2013 玻利維亞+南極 - Day 14 At sea, Drake Passage

2013 玻利維亞+南極 Day 14 (19 Feb 2013 Tue)

Cruise day 2 - At sea, Drake Passage 

噚晚開船後我就一直瞓，中間感覺有Ｄ搖，無理一直瞓，朝早6點幾俾毛爸叫醒我俾個嘔吐袋佢，我仲話佢叫佢唔好咁早食暈浪丸架啦，而家過晒藥效啦，點知佢好鬼慘同我講，半夜俾架船已經搖醒咗，再補咗一粒架啦，不過都唔掂囉...C...鬧錯人添...咁拿拿臨攞嘔吐袋俾毛爸啦！

毛爸嘔咗好多次，咁我又出去睇吓有無人幫到手，成隻船鬼影都唔多隻，最多就係Ｄ嘔吐袋，周圍都有，隨手就可以攞到！

執房用嘅車要用繩绑實！



醫生10點先開工，7-10點呢段時間我無嘢做到，就去攞克力架俾毛爸食，佢又話唔想食，想食姜，好！又周圍去搵，終於去到第三間餐廳先搵到，毛爸食咗又唔見有好轉，繼續嘔，又繼續等！得閒就睇吓Ｄ浪咁囉！



十點第一時間去搵醫生，佢已經忙到Ｃ啦，我等咗一陣就到我，我話個病人嚟唔到，佢話一陣去我房幫佢睇，不過我係第四間，要等吓囉！

十點半醫生嚟啦，睇咗毛爸，我問有藥食可以幫到毛爸，醫生話too late啦，一定要打針，毛爸最怕打針架，不過而家咁唔打都唔得啦，呢支針就貴啦，多謝140歐！


毛爸暈浪嘅位置！


今日其實都好忙下架，我哋要去試衫同救生衣準備登岸時用，不過無幾多人去到試衫...因為好多人都出唔到房門口！


今日要自己食lunch，今日lunch主題係意大利餐，Ｄ嘢好啱食！







食飽飯無事做走咗去船尾睇浪～


嘩！原來都好大浪吓，船長話Ｄ浪有10米高

下午要攞Ｄ會登岸用嘅物品去除蟲呀，因為驚污染南極，所有會帶上岸嘅物品都要用真吸塵機吸乾淨，以免有Ｄ種子或者蟲卵唔覺意帶咗上岸，污染南極！

中間有Ｄ時間返房睇吓毛爸，又拍Ｄ片，等毛爸唔暈時睇返，佢暈船浪時係咩情況！

唔出門口，mini bar都有Ｄ嘢飲架！

仲有Ｄ關於南極生態嘅講座要去聽，個個暈晒喺房，得小貓三幾隻去聽...


全隻船得４個亞洲人，就係我同毛爸，仲有兩位嚟自上海嘅朋友，噚晚認識咗，今晚有人陪我一齊食飯，唔洗咁慘！

食飯時又拍咗Ｄ片，你哋睇完會唔會暈呢...