2012狗狗美加遊－Day 17 (01-10-2012)

好囉...終於捱完呢個行程返香港啦！

毛毛快d起身準備啦！我未試過去旅行咁渴望返香港，真係覺得放監咁...


毛毛：真係返屋企啦？


毛毛：可唔可以瞓多陣呀？


9點到達AirCanada Cargo辦公室


點知AC cargo Canada話香港天氣熱唔俾運live animal, 痴鬼線咩廿幾度都話熱，咁我幾時返得香港呀？去死啦你！


我哋嘈咗好耐，俾咗好多建議佢佢都唔肯俾我哋d小朋友上機，淨係話唔關佢事係中央嘅決定，佢哋都無能為力，仲話未來幾日都未必可以飛，而人嘅機票又唔同我哋改，要我哋自己去客運大樓嗰邊改，但最後我哋係改唔到，因為我哋d係平飛，平飛無晒位，仲要我哋唔知邊日先走得，所以我哋每人要攞一萬大玩出嚟買過張單程機票！

咁情況我唯有打電話返香港check，香港AirCanada Cargo話無問題，香港唔熱，可以飛，咁我又將呢個情況話俾加拿大嗰邊知，佢話如果咁要香港一位AirCanada嘅高層confirm佢哋，佢哋先接受，仲指名道姓話一個人，其他人唔得，乜一間公司只有一個人信得過咋咩？

因為嗰陣係香港半夜時候，一定搵唔到人架啦，咁我哋就去繼咗架車，再租酒店，安頓好d小朋友同行李再研究可以點做！

我哋邊lunch邊傾，都唔咩可以即時解決嘅方法，而且大家都緊張咗成朝，我叫大家去休息吓，傍晚6點再集合，到時香港係日頭應該可以搵到人幫手～

但呢段時候我實在瞓唔到，咁就不斷出email問呢樣問嗰樣，希望一陣開會有多d資料俾d團友參考！

係我不斷睇返之前同AirCanada Cargo d來往嘅email時，我發現原來出發前我出email投訴call center個CS時，其中一個被CC嘅人就係ACC canada講一個要佢confirm嗰個人，咁我即刻send email俾呢位香港話事人啦，請佢幫忙！

太好啦，佢好快覆咗我，佢話會處理仲叫我有問題可以打電話俾佢，當然要即刻call佢啦，我講晒我哋今日嘅遭遇俾佢知，佢話香港呢邊天氣無問題可以運，佢話會出email俾佢哋，當呢位香港話事人個email一出，即時各方面d email，咩manager，咩Leader呀都一齊倒水咁倒落我個email度，大概半個鐘頭嘅email來往，終於confirm咗我哋d小朋友可以明天上機返屋企，個個都話會take care我哋呢單嘢！

呢位香港話事人我唔知佢咩職位，但我相信一定唔低，佢好好人又好肯幫人，加拿大嗰邊應該要send email同佢confirm我哋個booking, 佢收唔到，自己出過email去加拿大confirm收我哋d小朋友，叫佢哋即時處理！香港人同加拿大人嘅工作態度真係差太遠，我今次真係因為我係香港人而自豪！好多謝AirCanada Cargo HONG KONG各個工作人員出心出力幫我哋手運我哋d小朋友返嚟！

AirCanada Cargo Canada食屎啦你哋！