南美之旅第11天 (3-1-2009)

南美之旅第11天 (3-1-2009 星期六)

伊瓜蘇(Iguazu) →布宜諾斯艾利斯(阿根廷)

Date		Itinerary	Flight time
			Hour	Min
03/01/2009	Sat	Iguazu (IGR) → Buenos Aires (Jorge Newbery AEP) 0935 – 1125 (AR2743)	1	50

今日要飛返去BA啦，呢間酒店都唔錯，影底佢做個美好回憶先！

我哋book嗰個接送遲咗嚟，今日班機係飛09:35，搞到去到機場時已經差唔多９點，仲要排一條有十幾人嘅龍，幾驚航空公司唔俾我哋check-in吖，好在都順利搞掂晒，跟住已經要上機啦，真係夠晒緊張刺激！

等所有人上晒機之後，好耐都唔開機，都知衰啦，唔係壞機卦?係！機長話要整，叫我哋喺機入面等，等咗大概半個鍾，機長話整好，準備飛啦，個個好開心返埋位，扣好安全帶，不過大家都喺個位度等咗十幾廿分鐘都無動靜，於是乎各人又起身，周圍行，攞吓水飲，搞吓行李，揾人傾吓計，連ｄ空姐都喺度無無聊聊咁兩頭行嗰陣，架機突然間郁，我哋都以為仲整緊，轉個位慢慢整啫，點知架機越行越快，大家都開始覺得唔對路，拿拿聲返埋位，扣好安全帶，跟住唔駛一分鐘就飛咗上天啦，南美ｄ人做嘢真係好奇怪，阿機長話起飛就起飛，完全無廣播，連ｄ空姐都唔知咩事，真係好鬼得人驚，好在都順利降落啫！ 

個飛機餐又係嗰舊朱古力蛋糕，都費事要啦，對阿根廷ｄ嘢食無晒興趣，落機去酒店放抵咗ｄ行李，情願去搵間麥記醫肚好過啦！

食飽飽，下午我哋就去行吓好出名嘅貝隆夫人墓啦，喺我哋酒店行十幾分鐘就到，好方便！呢度好多墓都好靚，不過都有ｄ因為日久失修而爛晒！

最出名嘅當然係貝隆夫人墓啦，想影幅杷都唔易架！　　　　　

呢度除咗獨立屋之外，都有ｄ以apartment形式嘅位供應架！

墓園出面仲有個跳蚤市場，都有ｄ嘢睇吓，但唔係好精美，所以又係兩手空空而回！　　　　　　

而跳蚤市場中間係一塊大草地，就喺塊大草地度，我見到下面幅相嘅溫馨場面，好鬼羨慕，香港幾時可以咁文明呢?

攰攰地，諗住揾間coffee shop，嘆返杯咖啡，"hea"一陣啦，見到有間靚靚地，又有架咖啡機喺度，都應該唔差得去邊啦卦！

叫咗一杯雪糕加一杯Cappuccino Freddo，你真係估唔到杯Cappuccino Freddo係咩味，竟然係100%柱侯牛腩味，完全無咖啡味，救命呀，點解阿根廷ｄ嘢食咁架！

咁鬼失望，都係返酒店瞓一陣算啦，夜晚先再去發掘吓有無好嘢食啦！

瞓到夜晚７點，就出發去我哋喺2008年最後一日諗住去食大餐而又閂咗門嘅餐廳，呢度好奇怪架，ｄ餐廳開夜晚８點存架～～～

我哋兩個為食精又點會放過佢吖，今晚我哋得閒，再去過，終於都試到真正嘅阿根廷燒牛扒啦！

我哋叫咗一件西冷扒同一件蝴蝶扒已經唔敢再叫其他嘢，因為我哋見到隔離枱ｄ牛扒，件件都大過我塊臉，個waiter唔知會唔會覺得我哋好孤寒呢？唔理得咁多啦，我唔想浪費食物呀！

呢間餐廳應該開咗好耐，所有嘢都好舊，連件牛扒都係咩配菜都無，你要牛扒就真係淨俾件牛扒，絕無整色整水！

果然名不虛傳，正！多汁又有肉味，嚟咗咁耐，終於食到一餐好好味嘅牛扒啦，感動到想咸吖！

今晚瞓覺發夢都滿足ｄ呀～～～

 

Hotel : Carlton
Address : Libertad 1180, Buenos Aires, 1012, Argentina
URL : http://www.southtravels.com/america/argentina/carltonhotel/index.html