2010 狗狗日本東北賞楓之旅(Day 4)

第四天:  裏磐梯高原  → 檜原湖→五色沼

一早起身，天色灰灰暗暗，有ｄ煙雨淒迷嘅感覺～～

晏少少又清返ｄ，希望今日俾我哋見到太陽伯伯啦～～～

毛毛你起身啦，我哋一齊出去花園食早餐囉～

呢間酒店係我好鍾意嘅小木屋+樹組合！

坐喺花園抱住毛毛食早餐又係一個好特別經驗～

早餐個三文魚＋三文魚子蒸飯好好味呀，連好怕腥嘅兩位爸爸都食晒！

四季の森山荘→裏磐梯観光協会(Tel : 0241-32-2349) ***(10.7KM  23分)

食咗個咁豐富嘅早餐，係時候去消脂啦，今次我哋揀咗去行五色沼自然探勝路(全程1小時10分)

入口有兩個選擇：
裏磐梯物產館旁邊(Tel : 0241-32-3751)
裏磐梯観光協会旁邊(Tel : 0241-32-2349 )--->今次我哋揀咗呢個起步點

如果無揸車可以一面入，喺另一面走，不過我哋揸車仲帶住兩個小朋友，所以唔會行晒，大概行一半就會返轉頭，因為唔想ｄ小朋友太攰，仲有好多日玩架麻！

紅色就係我哋今次要行嘅路線～～　　

我哋行咗唔使５分鐘就俾呢個咁靚嘅景色迷住咗，每樣嘢都有佢自己嘅顏色，加埋就變成咁靚啦～～～

D水咁靚，養ｄ魚都大條ｄ，有ｄ仲大過毛毛同歡歡架！

歡歡：你點解會大隻過我架？我屋企ｄ魚魚好細條架喎！

兩隻Dog model 一停，個個都攞部相機對住佢哋，不過兩隻小鬼一ｄ都無怯場，任影唔嬲呀～～～

毛毛：媽咪，想食魚魚呀！

你哋有咁多靚相睇就係靠呢兩位攝影師啦～～～

毛毛：我準備好啦，出發囉～～～

毛毛：點解咁快又俾人捉咗上嚟影相嘅，唔係行山咩？

毛毛今次好叻女，大部份時間都係自己行，無扭計，今日俾100分佢！

哎呀！唔記得佢行咗好耐都唔肯飲水，俾媽媽打水針添，要扣分呀！

 

小毛毛百厭嘅一面大家好少睇到～～～

咁靚嘅風景真係唔捨得走，我會再嚟架！

廿四考爸爸，歡歡行完山，爸爸即時幫歡歡清理毛毛裡面ｄ草，仲梳返靚ｄ毛毛，咁嘅爸爸去邊度揾呀！

毛毛：呢ｄ就係我喺日本成日都遇到嘅情景，友誼小姐真係唔易做架～～～

當我哋中午揾食之際，俾我哋見到個街邊檔，今程呢幾個moli鍾意掃街，又唔放過，埋去睇吓，又係什菇湯!!!!!午餐有著落啦，４個人食咗５碗(我同毛爸食咗３碗）　　　　　　　

100円一碗，超多料，好好好好......味！再去7仔買個飯糰同嘢飲，４個人千幾円食個lunch好抵呀！我仲發現我同歡媽食嘢口味好似，坐埋一齊食飯真係會爭餸食架～　　　　　　　　

飽飽啦，可以繼續去玩啦，中途經過ｄ地方都好靚，失驚無神我哋就會停車影影影......             

下午我哋去坐纜車上西吾妻山睇紅葉～～～

gran deco resort
http://www.grandeco.com/panogon_golf/information.html
〒969-2701 福島県耶麻郡北塩原村桧原荒砂沢山
TEL 0241-32-2530

未上山已經靚成咁，一定要上去啦！

張飛好靚架！（成人來回票價1,500円，狗狗來回票價500円)

毛毛同歡歡都有自己嘅乘車劵架，仲要上車唔使入袋，真係無得頂！

毛毛：好高呀！

山頂其實仲有好多地方好靚可以慢慢行，但我哋太遲上山唔夠時間行，如果大家諗住嚟呢度最好預足半日，我哋２點幾上山，但纜山收四點半，所以唔敢行咁遠！               

就連山腳都靚成咁～～～

玩咗成日毛毛攰到支持唔住扭人抱啦，但係我哋仲有一個景點噃........

小野川不動滝，因為我哋就嚟天黑毛去到（講緊都係４點幾５點），行到一半路見ｄ人都已經回程，之前又聽新聞最近有熊出沒，於是行咗一半就返轉頭（全程大約要行２０分鐘），咁就算啦，喺門口影返張相，個小野川不動滝留返下次睇啦～         

         

一日行程就此完畢，又係時候返酒店嘆世界啦～～～　　　

飯後當然要浸一浸啦，歡歡都一齊嚟！

毛毛：你哋攪咩呀，日日沖涼攪咁耐嘅？

毛毛：我瞓陣先啦，你地沖完叫我啦！

今日毛毛好叻，行咗一日山，手仔同腳仔一定好攰，好在帶咗個私家按摩師嚟，可以鬆一鬆！

毛毛：大力ｄ唔該～～～

毛毛：按完腳仔好舒服，我瞓先啦！

小さなホテル四季の森山荘
(Tel : 0241-33-2468／ Fax：0241-33-2460)
〒 966-0401 福島県耶麻郡裏磐梯高原桧原湖畔
http://www.sikinomori.com/
1部屋： 10,000円 × 2名 =  20,000円  (1泊2食), 小型犬1,000円, 駐車場-無料