符符碌碌

2007年12月同小毛毛去完伊豆返嚟，一心已經諗住同小毛毛係2008年4月再戰日本，但第一日返工老細就話我知，停咗7年嘅升級試會開返啦，俾幾日時間我諗吓去唔去考，如果去嘅話佢會做我提名人喎(好似選港姐咁)，其實自己唔係幾想去嘅，因為覺得考到嘅機會唔大，停咗7年，都諗到有幾多人爭啦！所有去考升級嘅要求我只係啱啱達到最低嘅標準，而且知道要考２次筆試同２次面試，未來４個月仲要搞毛毛旅行嘅手續同寫毛毛本旅遊書，應該會好忙，未必有時間讀書去應付考試同面試，而且我哋去旅行放假嘅日子好大機會撞正筆試日期。

點知俾毛爸話我唔進取(我識你嗰日都已經係咁架啦)，ｄ同事又話有機會點解唔試吓，係咪咁就白白浪費咗個機會吖，最麻煩係個老細成日係度”依依俄俄”叫我去，最後我決定好啦我去，不過我無時間讀書架，一切以旅行手續行先，有時間先做其他嘢，如果撞期，一定係同毛毛去旅行唔考試，講晒我所有原則先報名，所以係２月份我已經晒假，費時到時俾人話我玩嘢！

好好彩所有筆試同面試都無撞我哋去旅行嘅日子，但係嗰段期間我係無時間去準備考試嘅，諗住得就得，唔得就算數啦，橫掂都機會唔大嘅，歷時半年嘅升級試終於有結果啦，我竟然得咗，諗咗好耐到而家都唔明點解得，有時覺得運氣真係幾重要！

星期二晚成班同事同我去麗豪嘅意廊慶祝！

麗豪酒店 意廊 意式六道菜燭光晚餐

煙鴨胸蘆筍卷

南瓜忌廉湯配洋蔥絲

迷你魷魚長通粉配香草茄醬

精選鮮果雪芭　　　　　　　 

芝士焗大蝦

扒和羊柳配芥茉籽燒汁

炭燒西冷扒配野菌忌廉汁 (唔記得影，係小吉個blog度借嘅相)

草莓慕絲配芒果(唔記得影，係小吉個blog度借嘅相)

咖啡或茶 (唔記得影，係小吉個blog度借嘅相)

你睇吓小毛毛都替媽媽開心吖!

毛爸送比我嘅禮物(原本我以為無機會收架)!