25 Jun - 1 Jul 2011 曼谷之旅 ﹣ 飲食篇

今次我哋呢個7日6夜之旅，主要都係食同瞓，過其無鬧鐘嘅生活！

由香港出發，上機前都要整餐翠華先～

泰菜

建興係毛爸去泰國必到嘅餐廳，而家有好多假建興，你哋認清佢個招牌啦！

椰青係食咖哩蟹嘅好拍檔，可以解返咖哩嘅辣同熱氣～

一碟菜，一碟蟹，兩碗白飯，超級好味道！

仲有一間泰菜係唔可以唔去就係頌通啦，頌通同建興嘅菜單差唔多，咖哩蟹亦係各有特色，建興個汁好味Ｄ，但頌通炒出嚟嘅蟹係鮮味Ｄ，而炭燒嘅食物就係頌通比較出色，另外建興就係集團式，唔係間間都好食，我哋每次去都係會去返老店，老店炒嘅蟹個汁係最好味，但地點唔太就腳，而且因為附近經常塞車，十架taxi有十架都唔肯去，我哋次次都係搭BTS之後再行15分鐘先可以去到！而頌通就係家庭式經營，只此一間，水準保持得好好！　　　　　　　

燒大蝦，又香又多汁！

令我哋經常掛念嘅咖哩蟹！而家諗起都想食呀！

Food Court

泰國嘅food court係我哋lunch經常流連嘅地方，又平又好食，最好係份量少少，可以試好多唔同款式～　　　　　　　　

日本菜

日本菜喺泰國好普遍，日本餐廳嘅數目同款式我相信比香港多好多，而且價錢又平，所以無理由唔幫嚫吓架！

Ｍo Mo Paradise - 呢晚好想食Ｄ菜，就走咗去 mo mo paradise，一人一百蚊，食到攬住個肚走，又滿足埋我想食菜嘅願望，抵！

大戶屋，食日式快餐，呢間麻麻地，嘥咗個quota添～

Fuji - 平靚正嘅日本餐廳，最好味碗蒜蓉炒飯，食晒先記得未影相！

法國菜

Water Library 而家係我最鍾意嘅西餐廳，我相信我每次去曼谷都會去探佢！

呢度嘅食物嘅款式轉換得好快，每次去都有好多新款式俾你試，今次懶得諗，我哋就揀咗tasting menu，樣樣試Ｄ，可以試好多款！

呢兩杯新鮮生果打嘅冰沙，好清新，好開胃～

上次我哋只係叫咗一款水，飲唔到佢有咩特別，今次毛爸醒啦，叫兩隻款，比較吓有咩唔同，睇吓第日有無機會做＂評水員＂

餐廳亦好細心，會標籤咗你邊隻杯裝邊隻水，唔會撈亂架！今次我哋飲到透明樽嗰支甜Ｄ好味Ｄ，下次再試佢其他水藏！

我哋隔離枱成枱都係杯！　　　　

由一開始嘅麵包到最後嘅甜品同咖啡都係精彩絕倫，味道一定係你估唔到嘅，呢位咁年青嘅廚師，真係天才嚟架！

呢個43度嘅三文魚我要講一講呀，個三文魚係用43度火焗過，佢個質感好特別，介乎於生與熟，軟與硬之間，好特別嘅一個煮法！

湯牛肉原來可以好好味！

我好鍾意食甜品，但我鍾意嘅甜品款式好少，食嚟食去都係嗰兩樣，從今晚以後我多咗一個選擇啦！

Gin tonie "Water Library" 少少酒味，少少青檸味，食得咁飽，真係可以幫手消吓滯！好味道！　　　　　　

一個完美嘅晚餐點可以少咗呢兩杯香濃嘅咖啡！

Water Library 我最愛的泰國餐廳(^з^)-☆

今次更有幸認識咗呢度個老板，因為我知佢唔係做開飲食生意，亦唔係泰國人，我就問佢點解會喺曼谷開呢間餐廳呢？佢話＂just for fun＂，just for fun可以攪到間咁成功嘅餐廳，真係要俾100個贊你呀！

另外老板話佢係Thong Lor開咗另外一間同名餐廳，只有12個座位，可以望住廚師一路煮，一路食，一路傾，一路飲，氣氛好好，不過佢話未來兩個月嘅booking都已經full咗，叫我下次再去曼谷時早Ｄ通知佢，佢會try to squeeze兩個位俾我哋喎！一位風趣幽默，又好享受人生嘅老板，帶俾我哋一個愉快難忘嘅晚上！

生果

Mae Varee 芒果糯米飯 - 個個愛芒果糯米飯嘅人都一定唔會錯過！

下午茶，一人一大盒！

Supermarket買嘅榴槤，真係好食到停唔到口！

今次我哋仲去咗＂Or-Tor-Kor＂ 鮮貨市場，呢個場我哋都係第一次嚟，好大，好多local嘢食賣，而價錢當然平過超市啦！

我哋嘅目標出現啦！

毛爸話＂Cheers＂！　　　　　　

食飽榴槤再買幾個芒果帶返香港，完成任務！

咖啡

今次試咗一隻local品牌咖啡，味道拍得住Starbucks，但價錢只係Starbucks嘅1/3！

即叫，即磨豆，即沖，超新鮮呀！

Starbucks 係我哋每日必到嘅地方！

Ｗater Library 嘅咖啡都好出色！

今次呢個trip真係食到肚滿腸肥，返香港真係要的起心肝減肥啦！