南美之旅第8天 (31-12-2008)

南美之旅第8天 (31-12-2008 星期三)

加拉法第(El Calafate)→布宜諾斯艾利斯(阿根廷)

Date		Itinerary	Flight time
			Hour	Min
31/12/2008	Wed	El Calafate (FTE)  → Buenos Aires (Jorge Newbery AEP) 1021 – 1417 (AR1803)	2	56

今日早機，食飽早餐就要告別呢間咁正嘅酒店啦！架車８：３０嚟接我哋，唔使半個鐘就到機場啦，呢個機場好細，一眼睇晒！

今日我哋好黑仔，首先check-in時佢哋話我哋件手提行李超重要我哋寄艙，寄艙本來都無問題，不過我無鎖喎，咁唯有嘥六十幾蚊去幫件行李打包啦！

到入閘過X-ray時俾人發現我哋帶咗把瑞士軍刀（把刀陪咗毛爸１６年架啦），毛爸好唔捨得咁放低咗佢喺Calafate機場，好在我哋帶咗兩把，如果唔係，餘下嘅旅程都無刀仔用架啦，同一時間仲跌爛咗個Aigle水樽，激到毛爸屎，水樽對我哋嘅旅程好重要架麻，而家要兩個人用一個水樽，唔係幾夠囉，希望遲ｄ遇到啱心水買返一個啦，毛爸嬲到一返到酒店就寫email俾Aigle投訴佢哋ｄ產品質地差，成日話自己ｄ嘢點好點好，點知係唔夠一米高嘅枱面跌落地都爛得！

還好就係架機都叫準時起飛，不過又嚟個超級難食嘅飛機餐，ｄ飯，唔係，係ｄ米完全未煮過，再攞去急凍就攞嚟俾你食！

第一次喺個機蘿柚落機！

呢度ｄ人都好興帶狗去旅行，程程機都有狗狗同行架，而且佢哋會放喺行李帶度轉轉吓，主人見到就拎返佢哋落地，同日本有ｄ唔同架！

返到酒店已經三點幾，呢間酒店麻麻地，睇個樣都ｏｋ，不過用落ｄ嘢全部都唔就手，仲要好多嘢係爛嘅，如果唔係book唔到先前住嗰間Carlton都唔會揀佢！

個厠所先舊得神奇呀，再加一個閂唔到嘅圓窗，再凍ｄ沖涼一定凍屎！

今日係大除夕，諗住同毛爸去食餐好架啦，黃昏５點鐘我哋就出動啦，不過喺部電梯度睇到一張通告，話酒店餐廳同room service今晚8點就會停止服務，我哋開始覺得有ｄ唔妥，走去問大堂經理，出面ｄ餐廳開唔開架，佢拍晒心口話開，好啦，咁我哋就坐taxi去ｄ網友介紹嘅牛扒店，諗住食返餐阿根廷燒牛扒嚟近接２００９啦，沿途見到ｄ舖頭係全部閂晒門嘅，架taxi越行我哋就越驚，因為真係全部閂晒門，終於到咗我哋要去嘅餐廳，老細啱啱喺度落緊閘，有兩隻鬼仲喺門口度唔肯走添，咁我哋車都唔落啦，直去我哋第二個選擇，去到着晒燈，好似開門喎，好，我哋就落車睇吓啦，好失望，原來又係閂緊門，周圍舖頭都已經閂晒啦，諗住Burger King都剎啦，點知都閂埋，想截taxi，架架都唔載客，咁點算，係唔係要行路返酒店吖，跟住仲要落埋雨，使唔使黑成咁呀！

咩都唔諗啦，淨係想拿拿聲返酒店餐廳求其食ｄ嘢啦，幾經艱苦先截到架taxi，不過個司機好奇怪，著住件爛鬼T恤，再加條格仔起毛頭短褲同拖鞋，仲有個超級蓬鬆頭，直頭係全套睡衣look，上車仲唔記得落錶，到我哋落車時佢先醒起，佢係完全唔清醒之下車我哋返嚟酒店，不過算啦返到嚟都唔錯啦！

我哋６點返酒店餐廳，求其點咗ｄ嘢食，諗住呢間酒店都唔會有咩好嘢食架啦，我哋入去餐廳時仲俾個waiter發我哋脾氣添，不過算啦，都明白嘅，佢哋等放工去威吖麻，我都最唔鍾意人哋阻住我收工！咁我哋都好識做，大概６點８就食晒埋單，等佢哋多ｄ時間執嘢收工！６點半時有２個鬼佬想入嚟食嘢，佢哋都唔做佢哋生意，連話買走都唔得，見佢哋個樣都好無奈同徬徨，今晚佢哋唔知揾唔搵到嘢食呢？我哋都算執返個尾彩啦！

我嘅薯溶＋牛扒，又出奇哋好食喎！HK$80.00

毛爸嘅豉油雞胸肉，個豉油汁幾好喎，唔知係咪因為好耐無食過豉油，好掛住嘅原因呢！HK$70.00    　　　

沙律都唔錯，今晚算好彩有得食仲要幾好味！HK$50.00

無事做嘅晚上就梗係攞ｄ毛毛嘢出嚟睇吓啦，點知原來毛爸連BB同安安張年曆卡都帶埋嚟喎！小狗們，好掛住你哋吖！

Hotel : Dazzler Suites Arroyo Hotel
Address : Suipacha 1359, C1011ACC Buenos Aires
Telephone : (54-11) 5276-7700
Fax
Price/night
URL : http://www.dazzlersuites.com/esp/
e-mail : reservas@dazzlersuites.com