第一天: 香港 → 東京 →新宿
毛毛第三次遠征日本，雖然係第三次，但原來都係一樣嘅緊張同興奮～～～
有留意準備篇嘅朋友應該知道，今次我哋係同歡家一齊去！大家都已經帶過小朋友去過日本，所以攪起手續嚟都好合拍，而且今次嘅手續都非常順利！
晨咁早5:30就集合，不過大家都精神過返工好多呢，不過小朋友就好似未係醒得晒喎！
由於我哋太多行李，成架貨van都俾我哋裝滿晒呀！
係時間出發啦！
Book咗漁農處6:30，當然我哋準時到啦～～～
我諗呢個牌，個個帶狗狗去旅行嘅家長都一定會影！
行裝三大車！
15分鐘到就攪掂晒，咁我哋就上去Cathay check-in 啦～～～
毛毛 : 哥哥唔該我要check-in，頭等艙呀，唔好攪錯吖！
歡歡 : 哥哥我要窗口位呀，唔該！
由於呢位哥哥唔係好熟手，都攪咗好耐吓，咁我哋無無聊聊時就周圍影～～
攪掂晒就到小朋友磅重啦，毛毛今程運費係HK$990
仲有成個鐘先要交小朋友俾航空公司，於是我哋又去周圍影啦，係機場溜狗真係唔係好多機會架，今日佢哋兩個小朋友係乘客，仲唔影返餐飽～～～
沿途仲有好多人對帶狗狗去旅行好有興趣，不停問我哋ｄ手續問題～～～
最後就同小朋友去埋個廁所就準備上機啦！
毛毛入籠啦，要一陣間先再喺日本見啦！
毛毛：媽咪點解得我一個嘅，歡歡呢？
毛毛：歡歡你去咗邊呀，我揾你吖！
小朋友要準備上機啦～～～
CX 548 HK-TOKYO NARITA (0930-1455) 04HR 25MIN
當大人開始登機時，ｄ小朋友就被送到停機坪，我哋等到final call 佢哋都未上機！
今次架飛機飛得好快，早咗成半個鐘頭到，不過因為香港打風，所以遇到好多次氣流，唔知小朋友喺下面驚唔驚呢？
不過接返兩個小朋友時，見到佢哋個反應就估佢唔係好驚，你哋睇，毛毛仲笑得好開心添呀！
等整行李我哋就要去成田動物檢疫所攪埋ｄ檢疫手續，咁毛毛同歡歡先可以正式入境架！
成田動物檢疫所喺機場出境大堂嘅一幢辦公室裡面，我哋大人要攞晒行李自己行上去，而小朋友就有專人送佢哋上去，所以又要分開一陣啦～～～
歡歡去到日本好開心呀？
攪好晒手續，第一時間同佢哋去個廁所先！
之後ｄ爸爸就去攞車車啦，ｄ媽媽無無聊聊就又周圍照相囉～～～
攞完車，上埋行李，已經係下午４點半啦，我哋要向新宿出發啦～～～
Toyota 成田空港→Hotel N.U.T. ***(73.9KM, 1時19分,2,050円 IC-68.8KM)
由於個GPS又帶錯路，揾吓揾吓，攪到６點幾先返到酒店，呢間酒店比較細，不過可以帶狗又係ｄ咁旺嘅區域選擇就真係唔多，我哋就住聽日嘅行程，所以咁細都揀咗佢，其實帶埋狗狗嚟，住郊區係一個比較好嘅選擇～～～
放抵晒ｄ行裝，小朋友食埋晚餐，我哋就去坐JR啦，兩個小朋友雖然都嚟過日本，不過都係未坐過JR，近近哋坐兩個站去新宿shopping區行吓，食吓拉麵～
小朋友入袋，準備去坐車啦～～～
毛毛同歡歡喺月台留倩影，其實頭仔喺唔可以伸出嚟架！偷雞影架咋！
坐完JR兩位小朋友都唔願出嚟，好似有ｄ攰喎！
我今日全日無飲過咖啡，一見到Starbucks梗要上吓電先啦～～～
毛毛呢，等媽咪嘆咖啡時，瞓咗囉～～～
坐咗一陣，帶埋ｄ小朋友去食拉麵啦！
歡媽話佢自己嚟食時，成日都希望有機會帶埋歡歡嚟食，而家成真啦！
歡歡：點解無小狗餐嘅？
毛毛就攰到呢，等麵時又瞓過～～～
食完麵就返酒店啦，你睇吓隻女，又精神返喎！
回程時無咁多人，我哋可以影到車廂入面嘅情況啦～～～
一返到酒店，洗完腳仔，毛毛就瞓到不醒人事啦，小朋友嘅生活就係咁簡單，有時真係幾羨慕佢哋架，天跌落嚟都有人幫佢哋頂住，我哋大人就唔同，總係有唔同嘅煩惱！
Shinjuku City Hotel N.U.T.S Tokyo
〒160-0022 1-16-5 Shinjuku, Shinjuku-ku, Tokyo
(Tel：03-6908-3566／03-5379-1041 Fax：03-5379-1626)
http://www.hotel-nuts.com/english/index.html
JPY9,800/room ; JPY2,000 /dog/ night ;
Breakfast JPY650/人
Parking JPY1,500
frank豬 : 毛毛, 下次我一定要叫mama帶埋我同你地一齊去先得~
回覆刪除[版主回覆10/31/2010 16:16:00]毛毛：frank豬，咁你要多ｄ鞭策吓你mama先得喎！
小狗在日本真係好快樂呀!
回覆刪除毛毛真係好累呀!
[版主回覆10/31/2010 22:56:00]日本真係好好，所以去完真係又想再去呀！
唔知係咪年紀大咗，今次明顯易攰咗，下次去要操fit毛毛先得啦！
毛毛：有無在空港順便sale下上次mama本書。
回覆刪除[版主回覆10/31/2010 23:05:00]毛毛：無呀！我個喼放咗衫衫同嘢食已經無位啦喎！
Next time if we have chance, Taki should follow you all to Japan, should be very exciting.
回覆刪除[版主回覆10/31/2010 23:20:00]今次我哋差少少就可以喺日本相遇，你下次真係要帶埋Taki一齊去啦，而家魚農處改咗例，驗咗血可以兩年內都去得日本呀，你快ｄ考慮吓啦！
真係羡慕死人呀.
回覆刪除[版主回覆11/01/2010 11:27:00]我夠羨慕你有個咁好精力嘅仔皇囉，毛毛行一陣就會扭抱，真係抱到手軟呀！
佢地真係好幸福!
回覆刪除[版主回覆11/01/2010 11:35:00]我幸福ｄ，有佢哋陪！
毛毛o係Starbucks應該都要飲吓咖啡上吓電 (免責聲明>如果有人真係咁做又出咗事,本人不負責 )
回覆刪除[版主回覆11/01/2010 11:40:00]呢位哥哥，你大教壞細喎......
好在毛毛瞓咗啫，佢聽唔到，聽唔到..........
佢個樣攰到標哂眼水！可能坐飛機太緊張啦！
回覆刪除[版主回覆11/01/2010 20:33:00]仲要朝早５點就起身呢！
毛毛同歡歡緊係開心啦, 因為有得去旅行麻!
回覆刪除毛媽, 除左小朋友佢地既運費之外, 咁小朋友駛唔駛買機票呢?
[版主回覆11/01/2010 20:37:00]佢哋唔駛買機票，不過來回運費費貴過我哋張機票囉！ 回程運費要成５千幾架！
又準備開始追blog攞料啦!!!!!!!
回覆刪除[版主回覆11/01/2010 20:37:00]無問題啦，會盡量詳細ｄ！
出發啦.........>
回覆刪除[版主回覆11/01/2010 20:38:00]好快就返埋嚟添呀！
"5:30就集合，不過大家都精神過返工好多呢" ~~~~~~~~~~~~~~
回覆刪除[版主回覆11/03/2010 20:41:00]呢個係一個好常見嘅返工病嚟架.......
回覆刪除毛毛咁乖乖咁定坐係飛機籠入面, 佢一定非常期待呢次的日本之旅呀!
[版主回覆11/03/2010 20:43:00]梗係啦，有得玩又有人陪足廿四小時！
原來狗狗同人一樣一上車就好容易訓著
回覆刪除[版主回覆11/03/2010 20:44:00]毛毛喺香港唔會架，不過去旅行就會囉，因為太攰啦！
我真係冇諗過帶狗狗去旅行 ,因為我都唔知係邊度可以辦手續 而且我個乖仔太重啦,如果成日揹住佢,一定攰死 但可以同自己"愛犬"乖仔一齊去旅行,一定好"幸福"
回覆刪除[版主回覆11/04/2010 19:27:00]可以同狗狗去旅行真係好開心架，唔使好似自己去時咁心掛掛！其實唔使成日揹嘅，我有帶狗狗車去，平時都係用車多，不過坐JR要上落樓梯太多先唔用車改用揹帶咋！
上次我都係搵到新宿呢間酒店的資料,係市區又可以俾佢地入住
回覆刪除[版主回覆11/06/2010 23:21:00]呢間只係OK囉，下次會試第二間！
毛毛都好enjoy坐飛機喎
回覆刪除[版主回覆11/14/2010 23:57:00]唔知佢en唔enjoy呀，不過睇佢ｄ反應就應該唔驚坐飛機囉！
毛毛媽, 我想問下成田動物檢疫所喺機場出境大堂嘅一幢辦公室裡面，咁我坐 CX 響二號客運大樓, 係同一幢定係另外一幢辦公樓呢, 仲有個日打算男丁去攞車, 女士去搞狗狗入境手續, 通常你地會響邊樹集合嘅呢 ?
回覆刪除[版主回覆08/01/2011 14:51:00]係另外一幢,但同出境大堂係連住嘅,到時佢有張地圖指示你點去唔洗擔心!
通常我哋會喺停車場等!
知道了, 唔該曬 , 毛毛媽.
回覆刪除[版主回覆08/02/2011 18:33:00]You are welcome la!!