2009日本東北之旅 - Day 1

香港 → 東京 → 磐梯熱海温泉

交通 CX 504 HK-TOKYO NARITA (0905-1400) 03HR 55MIN  今次陪我哋去日本嘅毛毛玩具係隻聖誕豬仔！　 今日以為好好彩早咗半個鐘頭到東京，２點半已經可以去到Toyota Counter攞車，點知人算不如天算，Toyota竟然無晒雪呔，幫唔到我哋架車換雪呔，我哋準備去ｄ地方全雪地，無雪呔點搞？好在嗰位日本姐姐肯幫我哋轉第二間公司嘅車，喺佢努力下幫我哋搵到一架Nissan嘅1500cc車仔有雪呔，但要等成個半鐘先可以送到機場，無計啦，唯有等，大家都好無奈～～～ 成３點半先喺機場食lunch，求其食咗ｄ嘢醫吓肚先啦！　　　 成田空港 → 磐梯熱海温泉 (268.4KM  4時38分 5,200円 IC - 224.6KM) 終於４點半先攞到車出發，我哋一直揸咗成個鐘頭，個GPS都仲未帶我哋上收費道路，一直行ｄ國道，搞到我哋好疑惑，平時我哋喺成田機場出發，好快就可以上到ｄ收費道路，新車種加上新GPS＝信唔過，所以中間我哋停過幾次，重新入過ｄ資料但結果都係一樣，最後我哋停低問人，自己再揾路上收費道路，但嗰陣已經係６點９啦，毛爸就好努力揸，希望可以追返ｄ時間，中間只係停咗一個休息站，買咗第一份手信俾毛毛就無停過啦～～～ ２百幾公里，由天光揸到天黑，有無雪揸到落大雪，晚上９點鐘終於到咗酒店，但係餐廳已經閂咗，即係我哋今晚定嘅晚餐無得食啦，蝕咗！　 好在仲有間居酒屋未閂，如果無係今晚就要”扎炮”啦！　 我食蕎麥麵，而毛爸就食拉麵！　 食完休息一陣就去浸溫泉，呢度個溫泉好正，淨係室外已經有６款俾你浸，無奈到得太遲，未能好好享受，第一日就咁唔順利，難為毛爸仲笑得出！ 後記：我哋之後查過地圖，發現個GPS無錯，成田機場的確係要行好一段國道先可以連接到”常磐自動車道”，係我哋錯，唔信佢先搞成咁，功課做得唔夠，下次要小心ｄ先得啦！

磐梯熱海温泉　ホテル華の湯 (Tel : 024-984-2222) http://www.hotelhananoyu.jp/ 〒963-1387　福島県郡山市熱海町熱海5-8-60 1部屋： 14,000円 × 2名 =  28,000円  (1泊2食)