2010 狗狗日本東北賞楓之旅(Day 5)

第五天:    裏磐梯高原  → 那須

噚晚我哋買咗幾樽奶諗住食早餐時飲，點知原來房係無雪櫃架，咁我哋就咁放咗佢喺窗出面，今朝起身睇吓佢有無事先......嘩！好似仲凍過雪櫃攞出嚟喎，噚晚出面一定好凍啦～　　

呢個傻妹，好似媽咪捉小朋友起身返學咁，唔願郁呀！

出面凍吖麻，要著好衫先出得去架！

毛毛仍然未瞓醒，影相都仲瞓緊，不過唔緊要啦，今日有長車程，一陣上車再瞓啦！　　　　　　

毛毛：我瞓醒啦，大家食飯啦！

我最愛嘅日式早餐～～～

今日要離開呢個咁靚嘅裏磐梯高原啦，真係好唔捨得架！

食飽早餐去下一站那須動物王國啦～～～

四季の森山荘 →那須どうぶつ王国 (Tel :  0287-77-1110) ***(131.8KM  2時21分 3,230円 IC-97.5KM) 一般道路  104KM  3時44分

那須どうぶつ王国 (Tel :  0287-77-1110)
営業時間： AM9:00～PM17:00 駐車場-無料
http://www.nasu-oukoku.com/
〒329-3223 栃木県那須郡那須町大島1042-1
入場料金： 大人1,800円  狗狗免費

毛毛：Daddy買飛買咁耐架，我好心急入去玩呀！

毛毛：咩嚟架？我未見過嘅？

那須動物王國分開兩個山頭，入門口呢邊比較多地方唔俾狗狗入，而另一邊山就大部分地方狗狗可以入，而且仲有兩個dog run，一個係全犬用，一個係俾小狗用！

要過另一面山可以選擇坐毛毛身後面，王國提供嘅免費接駁巴士，或者坐吊車，不過吊車係收錢嘅！（每位300円，狗狗免費）

帶住狗狗嘅仲有專車架，佢ｄ位係特別闊，方便帶大狗嘅朋友！

而俾人坐嘅車車，佢哋都包裝到好靚靚架！          

呢度仲有BBQ場地，可以帶埋狗狗一齊喺度BBQ架，我哋經過時聞到流晒口水，本來諗住晏ｄ過返嚟食lunch架，點知...........（睇落去係就知架啦）

無邊無際嘅草地，正！

今次我哋揀咗俾錢坐吊車，因為可以同毛毛歡歡一齊坐囉！我哋好抵呀，俾兩個人錢，包咗兩卡車呀，毛毛架私家車坐獨立一卡落去呀！

呢張相得來不易架，話說有人喺我上次去北海道坐呢ｄ吊車嗰篇blog度寫”呢D我驚驚

，玩唔到架”，今次佢就俾我哋夾咗佢上車，仲冒住生命危險幫我哋影咗呢張相留念，學歡媽話齋”要好好記住呢一刻呀”！

嗰個人就係歡媽囉～～～

歡媽：好囉，終於平安著陸啦！

歡媽：我又挑戰自己極限成功啦，下次要坐條更長更高嘅！

一落咗吊車，旁邊就有條小溪，而小溪旁就有賣燒魚嘅小店舖，為食兵團又唔抵得，坐抵食食啦～～～

蝦同魚都係500円一條，而什菇湯就係免費任飲！

個蝦同魚都係超新鮮好味，什菇湯更係好味到極點，我哋每人飲咗２碗，之後老板仲請我哋食魚飯，日本米加埋ｄ咁好味嘅魚，真係唔識形容有幾好食呀！我哋食完之後，個發泡膠盒係半粒米都無得淨嘅！呢個lunch又係好抵，４個人食咗２千円，飽飽呀，所以無能力再去食BBQ啦～～～

喺度hea咗成大半個鍾，係時候繼續行程啦！

吊車旁邊有呢ｄ大卡車車我哋上山架，唔使自己行～～～

望返過對面就係BBQ餐廳同吊車站～～～

呢邊山都有好多動物睇，仲可以同小朋友一齊睇架！

毛毛：媽咪你放開我啦，我要去同羊羊打招呼呀！

朋友你係時候去剪吓髮啦.......                　　　                   

食雪糕，今次都俾咗少少毛毛試～～～

最後當然要去Dog run跑返轉啦，個Dog run 大到呢......

由於技術問題，以下ｄ相係有ｄ鬆郁濛，你哋部電腦同對眼係無事嘅，因為影到毛毛玩得好開心個樣，所以都放上嚟囉.........

跑到熱熱，除咗衫衫，跑得再free D！

毛毛跑到四腳離地相，我哋都係第一次影到，好開心呀！

毛毛：呢間shop講到明俾我入架！

那須どうぶつ王国  → Pen Tel Kan Imagine Dog  (Tel : 0287-76-1964) 一般道路  14.8KM  32分

玩到２點幾係時候去下一站啦，返酒店前我哋諗住周圍兜吓，買吓嘢食，中途俾我哋見到有間好大嘅生果舖，今晚生果有著落啦！

再去埋The Cheese Garden買腸同Cheese Cake食，佢ｄ嘢真係好得，之後兩日，我哋每日都有嚟，仲心思思諗辦法點樣可以帶ｄ返HK添～～～

〒325-0001 栃木県那須郡那須町高久甲喰木原2888
http://cheesegarden.jp/
電話：0287-64-4848
營業時間： 商店9am-6pm（冬季至5pm），
cafe 9am-4pm（星期六及日至5pm），餐廳9am-6pm

一車都係嘢都唔心足，係要去買埋牛奶先肯返酒店，好啦，我哋又去埋南ケ丘牧場買奶啦～～～

那須高原　南ヶ丘牧場
http://www.minamigaoka.co.jp/
〒325-0393　栃木県那須郡那須町湯本579番地
TEL：0287-76-2150                    

買完就準備返酒店啦，不過個豬PS又老點我哋，間酒店應該好近，不過兜咗成9個字都去唔到，咁唯有去求救啦，我哋停咗喺間酒店度，叫佢幫我哋講俾我哋住嗰間酒店ｄ人聽我哋唔識去佢哋度，同話佢聽我哋而家嘅位置，佢哋就即刻叫架車嚟接我哋，真係超好服務呀！到我哋到佢酒店時，佢哋仲有３個staff出嚟接我哋添架！             

咁我哋又順利到達啦，我哋一入到間酒店係個個都嘩嘩聲，好鍾意呢間酒店呀！

入房放低ｄ行李就出去參觀，好歐陸味，好靚！

入門口洗腳仔地方，旁邊仲有毛巾俾你用架～～～

俾狗狗同家長玩嘅大廳～～～

飲品Bar，咖啡係24小時任飲，自己去攞就得～～～

狗狗清潔用品，周圍都有，好方便！

介紹住咁多先，夠鍾開飯啦！

為我哋咁精彩嘅旅程飲杯 Cheers.....!

乾杯就有啫，呢３條友仔乾芝士喎！歡媽睇到打冷震呀........

呢度食物嘅份量唔係一般人可以食到嘅，以下所有嘢食都係俾一個人食嘅，碟碟都係香港正常主菜嘅size，樣樣都整得好好食，不過太多啦，食到我哋驚驚啦，我哋４個即時諗如果大食family喺度就好啦，不過我哋都估佢哋食唔晒！

毛毛：媽媽你好飽呀，要唔要幫口呀？

估唔到大家食到主菜仲笑得出～～～

到我哋食到尾聲嘅時間，大廚出嚟同我哋傾計，我哋即時同佢講聽晚個晚餐份量要減一半，仲要少一款前菜，我哋唔想浪費食物呀！

呢間酒店自己都養咗26隻狗狗，呢位係lennon，已經10歲啦，每次我哋食飯佢都會過嚟同我哋講聲Hi架！

佢都會，不過唔記得佢個名啦～～～

食飽飯就係聯誼時間，大家坐埋一齊傾吓計，同人哋ｄ狗狗玩吓，小朋友又各自交流吓，幾咁和諧嘅埸面呀！

食飽，玩飽，係時候去同毛毛浸溫泉啦！呢間酒店好好，有兩間可以帶埋狗狗一齊浸嘅獨立房，而每間房都有人同狗嘅室內外池～

呢個係狗狗室外池，不過天氣凍，影張相算啦，都係浸返室內池啦～

毛毛：媽媽好舒服呀.......

毛毛：有ｄ熱，上水涼一涼先～～～

毛毛：浸完溫泉真係發個夢都正過人嘅，早抖啦各位！

イマジン・ドックス Pen Tel Kan Imagine Dog 
(Tel : 0287-76-1964 , FAX:0287-76-2944)
〒 325-0301 栃木県那須郡那須町湯本656-5
http://imagine.nasunogahara.co.jp/dogs/dogshisetsu.html
1部屋:10,500円 × 2名= 21,000円 (1泊2食), 小型犬1,050円, 中型犬1,575円 
食事：夕食7:00pm , 朝食：8:30am, 有小狗餐供應(但要預訂), 有狗狗溫泉