第八天: 東京→成田→香港
真係話咁快就到咗第８日，真係十萬個唔捨得！
早餐係我鍾意嘅日式早餐～～～
小朋友今日要搭機，食埋早餐同佢哋去酒店嘅dog run放下電，等佢哋一上機就可以覺覺豬，時間快ｄ過～～～
玩咗一個鍾，返房洗乾淨ｄ腳仔，10點鐘準時出發去機場啦～～～
Suiran Green Park → 日本通運株式会社 (Tel : 0476-32-8011)***(61.3KM 58分 1,750円 IC-59KM) @1:00 pm 一般道路 45.9KM 1時40分
11點已經到咗日本通運株式会社，不過我哋要去動物検疫所成田支所做咗檢疫先，嚟咗日運先喺因為佢旁邊有座停車場，可以泊低架車先！
日本通運株式会社 → 動物検疫所成田支所-検疫第1課-貨物事務所 (Tel : 0476-32-6655) @11:30 am ***步行５分鐘
首先要經過一個閘口，需要填張入閘紙先可以通過，張入閘紙要keep好，俾動物検疫所吸返個印，出閘時需要交回架～～～
好可愛嘅招牌呀！
準時11:30到咗，最重要嘅文件交收時間，要打醒12分精神，唔可以有嘢錯！
交晒ｄ文件就等獸醫同毛毛，歡歡檢查身體啦～～～
呢個就係獸醫叔叔啦，body check話咁快就覺掂晒～～～
12點3已經攪掂檢疫手續，下一站去日本通運攪埋ｄ貨運手續～～～
首先梗係要交低ｄ路費先啦～～
歡歡：乜要咁多張銀紙架？
攪掂晒ｄ手續就可以同兩位小朋友去便便同行一陣，一點鐘先要再交返兩位小朋友俾日運，行得攰攰地又未夠鐘，我哋又返上車休息一陣，總之拖到最後一分鐘先交狗啦！
毛毛乖呀，要坐飛機返屋企啦，一陣媽咪會喺香港接返你，知道嗎？
坐穩機啦兩位小朋友～～～
還車 - Toyota 成田空港[東京] at 2:00 pm (Tel : 0476-32-1020)
CX 521 TOKYO NARITA - HK (1700-2040) 04HR 40MIN
話咁快就飛到返香港，我哋班機本來話會早到，點知又遲咗大半個鐘先到，好在毛舅父手車勁又熟路，好快就車我哋去到超級一號貨運站，不過我哋去到時文件未到，又要等，好心急，因為仲有廿分鐘漁農處就交更，如果趕唔切喺佢哋交更前去到，就要等多半個鐘先接得返兩隻小鬼架啦～～～
一攞咗文件，毛舅父幫我去交文件費同交提單，我同歡媽歡爸用９秒９時速跑去漁農處，交更前５分鐘成功到達！不過漁農處ｄ人就黑晒面囉～～～
我每次帶毛毛去日本毛舅父都會嚟接我哋機，因為佢熟晒成個提貨過程，所以我可以好專心去漁農處攪手續，其他所有嘢毛舅父都會幫我攪掂晒，而帶寵物去旅行返香港提貨呢一part都全部係毛舅父教我架，所以我同毛毛都好鍚毛舅父架！
今次唔駛清關，嘟埋晶片就走得！
開開心心返屋企啦～～～
毛媽, 好詳細呀!!! 其實呢個亦都係我最關注既一環, 因為最怕佢地返唔到黎!!!
回覆刪除[版主回覆12/03/2010 23:45:00]就係知好多朋友仔好担心呢一 part，所以特登影多ｄ相同細節！
絕對同意！我今次第一次帶牠是札幌機場唔係成田機場，有沒有詳細資料呢？真的好驚有咩錯漏．．．同埋真的唔sure個location!
回覆刪除另外見您們個籠好像剩係舖塊毛巾，究竟需唔需要再放塊穿窿版加尿片在底呢？請問有沒有規定的？
[版主回覆12/03/2010 23:53:00]札幌機場比成田機場簡單好多，札幌機場嘅動物檢疫局入境同出境喺同一個地方，所以唔使驚揾唔到！
無特別規定，我哋會放一張放滑地毯喺底，上面再舖軟毯，等佢哋瞓時可以舒服ｄ！
回覆刪除藍天白雲加咁大塊草地, 毛毛同歡歡一定跑得好開心啫!
毛媽, 你成個 trip 的資料真係好詳細呀!
[版主回覆12/03/2010 23:58:00]係呀，佢兩隻小鬼嗰朝玩得好鬼開心呀！
盡量架咋，希望幫到ｄ想帶小朋友去日本嘅家長啦～
未試過呢d手續,大開眼界.
回覆刪除[版主回覆12/04/2010 00:05:00]你成日帶我去睇咁多嘢，我都要交返少少貨嘅！
回覆刪除毛毛一定會話: 番香港喇, 唔知幾時再嚟過呢?
[版主回覆12/04/2010 00:06:00]佢話唔想走添呀！
真係好多銀紙喎！乜ｄ手續費咁乸利？！
回覆刪除[版主回覆12/04/2010 00:09:00]要咁多銀紙咪又係因為我哋偉大香港政府囉，一定要當佢哋係貨咁運返香港，如果可以俾我哋當手提行李帶佢哋返嚟，費用係呢度嘅５分１咋！
死啦!! 返嚟都有咁多嘢要搞, 真係唔知得兩個人搞唔搞得掂...... 好擔心......
回覆刪除[版主回覆12/04/2010 00:11:00]唔擔心，小心ｄ一定得，咁多人都去完返嚟啦！