2010 狗狗日本東北賞楓之旅(Day 3)

第三天: 日光湯元温泉 → 裏磐梯高原

食一個豐富早餐係一天嘅好開始～～～

呢間酒店有狗狗露天風呂架，不過天氣凍，我哋就影吓相就算啦，冷嚫唔得掂呀！　　　　　　　

影埋張大合照就出發啦～～～

鬼怒川公園就係酒店附近，當然要去跑一轉先走啦！

成個公園得嗰幾個人，真係爽，小朋友你哋慢慢跑啦～～～

毛毛玩到條尾都飛起～～～

歡歡直情係一隻電兔，無停過呀！　　

毛毛：啊哈......我要飛往天上，啊哈......像那天鳥翱翔......

日本保護環境做得好好，就連路邊嘅野花都咁靚！

玩到差唔多10點，出發去下一站猪苗代湖啦～～～

鬼怒川温泉→磐 梯 観 光 船 株 式 会 社 長 浜 営 業 所 (Tel : 0242-65-2100) ***(164.7KM  2時53分 3,650円 IC-139.9KM) 一般道路  117.1KM  4時12分
 

中途見到呢d地方，我哋一定會叫停，好多時都會有好嘢發現架！

今次見到有什菇烏冬，100円一碗，菇同烏冬都係我至愛，一定要食啦！

見到我個樣你都知有幾好味啦，好幸福呀！

食飽繼續我哋嘅車程啦，長車程最好嘅活動，當然係瞓覺覺豬啦～～～

中途休息站放ｄ小朋友去便便時，毛毛都仲未瞓醒呀～

話咁快就到咗豬苗代湖，不過天氣差仲好大風，我哋影咗張相就去食lunch～

附近無咩想食，咁就去咗７仔買杯麵同飯糰食，凍凍地，雪碗麵，正！

豬苗代湖→ 小さなホテル四季の森山荘 ***(30.5KM  46分 730円 IC-16.3KM) 一般道路  31.8KM  1時6分

食飽又繼續啦，喺呢段路上，我哋見返太陽伯伯，而且風景又靚，站站停，都玩咗好耐先到酒店呀！

見到少少紅葉都唔放過，影影影.....

中途真係唔記得停咗幾多次先到酒店，我哋到酒店時已經天黑啦！

我哋房望出去，個景一流！

房都好舒服好乾淨不過就細ｄ～～～

呢間係”pet宿.com ”2009年由住客投票選出嚟嘅最佳可以同狗狗一齊住嘅酒店，呢度環境、服務、食物質素，人同狗狗都好好，但有一樣嘢另到我哋好唔滿意，就係唔可以帶埋毛毛同歡歡一齊食飯，你所有嘢好都好啦，唔俾我哋帶埋佢哋一齊食飯我就會減晒你ｄ分囉！

而且我訂酒店前一定會睇清楚佢俾唔俾帶埋小朋友一齊食飯，如果唔得，幾靚都好，我情願唔住囉，呢間佢個網站喺無寫嘅，佢哋張飯枱旁邊都有用嚟扣狗帶嘅扣，但點解唔俾我哋帶埋小朋友一齊食飯呢，我哋諗咗好耐，可能係晚餐食火鍋，驚小朋友有危險～

最後我哋決定分開食，媽咪們食先，爸爸們食尾圍，咁ｄ小朋友就有人陪，但我哋一team人嚟架麻，分開食唔開心喎！

毛毛等爸爸食飯時等到蓋眼瞓呀～～～

食飽飯，休息一陣就去浸浸啦，當然要帶埋毛毛啦～～～

有室內池～～～

室外池～～～

毛毛都要洗腳仔同抺身身～～～

攪掂毛毛，放佢喺個籃籃度，佢就乖乖喺度等，好乖乖呀！

等等吓仲瞓咗添呀！

爸爸媽媽浸完佢又起身啦～～～

今日喺宵夜有生果食！

我哋仲請埋呢度嘅老板們一齊食架～～～

跟住仲同佢哋ｄ狗狗一齊玩咗好耐先返房瞓～～～

佢又係叫毛毛呀！

毛毛：早抖啦各位～～～

小さなホテル四季の森山荘
(Tel : 0241-33-2468／ Fax：0241-33-2460)
〒 966-0401 福島県耶麻郡裏磐梯高原桧原湖畔  
http://www.sikinomori.com/
1部屋： 10,000円 × 2名 =  20,000円  (1泊2食), 小型犬1,000円, 駐車場-無料