2013 玻利維亞+南極 - Day 8 Potosi - Uyuni

2013 玻利維亞+南極 Day 8 (13 Feb 2013 Wed)

Potosi (4600m) ＝＞Uyuni (3,665 m)

噚晚我都瞓得唔錯，不過毛爸就慘Ｄ，瞓瞓吓唔夠氣扎醒咗，我哋間房雖然有窗，但係唔開得嘅，已經喺咁高海拔，空氣薄弱嘅地方，兩個人呼吸，半夜間房已經無氧氣啦，毛爸醒起浴室有個開得嘅窗仔，拿拿聲走去打開佢，好似監犯咁伸個頭去個窗仔吸氣，吸咗一輪好Ｄ可以再瞓，唔係有呢隻窗仔，我同毛爸可能已經Ｃ咗啦！你話佢係咪應該叫生命之窗吖！

房個窗望出去個景好靚架，最可惜係個窗睇得唔開得囉！

呢度朝早係無電架，我哋起身時係未天光，要揸住電筒洗面擦牙同執行李，好麻煩，收得咁貴，供多一個鐘頭電都得掛！ 

我今朝都係痴痴呆呆，毛爸話我個口唇都變黑咗，早餐咩都無食，淨係飲咗兩杯mate，不過都無咩幫助...仍然痴呆！

毛爸無事就同William 喺外面影相，仲要影埋Ｄ咁嘅相，係咪想激Ｃ我吖！

最後我爬咗上車就無郁過...真係辛苦到Ｃ...William話一陣會向下行，慢慢會好Ｄ！

出發啦！

呢度無路，無路標，點樣行全靠個司機經驗，所以去玻利維亞一定要包個有經驗嘅司機呀，唔係蕩失路就慘啦！

我哋時不時會停抵影相，因為周圍嘅環境真係好靚，似瑞士雪山加沙漠，太震撼，可惜我落唔到車同呢個咁靚嘅景合照...

圍住我哋嘅有超過十個雪山，無窮無盡咁，好靚呀！

慢慢向下行，由有雪行到無雪！

William影相幾時都咁認真！

今日其實會睇幾個細lagoon, 包括Honda, Chiarkota, Hedionda y Negra不過我唔記得邊個打邊個啦總知就個個都好靚啦！

途中仲見到好多動物！喺呢度真好，好少見到人

呢度仲有間酒店Los Flamencos Hotel Ecologico架，佢喺正Laguna Hedionda 旁邊～

Laguna Hedionda ，去到呢度我好少少，可以落到車影相，但仍然有高山反應！

不過見到咁靚嘅景，幾辛苦都值得！

唔明呢個牌想講咩？究竟呢度痾唔痾得呢？


最近Ｄ相，我好少上鏡，因為個樣實在太衰啦，呢張見唔見到我呢？

第一次見到有路牌

我哋就係成日咁樣停喺路邊落車影相，好在呢度唔多車，唔係實俾人鬧！

Hi 你好嗎！

好多時我哋都要過河，有時Ｄ水都幾深吓，每次我都好驚，如果死咗火點算呢，萬里無人，搵鬼救你咩！

我哋向住鹽湖個方向去，鹽湖真係好多人去，呢段路遇到唔少車，佢哋都係睇完鹽湖走嘅旅客～

本來好好天，不過到中午時分開始陰天，呢度天氣變化真係好大！

William同Gladys揾咗個絕世好位俾我哋食lunch, 風景一流，可惜我又高山症發作，只可以喺車度瞓覺，錯過咗一餐美味嘅lunch

毛爸話好似香港Ｄ炒公仔麵，好好味喎，我無得食，特登影俾我睇，真係多謝晒！

呢個地區Ｄ石好古怪...

我哋食飯個位就係望住呢個湖！

食飽飯繼續趕路去Uyuni，其實都好擔心天氣唔好，因為今日我哋會去鹽湖睇日落，係我去玻利維亞最重要嘅行程，如果落雨就Ｃ得！不過我望到遠遠有藍天，即係仲有希望啦！

見到有人喺路邊開餐，我都係鍾意我哋個開餐位置多Ｄ！

已經接近Uyuni，呢Ｄ係米，係玻利維亞最靚同最貴嘅米，差唔多要賣到HK$120/kg，拍住日本米Ｄ價錢，可惜我哋無機會試到！

Uyuni 附近比較現代化，有油站，不過唔係成日有油入，我哋到時已經無晒油，要揾過第二間啦～

再行咗無耐到咗一個採礦小鎮San Cristobal，感覺好似由古代返反現代咁，呢度仲有間靚靚教堂，嚟到呢度我無晒高山反應，變返個正常人，太好啦！

有俾小朋友玩嘅遊樂場~

有shopping嘅地方，不過我哋去時閂晒，得一兩檔開咋！

有街市，仲有銀行同好多商店，係呢區最有錢嘅地方！

離開咗San Cristobal，我哋繼續向鹽湖進發，路上見到嘅風景已經唔同晒，望出去好平好闊！

到鹽湖前會經過火車博物館，其實都無咩睇，得Ｄ爛火車，似癈鐵場多Ｄ囉～

呢度Ｄ火車軌係無木枕架，得嘅咩，Ｄ路軌唔會移位架？

Uyuni，環境比我想像中差，Ｄ路好多都爛，一氹氹水，行過要好小心，其實Uyuni無咩值得睇，好多遊客因為要去鹽湖先會喺呢度落腳～

經過咗Uyuni，我哋就沿住呢Ｄ路去酒店放抵行李先，因為我哋酒店就係鹽湖旁邊～

心急去睇鹽湖唔記得影酒店外貌，喺呢間酒店個website借兩張相過嚟先！

本來今次我哋住唔到鹽酒店架，因為我哋confirm晒行程時，所有鹽酒店都已經full晒，用咗好多方法都book唔到，我試過自己send email俾酒店同佢傾都唔得，不過William好好人，佢話會盡力幫我搵，最後喺我到玻利維亞嗰日早上William幫我confirm到一間房，真係好開心，本來諗住呢個行程住唔到鹽酒店有Ｄ遺憾，而家無啦！

所有嘢都係用鹽做，地下都舖滿鹽，Ｄ喼係推唔到入嚟，一定要拎起先得！

走廊有好多地方俾人坐～

呢度好多日本人住，我嚟咗玻利維亞咁耐，係喺呢度先見到日本人！

由酒店開車到鹽湖都係5分鐘到，第一眼睇到嘅反應係點咁深水嘅，我睇人哋Ｄ片得嗰1-2cm水咋喎！

仲要時晴時陰，好鬼大風，唔起晒Ｄ水波，真係好鬼擔心睇唔睇到我想一塊鏡咁呢...

我哋５點幾去到，已經好多人到咗等日落～

似湖多過似鏡囉...

D水深到過晒我腳眼，仲要我對水鞋個底都幾厚添架!

William俾我哋喺度玩咗一陣就叫我哋上車，話同我哋搵過個好地方！

我哋一直向住個太陽行，都行咗好遠吓，旁邊已經無其他車！

...行吓行吓竟然有乾地，仲要太陽強勁咗，個天又清咗，唔係麻咁神奇！

完全乾嘅鹽湖，真係無諗過可以同時睇到乾嘅同濕嘅鹽湖，仲要係咁深水同咁乾水喎！太奇妙啦！

乾嘅鹽湖都好靚！

一望無際！

今朝仲係個活Ｃ人，而家可以跳，真係無諗過！

兩條友仔喺度玩到癲晒！

夕陽無限好，太太太靚啦！當我哋睇得入神嘅時候，William又叫上車，佢話要去第二度影喎！

又再行咗一段路，個天又光返，呢度水淺好多，又無咁大風，終於可以見到鏡嘅效果，雖然唔係最靚嗰個樣，但我哋都好滿足啦，因為可以睇到三個唔同款嘅鹽湖，太幸運啦！


我哋一直追住個太陽去，由乾嘅鹽湖開始我已經無見過其他車，而家呢片鹽湖只係得我哋...

每分每秒都喺度變化嘅鹽湖...實在太美啦！

William從小喺度長大，每個地方佢都好熟悉，所以每每我哋睇到嘅嘢都比人哋多，俾人哋特別，仲要佢係一個好好嘅攝影師，所以我哋嘅相係比人哋多，角度亦比人哋靚！多謝你呀William！




千辛萬苦我哋終於都睇到我哋想睇嘅鹽湖！返到香港Ｄ朋友睇咗我哋Ｄ相，好多人都問我哋係唔係帶咗個攝影師去！

天光玩到天黑，我哋係玩到個天黑晒先走，而William可以係全黑嘅情況下車我哋返酒店，真係服咗佢！

Hotel de Sal Luna Salada
Salar de Uyuni, 0000 Colchani
http://www.lunasaladahotel.com.bo/en.html