2009日本東北之旅 - Day 6

乳頭温泉鄉 →田沢湖 → 小岩井農場 →志戸平温泉

朝早起床，梗係有ｄ嘢做嘅，一個咁靚嘅溫泉浸一次又點會夠呢，而且噚晚都未浸混浴，淨係唔覺意行咗過去望吓咋，不過天黑黑咩都睇唔到！今朝再去過！　　　　　　　

入到去一個人都無，仲好，俾我影到夠！

今日目標係混浴，呢個露天溫泉係正，不過都唔浸啦，向目標出發！

第一站係貸切風呂，噚晚已經浸咗一次，不過天太黑影唔到相同睇得唔係好清楚，今朝再嚟，嘩！原來呢度靚成咁，再浸！

人哋係度影相，有ｄ人就搞搞震，伸隻嗅腳出嚟唔知想點？好地地一幅相就俾佢搞喎晒！　　　　

呢幅無咗隻嗅腳係唔係靚好多呢？　　　　　

搞咁耐終於肯正正經經影返張相！

浸完貸切風呂，轉戰混浴啦，混浴個景係咁多風呂之中最靚架，毛爸噚晚已經話要去見識吓架啦，去咪去囉，我哋女士們係可以圍毛巾嘅，你哋蝕低架咋！

車！點知過到去一個人都無，又係得我哋兩個包場浸....

呢個毛爸勁鍾意呢度，浸到唔願走，催咗佢幾次都話要浸多陣喎，仲話下次嚟要再住呢間，下次？幾時先？book呢間就無難度啦，你話嚟我咪幫你book囉！　　　　　　　　　　

幾時多咗個越南仔喺度浸架？

浸一浸，額外醒神，去食早餐啦！

好豐富呀！　　　

今日我要向我嘅味覺挑戰，一向鍾意和食嘅我都係接受唔到納豆，但呢餐個納豆好似好吸引，ｄ日本人咁鍾意，一定有佢嘅特色嘅，榴槤我都係試吓試吓咁而家食到啦，納豆難唔到我嘅～～～

估唔到呢隻納豆好好味喎，不過ｄ豉油就咸ｄ，用咗成碗飯先送到半碗納豆，但今次係好嘅開始，下次我會再試！　　　　　　　　　

又全部掃晒！

仲有杯靚靚嘅好味咖啡，一個完美嘅早餐！

喺餐廳望出去，個巴士站又係唔見咗一大半......

食飽飽向田澤湖進發，今日出車終於都唔落雪啦！

田沢湖畔　ホテル湖心亭 (Tel: 0187-43-0721) (Map code: 280834844 )
〒 014-1204  秋田県仙北市田沢湖田沢字春山135 

田沢湖（辰子像） (Map code: 280766346 ) 秋田県仙北市西明寺潟尻  

喺湖邊竟然見到一間秋田犬見學所，唔知毛毛有無機會嚟呢度見學呢？

遊完湖我哋就準備去小岩井農場，而途中就經過一個道之駅

買咗ｄ好特別嘅手信，呢度有好多關於銀河鐵道餅餅同蛋糕，仲要係呢個道之駅限定架！　　　　

話咁快就咗小岩井農場啦！

小岩井農場 (Tel : 019-692-4321)
http://www.koiwai.co.jp/
営業時間 : 9:00-16:30
〒020-0507　岩手県岩手郡雫石町丸谷地36-1

不過冬天好多設施都閂咗，無咩睇，咁我哋唯有又去食飯囉！

一個普普通通嘅午餐！

加一個好可愛嘅小朋友～～～

一個咁普通嘅午餐又點會滿足到我哋呢，再去買鮮奶同chesse cake食！

東北４點就開始天黑，所以要起程去今晚住嘅酒店志戸平温泉啦～～～

由小岩井農場 去志戸平温泉途中經過一間JUSCO(TEL : 019-605-37000)，無特別，淨係買咗ｄ士多啤利，呢個商場連一間賣寵物嘢嘅舖頭都無，可以不去！

小岩井農場 → 志戸平温泉 (59.9KM  1時15分 1,150円 IC38.3 KM)

今日係平安夜，特登揀咗間好ｄ嘅溫泉酒店過一個好好地嘅平安夜，舊年嘅平安夜我哋喺係飛機度度過架！

Check-in時有茶點招待～～～

房間好大，而且係一層半嘅設計，好鍾意！

酒店仲每人送咗一份聖誕禮物俾我哋，估唔到會有禮物收喎，今年毛爸事先已經同我講咗未諗到買咩禮物俾我，又無時間去買，叫我唔好諗住會有禮物收，而家ｄ人真係吖～～～　　　　　　　　

我哋間房仲有私家溫泉架～～～

不過食飯前都係去大浴池浸吓先，自己嗰個留返聽朝先浸啦！

影得相，當然又係包咗池啦！

今日晚餐名稱係和氣路，睇個餐單咁長就知今晚一定有排食啦．．．

呢幅圖畫晒我哋今晚食嘅嘢，好特別嘅一餐～～～

晚餐正式開始啦！

每一樣餸都好好食，仲要好有創意，好多都係我哋未試過嘅配搭...

右手邊嗰款炸蕎麥麵你係估唔到可以咁做，亦估唔到可以咁好食！

 

 

 

呢兩款天婦羅，一碟係長腳蟹，一碟係蝦，但最特別嘅係綠色嗰件，佢係用柿加綠茶粉炸，原來呢兩種材料可以咁夾，咁好味架喎！

 

 

主角出場啦，燒前沢牛，侍應姐姐教我哋加啲Wasabi上面會更好味，起初我哋驚好辣，放少少試吓，噢！原來一ｄ都唔辣，係好好好食架！

之後嘅燒前沢牛就變成咁樣食啦！

仲有一款少有係日本料理度出現嘅菜式就係沙律啦，係日本食晚飯好少會有沙律出現，而呢款蘋果沙律份外清甜，唔知又用咗ｄ咩調味料呢?

最後再嚟一碗香噴噴嘅蟹飯加勁好味嘅麵豉湯同漬物，真係難以抵擋，我全部掃晒！　　　　　　

毛爸呢.........就仍在努力中..............

最後放棄咗半碗蟹飯，雖然碗蟹飯好好食，而且佢不斷向我揮手，但實在無能為力，我個肚皮已經去到極限，我對你唔住啦蟹飯～～～

好在甜品係生果同Sorbet啫！　　　　　　　　　

 

食飽就瞓啦，曹豬呀！

呢間酒店勁正，推介呀！http://www.shidate.jp/about/guest2.php?eid=00263

志戸平温泉　游泉　志だて (Tel : 0198-25-3939)
http://www.shidate.jp/
〒025-0244 岩手県花巻市湯口字志戸平11-2
1部屋： 22,000円 × 2名 =  44,000円  (1泊2食)