2013 玻利維亞+南極 - Day 9 Uyuni - Tupiza

2013 玻利維亞+南極 Day 9 (14 Feb 2013 Thu)

Uyuni (3,665m) -->Tupiza(3,160 m)

噚晚玩到成９點先返到酒店，今朝５點又出發去鹽湖睇日出，好眼瞓，但心情好興奮，出發時天都未光，又係摸黑行車，William點會認得路架，到而家我都唔明！

去到鹽湖等咗一陣開始天光～


見到少少陽光啦！


天光得好快，William話今日好多雲，可能睇唔到日出






個天未光得晒時，唔係好影到相，相機唔係好對到焦～





又大風又凍，不過我哋都唔願喺車等，咁辛苦嚟到，凍Ｃ都唔返上車呀！


有個人企喺度比較容易對到焦！





每分鐘見到嘅景色都唔同，真係太神奇！

光啦，光啦，真係唔相信我對眼睇到嘅嘢

似企喺個天度嗎？

呢條好似去天國嘅路！


真係太靚，我唔識形容，你哋自己去感受啦，去片！

影飽相，又有兩個傻人太興奮，又叫William同佢哋影Ｄ瘋人相！

同一個動作，一張毛爸影，一張William影，你哋話邊張靚Ｄ？

呢度我覺得凍過南極，影相影到手都痺埋，要收埋隻手暖暖先得！

最後都係要出動手套！但戴住佢真係好唔方便囉！

最後我哋係睇唔到日出嘅！不過係回程時見到佢哋，當補償啦！

早上７點幾我哋去到鹽湖上唯一嘅一間酒店，我哋會喺度食早餐，因為怕污染鹽湖，而家呢度係唔俾人住架啦，不過我哋去到見到有日本人喺度住，問返William點解，佢話喺度住係非法架！不過老實講佢俾我都唔住呀，入面個廁所真係污漕到呢...同祖國嗰Ｄ有得揮呀，盲嘅都知個廁所喺邊！

酒店旁邊有好多國旗，不過香港嗰支唔見咗啦，早幾個月仲見人影到架！


鹽酒店裡面Ｄ嘢當然係鹽做架啦


呢Ｄ鹽磚可以睇到嗰年多唔多雨水，每年一層，如果嗰層厚就係嗰年多雨水囉！


開飯啦，呢個蛋糕係Gladys焗，都幾好食架！


William同Gladys份工都好辛苦吓，佢哋噚晚唔知瞓咗幾多個鐘呢...

食飽又出去影過，好猛太陽呀！

有Ｄ人已經出咗發啦！

拜拜啦鹽酒店！

William好好，佢驚我哋影唔到相，所以會成日幫我哋清潔個車窗架！

登...登...登...今日我終於睇到我想睇嘅天鏡啦！真係不枉此行！

雖然有時天陰陰，不過好快又會見返陽光，所以Ｄ相會時光時黑...

我終於睇到啦！！！！！！！

有人扮升天喎！

靚成咁，想點呀！

當我哋影影吓相時，見到有Ｄ嘢郁喎！

原來係巴士呀，我知鹽湖有巴士行，估唔到可以見到喎，太開心啦！

嚟到鹽湖一定唔可以唔影Ｄ錯覺相啦，下面Ｄ相全部係William揸機影，而且張張都係一take攪掂，William捕捉時間真係捕捉得好好，先前我係鹽酒店見人哋影呢Ｄ相時真係跳到氣咳都影唔到一張呀！

玩飽濕嘅鹽湖，William又帶我哋去睇乾嘅～ 

都一樣靚架！

影影吓，William又唔知去攪乜，喺度掘鹽喎！

原來佢又準備幫我哋影Ｄ攪笑相呀！

大攝影師配小麻豆！

好多時我都係見人淨係放Ｄ成品相上嚟，我俾埋拍攝過程你哋睇，因為William真係好好心機同好辛苦先幫我哋完成架！

咁大支可樂做咩呢？

呵呵呵...毛爸攞返公司俾老細睇唔知會唔會加佢人工呢...

呢張相你就睇到毛爸同可樂個位置啦！

道具

呢度連Ｄ雲都靚Ｄ架！

傻生，傻太時間！

我哋由晨早５點玩到中午12點幾鐘先走，真係夠晒皮，鹽湖每一個樣我都見過晒啦，太幸運，要感恩呀！

呢度係鹽湖邊邊，我哋走啦！

我哋本來想住呢間酒店架，佢比我哋間酒店更近鹽湖，不過無房無辦法啦，我哋間都算唔錯啦！

跟住我哋就係Uyuni附近搵地方食lunch，呢度仲有得shopping架！

因為我哋覺得William同Gladys太長時間工作，好辛苦，呢餐我同毛爸煮俾佢哋食

卡卡卡...煮我最拿手嘅日本菜...哈哈！

毛爸就煎午餐肉，仲有豆豉鯪魚唔記得影～

我哋仲教咗佢哋用筷子，Gladys學得好快，已經識用啦！

全部清晒，Gladys話豆豉鯪魚最好味喎！

食飽走人，天色又開始差啦！

經過嘅地方其實都好靚，可惜天氣唔好，Ｄ相唔出色！

其實有一段路，William話我哋聽可能行唔到，因為條橋之前落雨沖爛咗，如果落雨水深就過唔到，咁就要返轉頭行另外一條遠好多嘅路先可以返到Tupiza，嗰條路要行８個鐘架，沿途我哋都好擔心，因為我哋一架對頭車都見唔到...

之後開到附近，我哋見到一條車龍...C得，咁即係過唔到啦...William落車睇吓個情況，跟住無乜嘢咁上返車，跟住撻車，我哋以為佢返轉頭，但原來唔係，佢向前行，爬過晒Ｄ車頭，係條河邊停咗一下，我見到條橋係中間斷開，成一個V字，Ｄ水流好急，全部係黃泥水，而且都好似好深水吓...

跟住聽到入波聲，架車慢慢向河駛落去，我驚到即刻搵嘢捉住，Ｄ咁精彩嘅場面我同毛爸竟然驚到一張相都無影喎，而家不知幾後悔呀...我見William唔係直駛向河中間，佢係將車頭斜向上游咁駛落去，到架車去到河中間，車頭正好被Ｄ水沖到對正條橋上斜位，跟住俾油，咁就過咗河，喺兩邊等過河嘅人全部一齊拍手，真係驚得我吖，我坐嗰邊無咁深水，毛爸坐嗰邊係俾Ｄ水沖住，佢話佢嗰邊Ｄ水幾乎到玻璃窗呀！William 真係好嘢，人車合一，superman 嚟架！

過咗河開始見到有對頭車啦！

我哋頭先過嗰條橋係比呢條長架～


就係咁樣山過山，唔知過咗幾多個山～

就嚟到Tupiza時，景色開始唔同咗，又見返Ｄ五顏六色嘅山啦！

Tupiza邊邊有好多礦場，而礦場旁通常都會有個市鎮！

又再越過高山又越過谷啦，我坐嗰個都攰呀，唔好話揸嗰個啦！

呢座山裡面係礦洞，好好地一座山攪成咁...

繼續趕路！

本來我哋可以早Ｄ到，不過成日停車影相，最後差唔多８點毛返到Hostel～

今次呢間Hostal係我自己揀，麻麻地，地點唔方便，都係William揀俾我嗰間好Ｄ！

Hostal Los Salares
Address:　Zona Chajrahuasi
　　　　　Tupiza, 237
　　　　　Bolivia
Phone: +59126945813
E-mail: hostalsalares@hotmail.com