2015 青島濰坊之旅 (Day 3 - 22 Oct 2015 Thu)

濰坊市尋人第二天

今日早餐食水餃～

一人份量，25隻，食完飽到上心口，好味！

哥哥嘅菜肉雲吞，佢話唔好食喎～

韮菜煎蛋，韮菜多過蛋，好正！

食飽早餐後我哋去咗另一間醫院再搵，雖然嗰度d人都好幫手，不過得到d唔好嘅消息，基本上個個媽咪想搵嘅人都已經去世，於是我哋就向我哋搵咗兩日手上得到嘅唯一嘅線索去搵，坐的士去人哋俾我哋嗰個地址～

個地址有d錯，不過都一路問到好人，最後都俾我哋搵到媽咪呢個老朋友！開心到我哋呢...

本來我哋準備同呢兩位老人家食午餐，點知哥哥唔舒服，仲嘔，可以呢幾日佢辛苦得濟....

咁我就送咗哥哥同媽咪返酒店休息，差不多三點先落去Starbucks食個late lunch.

另外喺大陸買藥真係好難，我唔記得帶Panadol想去買盒俾哥哥食啦，真係有錢都買唔到架，連屈人寺都無，全部係國產貨，唔怪之佢哋嚟香港買到癲咗啦！

到旁晚時間，酒店送咗蛋糕上嚟，今日係媽咪80歲生日，如果可以幫佢搵到佢想搵嘅舊鄰居你話幾好呢～

哥哥瞓咗一個下晏好返d，晚餐去返第一日間餐廳食，今次唔敢叫咁多...XDDD

喺我哋有d失望嘅時候，雖然今早幫媽咪搵到一個老朋友，但都唔係佢最想搵到嘅嗰家人，以前喺大陸生活好艱難，媽咪又一個人喺大陸，其他屋企人都喺泰國，媽咪就係得到嗰家人嘅照顧先生活得咁開心，所以好想見返佢哋～

當我哋食完飯返到房，收到服務員打嚟嘅電話，話有人嚟探我哋，我起初以為係今早見到嗰位媽咪老朋友，點知一打開門，竟然就係媽咪想搵嗰家人嘅第六仔，佢兩個相擁而泣，40年無見，嗰刻心情真係好難形容！

原來係媽咪個老朋友，下午幫我哋打咗好多電話去搵，最後俾佢搵到，就通知咗佢我哋嘅地址，然後咁就幫我哋完成咗今次幫媽咪尋鄰之旅囉！我哋真係好好彩呀！

媽咪話呢個係我兩個送俾佢最好嘅生日禮物喎^0^