南美之旅第21天 (13-1-2009)

南美之旅第21天 (13-1-2009 星期二)

Buenos Aires-Valparaiso Cruise on Celerity Infinity (Day 10) - Punta Arenas, Chile

今日要去Magdalena Island睇企鵝，所以一早就要準備上駁艇，然後有巴士會接我哋去另一個碼頭，再坐２個鐘頭船就可以到Magdalena Island啦！

今次坐呢隻船好得意，唔知係咪叫做登陸艇呢！乘客坐嘅客艙喺晒隻船嘅右手邊，客艙分兩層，可以坐成幾百人架！

今次觀光團包嘅午餐！

全個島都係企鵝，真係未上岸已經好興奮啦！

喺接近Magdalena Island時，我哋見到有ｄ企鵝喺我哋船邊游，唔知喺咪歡迎我哋呢？Magdalena Island有超過１７萬隻企鵝，對於我呢ｄ咁期望見到企鵝嘅人梗係開心!                                                        

喺島上面唔可以亂咁行，有一條大概２米闊嘅行人路，兩邊用繩圍起咗，大家唔可以行出繩出面，雖然係咁，我哋都可以有同佢哋近距離影相嘅機會，因為ｄ企鵝就成日行入嚟我哋條路度，有時又會好似過馬路咁，急急腳行過，好鬼得意呀！

一上岸就不停咁影相，笑吓佢哋肥，睇吓佢哋ｄ動靜，唔識向前行，由於隻船只會停係到大概1.5小時，最後搞到唔夠時間行去燈塔，只可以遠遠咁影張相，真失敗!

你哋好好好好好得意呀！　

原來企鵝BB時ｄ毛毛係咁架喎！

呢度成山都係企鵝，睇到我不知幾興奮！

望咩呀，未見過靚鵝呀！

救命呀！有人想打劫呀！           

話咁快就要走啦，真係好唔捨得呀！

大概下午4點我哋就返到Punta Arenas嘅市中心啦，Punta Arenas係Patagonia區最大同最古老嘅城市，大概住咗15萬人，一個好寧靜嘅城市!

我哋喺市中心行咗一陣就返上船啦，因為最後一班駁艇開6:30。

返到上船，沖個涼就去食飯啦！　　　　　　　　　

食飽飯去聽肥仔表演已經成為咗我哋嘅習慣，第日聽唔到佢唱歌同彈結他會唔會瞓唔著呢？