南美之旅第24天 (16-1-2009)

南美之旅第24天 (16-1-2009 星期五)

Buenos Aires-Valparaiso Cruise on Celerity Infinity (Day 13) - Puerto Montt, Chile

Puerto Montt 一個都幾落後嘅城市，聽講話海鮮好出名，不過當你去到佢個海鮮市場，興趣會大減，因為見唔到ｄ游水海鮮，全部都係瞓晒覺嘅，可能今日落雨啦，周圍都濕淋淋，好似好污漕咁，所以我哋咩都無買，無食，行咗一陣同影咗幾幅相就向新城方向進發啦！

今日我哋上岸有好多嘢要做，因為後日我哋就要出發去復活節島，今日要去航空公司確認機位，仲有要去換返ｄ智利錢，如果唔係後日上岸就無錢使，最重要係要搵有wifi嘅地方上網報平安，已經幾日上唔到網啦！

行嚟行去，足足行咗成２個鐘頭先去到新城，幾經辛苦先搵到間LAN航空公司，好好彩就係我哋喺佢哋閂門前一分鐘入咗去，真係遲一步就要再等兩個鐘先可以confirm到機位！　　　

搞好機位，我就負責上網報平安，Daddy就負責去換錢，我哋個午餐又喺係麥當奴搞掂！　　　　

咁核突嘅公仔都可以做到出嚟，唔影真係對你唔住呀！

我哋食飽飯，天氣都好轉咗，走出去海邊行吓，好舒服！

今日行咗好多路，又攰又肚餓，返上船沖個涼就去晚餐，今日我哋又食咗３個主菜！哈哈．．．

咁靚嘅景真係想永遠留住佢呀，留唔到都要影低佢寄返屋企繼續欣賞！

又係嘆完靚景去嘆咖啡，唔好話我哋悶啦！