2011 MOS狗狗街坊春季旅行 - Day 3

第三天: 館山 → 横浜→伊豆高原 25-2-2011 (五)

今日好好天，一早起身喺房度望出去，好靚呀！

今次我哋包晒喱５間向海嘅房！

無敵大海景！

食早餐前去影吓相先，今朝都幾大風，同毛毛著咗風褸！

看海的日子真好～～～

毛毛：不過我頂帽好似吹歪咗喎！

CoCo嘅笑容永遠都係咁甜，咁燦爛！

為求有張代表作，眾家長都瞓晒身架！

影飽食早餐啦喂！　　　　　　

歡歡：我份早餐咁遠食唔到喎，媽媽你放手先啦！

日式燒魚早餐，啱晒口味，正！

人多真係好辦事，個囡又可以暫托啦！

小朋友早餐，仲靚過我哋大人早餐噃！

呢度半分係毛毛嘅～～～

阿囡今朝唔合作，唔肯食！

淨魚都唔制，毛毛朝早食嘢真係好難攪架，所以我返工成日遲到囉，最後都係CoCo幫毛毛攪掂咗個早餐，CoCo真係唔該晒！

唔食就自己坐啦，唔好阻住阿媽食魚啦！

食飽飽就準備出發啦，呢間酒店已經住過兩次，但都好想再嚟住，有機會我一定再嚟架！　　　　

館山 →金谷港 (Tel : 0439-69-2111)
(29.9KM  49分 500円 IC-16.1KM)
一般道路  31.4KM  1時09分

今朝我哋要坐船去橫濱，兩部車，熱熱鬧鬧出發啦！

金谷港→渡輪→久里浜港(Tel : 046-835-8855)***(船程大概40分鍾)
http://www.tokyowanferry.com/

話咁快就到東京灣碼頭啦！

排隊等落船，今日好少車呀！

落船啦！　　　

今日得９架車坐船咋！

泊好車，我哋就上甲板影相啦！快快快，得４０分鐘咋！

歡爸帶咗手信俾日本ｄ海鷗喎！

嗰邊有嗰邊影海鷗，我就喺喱邊影毛毛！

影到坐落地，不過喺日本我先敢坐地，如果喺我哋偉大嘅祖國就一定唔敢！坐咗落去一定俾ｄ口水痰癡住個pat起唔到身！

阿媽有阿媽望，阿囡有阿囡望，咁唔合作嘅...

突然間一聲大叫，頭先影海鷗ｄ團友俾個浪整濕晒呀！

但佢哋仲好開心，笑得出呀，其他團友咪個個爭住影佢哋D濕身相囉！

臨落船時，有團友派橙食，甜唔甜？你睇歡爸個樣就知啦！

食埋橙就要返上車，準備上岸啦！

久里浜港→LaLaport Yokohama (Tel : 045-931-1000)
(46.1KM  54分 1,500円 IC-39KM) 
一般道路  45.1KM  1時40分

LaLaport Yokohama (Tel : 045-931-1000)
〒224-0053 神奈川県横浜市都筑区池辺町4035-1 
http://yokohama.lalaport.jp/

去到LaLaport啱啱係午飯時間，而我哋今日午餐間餐廳都係ｄ團友話一定要到嘅！                             

小朋友嘅嘅水兜係陶瓷做架！

每位小朋友都有佢自己嘅位，同爸爸媽媽同枱食飯！

毛毛：我好似嚟過呢間餐廳喎，幾時呢，唔記得咗添！

毛爸：你第一次嚟日本，同小吉一齊嚟架，你記得返未呀？

我哋等嘢食時，菇菇就俾佢阿媽整蠱，幫佢扮鬼扮馬，笑到我哋個個轆晒地！

毛毛：我好肚餓，幾時先有得食架？

不過大人就無所謂，不斷影影影.......

毛毛：瞓醒一覺都未有得食架？　　　

菇菇：我份午餐到啦，好似好好味咁噃！　

歡歡：I'm ready，你一聲go我就可以開始架啦！

毛毛：我係虔誠嘅教徒，祈咗禱先開始食架！

由邊一款開始食好呢？

大人嘅午餐都唔錯，ｄ意粉好好味呀！　　　　　　　

食飽就係Shopping時間，大家各自努力啦！

我喱ｄ時候就當然唔會放過沖電嘅機會啦，日本限量版Sakura咖啡杯，好靚啦，雖然我已經有好多隻，但都忍唔住買咗隻，多謝歡媽好介紹！

LaLaport Yokohama→ホテル四季の蔵 (Tel : 0558-32-1272)
(155.9KM  3時33分 3,000円 IC-99.4KM) 
一般道路  156.8KM  5時54分

又係起程嘅時候，今程車係歡媽做司機！講笑咋，佢一上車，全部團友彈開幾丈遠，都係影幅相啫，唔使咁驚！

今程車好塞車，仲有好多之字形嘅山路，所以攪到遲咗成半個鍾先到酒店，日本人係好守時架，真係非常唔好意思呀！仲有今日兩位尾程司機（歡爸同細毛爸）都揸得好辛苦，又要趕時間，又要塞車，仲要揸無街燈之字形嘅上落山路，真係辛苦晒呀！

去到酒店，放抵行李酒店就車我哋去食飯啦，餐廳距離酒店５分鐘車程，如果訂一泊兩食，日餐就會喺 "くらの坊" 食，而西餐就會喺返酒店嘅西餐廳食，我哋會喺四季の蔵住兩晚，聽晚book唔到日餐，所以聽日嘅晚餐我哋會食西式～

くらの坊係一間好地道嘅日本餐廳，佈置好簡單但好靚，好日本feel，我哋坐喱張８人大枱係一塊原木做出嚟架，棵樹一定好大棵啦！

開放式廚房，廚師整咩都可能一目了然，偷吓師都好喎！

連天花都有裝飾架！

仲有ｄ嘢賣喎！

餐廳仲望到我哋聽日準備去嘅大噴湯，好似千與千尋鍋爐爺爺個爐呀！

今晚超豐富嘅日式地道晚餐餐單～～～

你唔好睇佢個樣咁簡單，味到真係...好好好好呀，就連嗰四件wasabi壽司都好好食，帶住小朋友，呢餐係我覺得最地道，最特別同最好味嘅一餐，如果係會帶小朋友去伊豆，喱間真係全力推介呀！　　　　　　　　　　　

喱兩件壽司到而家都對佢念念不忘，唔知幾時先有機會再試呢？

豆乳鍋，超香豆味，將ｄ豆漿加落旁邊ｄ汁度，再加ｄwasabi，俾十個”正”佢！　　　　　　　　　　　　　　　

再嚟一個三文魚煲仔飯同麵豉湯，無限滿足，夫复何求呢？

但唔好滿足住，仲有個自家制雪糕，一定要將你個肚皮填滿先放你走！不過ｄ嘢咁好味，我唔介意飽ｄ呀！

食飽酒店有車接返我哋返去，個個攬住個肚皮上車！

喱間四季の蔵真係好靚，雖然ｄ房唔太大，但佈置好精美，用品好齊全～

睡衣都有，仲好靚添噃！

毛毛用品！　　　

靚靚洗手間～～～　　　　　　

日常用品一應俱全～～～　　　　

沖涼房好大，仲有個大浴缸～～～

不過毛毛返到酒店已經好攰，洗完手仔腳仔自己走去瞓先啦！

ホテル四季の蔵 (Tel : 0558-32-1272)
〒413-0511 静岡県賀茂郡河津町峰1169
http://www.shikinokura.com/
1部屋(2泊4食 - 連泊割引) 雙人房/37,000-39,000円/人, 三人房 42,000円/人,  寵物2,100円/犬/日 , 駐車場無料