2010北海道家族之旅 (Day 5)

層雲峽→大雪山黒岳

朝早打開窗，見到下面張相嘅環境，層雲峽個名係咪係因為咁而嚟嘅呢？

今日全日都喺層雲峽玩，輕輕鬆鬆食個早餐先，個早餐幾好食呀，毛爸你做咩扁咀呀？　　　　

第一站上黑岳，要上黑岳山頂首先要喺層雲峡駅搭纜車上黑岳五合目～～

大雪山黒岳 (Tel : 01658-5-3031)
http://www.rinyu.co.jp/kurodake/index.html

山上面比較凍，我哋都帶定厚衫，準備出發啦～～～

十幾分鐘就上到黑岳五合目站，天朗氣清，風景好靚，可惜仲未有紅葉，氣候暖化對我哋嘅環境影響真係好大，希望大家要好好愛護地球，如果唔係好多好靚嘅風景我哋都唔會再睇到～～～　

由黑岳五合目站再行幾分鐘就可以去登山吊椅站，沿途仲有動物腳印睇，日本人真係有諗頭，ｄ動物曳曳留抵ｄ腳印，佢哋就順便用嚟教導吓ｄ遊客！

毛婆婆怕坐登山吊椅，所以佢無同我哋一齊上去，喺度休息吓等我哋返～

上到呢個高度，可以見到少少紅葉啦，如果可以上到山頂一定可以睇到更多！

我第一次坐呢ｄ吊車，有ｄ驚，捉實ｄ先～～～

由五合目上到嚟七合目都要坐十幾分鐘架，睇吓條吊索幾長！

如果要再上黑岳山頂，就要行多個幾鐘頭呢ｄ山路，今次唔行囉，影張相算啦，下次同毛爸兩個嚟時再挑戰黑岳山頂啦～～～

我哋喺七合目逗留咗一陣就回程啦，毛婆婆等緊我哋架～

我真係太重啦，連車都坐到斜晒，大家有減肥良方記得通知我呀！

落山啦！       

返到落山就去咗溫泉街食午餐，呢度好少餐廳，選擇唔多！

食咗幾日拉麵，今日我同毛爸轉食咖哩飯，味道都唔錯，毛婆婆同毛爺爺繼續食拉麵，雖然唔特別好食，但都算係OK架～～                                             

食飽飽就繼續行程啦，跟住我哋會去睇瀑布，有銀河之滝同流星之滝，而呢兩個景點嘅入口就係呢條咁靚嘅銀河隊道旁邊～～～

流星の滝～～～　　　　　　　　　　　　

銀河の滝～～～　　　　　　　　　　　　　　　　

去遠ｄ，有大雪水壩～～～　　　　　　　

回頭再去埋大函，玩到差唔多，要返酒店浸溫泉啦～～～

今日呢間酒店貴過噚日嗰間，但房又細ｄ，嘢又唔齊，連浴衣條腰帶都無燙過，嘢食份量夠，不過味道同新鮮度就麻麻地，呢間酒店應該係100％中國人管理，真係唔得囉，等我仲諗住呢間應該係我哋行程中最好嘅一間添！

晚餐喺自己房食，食完有專人幫你開床～～～

呢間酒店無乜嘢賣，食飽飯我哋走咗過對面間酒店行街，多好多嘢賣，而且人哋有好多節目俾ｄ住客睇同一齊玩，我哋見ｄ日本人玩得好開心，今次揀錯酒店添！

層雲峡朝陽亭 (TEL : 01658-5-3241)
http://www.choyotei.com/
〒078-1795　北海道上川郡上川町層雲峡温泉

料理長自慢の和食膳プラン  12,750円/人 Total : 51,000円