『狗狗食得天然有「營」』High Tea活動

前幾日收到NUTRO嘅邀請參加今日呢個天然狗糧介紹活動，好老實講平時呢ｄ活動我通常都唔會去，認識毛毛嘅朋友都知佢食嘢有幾麻煩，同佢轉糧真係好好好鬼煩架，非不必要我唔會攞自己嚟攪嘅～～～

點解我會去？而且仲係第一時間一口答應架，就係因為一個人，一個已經年幾無見而好想再見嘅人”Dr. Davy Ng”

活動時間   :  14:30 – 17:30
活動地點  ：旦王花泰國餐廳 元朗錦上路148號地下
活動內容  ：大會將安排專業執業獸醫吳仲瑩分享狗狗飲食知識及提供下午茶小吃

Dr. Davy Ng係毛毛由BB時睇到大嘅獸醫，毛毛細時好多病，都係Dr. Davy幫佢過完一關又一關，毛毛先可以健康成長到今時今日，毛毛雖然成日出入Dr. Davy診所，但佢一ｄ都唔怕Dr. Davy，每次去都好開心，有時仲偷偷錫Dr. Davy架！一位有實力又信得過嘅醫生真係唔易搵架！雖然而家毛毛睇嗰位醫生都唔錯，但最慘毛毛一去到佢間診所就會變震震狗囉！

仲有毛毛可以去得成日本旅行，都係要多得Dr. Davy，因為所有關於健康証明同驗血報告嘅問題都係由佢幫我解決架！你話Dr. Davy係咪對毛毛好重要呀，年幾前佢唔再睇症時，你話當時對我哋有幾大打擊呢！

未到兩點我哋就懷住興奮嘅心到達咗會場～～～

嚫未係好多人到時，努力影吓相先！

毛毛：媽媽我哋今日嚟上咩堂呀？

毛毛：哥哥影我左邊面啦，我左邊面靚ｄ呀！

Dr. Davy亦跟住我哋到咗，好開心，Dr. Davy 一眼就認得毛毛，無見咁耐，原來Dr.Davy仲記得毛毛喎，update咗毛毛嘅健康近況俾Dr.Davy知，又問咗佢好多問題，一直俾我霸住Dr. Davy到活動開始！仲有今日毛毛又偷錫Dr.Davy，可惜毛爸影唔到呀！

活動一開始係由Dr. Davy分享狗狗飲食知識，大家都好留心聽書，因為今次聽到嘅知識都好有用～～～　　

有幾樣我覺得比較要注意嘅部分就節錄出嚟同大家分享吓！

1. 狗狗如果要食鈣片就需要揀ｄ含有磷成分嘅，因為無咗磷，狗狗係吸收唔到鈣架，食咗等如無食！

2. 葡萄糖胺一定要揀狗狗食嗰ｄ，人食嘅葡萄糖胺，狗狗係吸收唔到架～～～

3. 如果狗糧入面已經有軟骨素同葡萄糖胺，自己可以額外再加少量，唔會因過多而影響健康～～～

4. 冬天幾凍都好，大家記得要開窗通風，因為唔開窗室內會好潮濕，狗狗好容易被真菌感染引發皮膚病，如果怕凍唔想開窗咁就開抽濕機啦！

Dr. Davy分享完狗狗飲食知識之後就有Q&A時間，大家都好努力發問，每次發問時間都over run架！

之後我哋仲一齊影張靚靚嘅大合照～～～

今次活動仲有張Certificate of Attendance同一包４磅嘅狗糧俾我哋帶返屋企試食～

呢個小朋友聽書聽到瞓咗覺，咁唔留心架你！

毛毛：幾時可以試食架？

好啦，講返隻狗糧先，佢係一隻天然糧，無動物副產品，不含人工防腐劑、色素同調味，而且佢有獨特專利長型細顆粒設計，中間有個凹位，可以幫狗狗清潔牙齒，就係因為以上種種原因，我決定會俾毛毛試食，不過喺我呢位皇帝女試食前，梗係由我呢位阿四試先，聽朝我無肚痾就俾毛毛試啦！

阿四試食報告：唔油，唔咸，無味精味道，食落係ｄ麥味，係ｄ比較淡味嘅狗糧~

另外就係想講返個場地啦，大會安排咗ｄ下午茶小吃俾我哋，都幾好味呀，環境都好靚，又多一個可以同毛毛一齊食飯嘅地方啦！

最後我想多謝NUTRO^® NATURAL CHOICE攪咗個咁好嘅活動，令我可以見返Dr. Davy，知道咗好多狗狗營養嘅知識，成個活動好流暢，安排得好好，對狗主同狗狗都照顧得好周到，今日我哋過咗一個好充實，好多得著同好驚喜嘅下午！

毛毛試食後嘅詳情，遲少少會post上嚟同大家分享！