南美之旅第23天 (15-1-2009 星期四)
Buenos Aires-Valparaiso Cruise on Celerity Infinity (Day 12) - Chilean Fjords
今日又係全日行船，太平洋真係唔講得笑，好大浪，Daddy今日又暈船浪啦！
因為怕嘔，Daddy咩都唔肯食，後來我哋個管房知道咗之後就攞咗ｄ克力架餅乾俾我，仲話俾我聽食咗唔會嘔架，叫Daddy放心食，唔食嘢唔得架！Daddy食咗少少果然無嘔，又學多樣嘢啦！
幾時先無咁大浪呀！救命呀！
Daddy瞓咗覺，我好無聊咁喺隻船度食吓嘢，"hea" 吓，揾人吹吓水，有中國人，有鬼佬，因為好鬼悶，所以咩人都唔放過，原來無咗個私家翻譯喺度我都同ｄ鬼佬溝通到喎！哈哈...
喺我同一個中國人傾計嘅時候無意間發現佢個仔係藥劑師，佢仲介紹咗隻幾好嘅暈浪丸俾我，咁我就拿拿臨去買俾Daddy食啦，食第一次無效，第二次連埋ｄ餅乾一齊食就好快發揮藥力，大概1個鐘頭就唔暈啦，好嘢，Daddy好返啦！
雖然Daddy已經無事，但係已經係夜晚７點啦，過咗我哋嘅晚飯時間，今晚係最後一晚Formal dressing，我專登買嚟嘅晚禮服無機會著就要帶返香港啦！之後聽ｄ人講，今日嘅晚餐仲係全程船最好食，激死人！
毛媽你好勁呀，咁大浪都冇暈船浪，換轉係我肯定成個散晒～
回覆刪除[版主回覆05/15/2009 14:02:00]我都唔知點解，第一次去郵輪遇到打風，暈到我死吓死吓，今次咁叻無事，仲可以照顧返毛爸添！
無得食咁正既晚餐唔緊要既, 下次叫毛爸請你去多次郵輪旅行補數囉!
回覆刪除[版主回覆05/15/2009 14:03:00]你個提議幾好喎，等我今晚同毛爸申請先！
毛爸個樣好慘呀!!!!!!!!!!!!!!!!!!!
回覆刪除你真係好叻呀! 咁大浪都冇事.
[版主回覆05/18/2009 22:48:00]我都好慘架,悶咗2日,我都係第一次咁叻,次次都係我暈船浪,今次等我照顧返毛爸一次咁多啦!