2010北海道家族之旅 (Day 7)

美瑛 → 占冠村

非常豐富嘅早餐，每樣食物都好新鮮，好好味，一個"正"早餐令我哋有一個好好嘅心情去開始一天嘅行程～～～

美瑛 →Tomamu Alpha Resort (0167-58-1111) 一般道路  101.3KM  3時30分

今日我哋會去一個好少香港人會去嘅地方Tomamu，點解會去呢個地方？就係因為一張相，一張喺旅遊雜誌裡面嘅相，賣吓關子，第８日行程你就會知！

其實日本ｄ咖啡對我嚟講係太淡，我比較鍾意意大利咖啡多ｄ，今次喺休息站買咗一罐Asahi出嘅咖啡，味道唔錯呀，唔知係唔係加咗ｄ啤酒落去呢，但之後都無再見過有得賣啦～～～

我哋沿途經過嘅都係田，大部份係種洋蔥同薯仔，仲有ｄ栗米同蘿蔔田，一籃籃嗰ｄ係收成嚟架～

喺毛爸停紅綠燈時俾我見到呢間 ”森の駅”(Tel : 0167-29-2056) 即刻叫毛爸轉入去，噚日買唔到粟米唔憤氣，所以呢ｄ似有嘅都唔會放過，一定要買到為止！

哈哈哈....皇天不負有心人呀，俾我揾到呀，仲要平好多，噚日係300円一支，呢度138円咋！富良野粟米有兩種，一種可以生食，一種唔可以生食，而可以生食嘅係貴ｄ架，唔好搞錯呀！

平咁多令我有ｄ懷疑會唔會無咁好食呢，於是我哋買一支試吓味先，測試結果係”一樣咁好味”呀！掃貨，我話買20支，毛爸唔信，問咗我３次先幫我翻譯呀！咁真係好好味，又好抵吖麻！　

食完粟米，見到ｄ蜜瓜都好平喎，本來諗住最後一日先喺夕張買，見ｄ瓜又平又靚都唔抵得買咗一盒(6個)～～～

架車個行李箱，塞到就嚟爆啦！

懷住超滿足嘅心情繼續趕路啦，中途見到ｄ樹好得意，好高但好瘦，唔通ｄ樹都興減肥？？？　　　　　　

個GPS又帶我哋行ｄ古怪路，你哋見呢條路好地地呢，原來條路淨係開5-10月架咋，冬天係會封路架，而且再開前ｄ係一條單線雙程行車嘅石仔山路，我同毛爸見到咁即時掉頭走啦，成車人架，唔同你博啦，又係我呢個領航員工作嘅時間啦，我哋自己睇地圖，兜個大圈去Tomamu，都係安全ｄ好！

中午時分到咗酒店，12點幾唔知可唔可以check-in呢?

今日天氣好差，又有雨又有霧，唔知聽朝會唔會係咁嘅天氣呢？聽朝係重點行程嚟架，希望好天啦！

呢間好好呀，１２點幾都俾我哋check-in 呀，我哋今次揀咗只會係夏天先會開放嘅The Galleria Tower Suite Hotel ，好正呀！

放抵行李就出去揾食，不過呢度揾食艱難架，除咗酒店餐廳咩都無架！咁我哋去咗cafe度食，原來都幾好味架喎！　　　　　　　　

食完午餐我哋就諗住去附近嘅村行吓同睇吓晚餐食咩好啦，出到去先知呢度咩都無架，便利店都要揸半個鍾頭車先有呀！

呢個就係Tomamu火車站，真係人影都無個架～～～

我哋揸揸吓車見到一條路，原來呢條就係今朝GPS帶我哋行嗰條路嘅出口呀！

揸咗半個鍾頭車，終於到咗另一個火車站”占冠駅”，呢度舊就舊ｄ，但起碼有嘢食賣吖！　　　　　

呢個就係占冠嘅市中心，有圖書館同政府辦公室，仲有食店！

因為我哋今晚係唔包晚餐，而又唔想再揸半個鐘車出嚟食，我哋就度買埋今日嘅晚餐同第二日嘅早餐～～～

返到酒店雖然只係４點幾，但都已經開始天黑啦～～～

喺呢ｄ無無聊聊嘅時間，等我介紹吓我哋間房先啦！

呢個單位有兩間房，一大一細，其實兩間都好大吓，每間都大過普通酒店房！

個廳更大到得人驚，我開晒所有唿喺度執嘢都仲有好多地方行！

個浴室就最正啦，有個超級大嘅按摩池，足夠６個人一齊坐喺度都唔會迫，我伸直晒手腳都掂唔到對面池邊，仲有個無敵山景添！

浴室入面仲有間小形Sauna房，設備真係好齊全架！

介紹完啦，毛爸你係咪好滿意呢，笑得咁開心嘅！

我哋嘅晚餐係飯糰，杯麵同生果～～～

大家都沖完涼，浸完按摩池就開飯啦～～～

食飽仲有飯後果～～～

食飽９點就瞓啦，聽朝要５點起身呀，仲要睇吓天氣好唔好先知可唔可以睇到我哋想睇嘅嘢，酒店話睇到嘅機會係５０％，叫我哋聽朝５點起身睇酒店嘅電視頻道公佈喎！

Tomamu Alpha Resort (0167-58-1111 / 0167-58-1122) 
http://www.snowtomamu.jp/
〒079-2204 北海道勇払郡占冠村字中トマム

6,500円/人