁嘅本事，咁就伸請job rotation囉，不過一直都無機會，不過我知我大老細已經盡力安排中，於是唯有等啦，我大老細係一個好好好嘅人，我都唔想俾太大壓力佢，所以我忍忍忍．．．．．我足足等咗超過兩年！
２００９年４月３０日就係我喺呢個部門最後嘅一個工作天，實在太興奮，一早已經準備好，３０號一早返去準備搬走，Bye Bye 啦！
呢個喺我個新位，地方大咗，partition高咗，而且而家個位比較靜ｄ，仲係我最鍾意嘅死角位，做嘢可以專心ｄ，我好怕坐喺office嘅中間位，我會集中唔到，做嘢慢好多架！仲有換咗一個比較開明嘅老細，就算喺而家坐呢個位，佢都有問過我會唔會唔鐘意，如果唔鐘意可以俾我坐返喺舊嗰位，我覺得好warm，有人會咁重視我嘅感受！雖然而家個位同以前ｄ同事遠咗（因為唔同層數），不過我都決定搬，我要同(E)一刀兩段！唔想再見到佢！
其實我轉咗部門，工作同以前差唔多，我都帶咗７成以前做嘅工作走，所以好快適應咗新環境，舊工作啦！
不過我最放唔抵嘅喺ｄ舊同事，希望佢哋都可以快ｄ逃出魔掌啦！
2009年5月3日 星期日
熱辣辣的佛誕
WOW！今日好忙碌呀，晨早9點半就出發去彭福玩啦，今日浩浩蕩蕩７架車１３隻狗狗好熱鬧呀！
今日爺爺同嫲嫲都有嚟陪我玩呀！
細毛一早已經到咗，仲玩咗一轉添啦！
Uncle帆，唔該幫我影張靚相吖！
太陽伯伯今日好努力，曬到我要搵”定””里”!
唔係淨係我怕熱架，QQ同BeBe都係咁呀！
歡歡都熱到要俾papa強制休息～～～
細毛都支持唔住要揾樹蔭抵休息吓啦～～～
呢個姐姐仲貪玩過我，病病都嚟彭福同我哋玩
呢位日本靚女金菇真係夠晒吸引力，有兩位攝影師瞓晒身都係想幫佢張靚相咋！
一睇就知佢係狗界Top model "Mocha"啦，擺好pose俾我哋慢慢影～～～
我支持唔住啦，要返屋企休息吓先啦，未散團媽媽就抱咗我走先啦！
Daddy媽咪要同爺爺嫲嫲去飲茶，咁我就返屋企瞓一陣先啦～～～
傍晚時分，我哋又出動啦，今晚我哋約咗ｄ朋友仔去西貢玩同食海鮮
，我哋一行８人７狗，有籐條，涼粉 ，珠珠 ，粒粒，WaWa同Tacky，不過Daddy影唔晒我ｄ朋友仔呀！ 
Daddy同粒粒合照，粒粒好輕呀～～～
又到咗零食時間啦，媽媽成日教我要乖，要等等先有得食，不過無教我要搵個好位喎，唔知我企係呢度有無得食呢?
呢個位好似好ｄ，不過都係分唔到喎！涼粉讓個位俾我得唔得呀？
呢個位都唔得～～～
點解我企個個位都無得食嘅？
今晚我哋係通記食海鮮，雖然係餐，但係用料都唔錯，好好味呢！
Alice姐姐除咗安排我哋今晚玩同食之外，仲準備咗份好好味嘅禮物俾我哋！
合桃香蕉磅蛋糕＋芒果果醬 - 好好好好味!!!!多謝晒！
我今日真係好攰呀，D大人食飯嘅時候，我已經不支倒地，覺覺豬啦！
訂閱：
文章 (Atom)