2011 Bangkok - Day 2

早餐都幾多選擇，不過味道都係一般啦，蛋就要order嘅！

今日我嘅選擇係蛋白Omelet～

連香檳都有架～～　　　　　　　　　　　　　

呢度仲有室外位，幾好環境架！

今日曼谷天氣麻麻～～～

食飽飽就去四面神度請個安先～～～

Central World雖然已經開返，不過商場就仲有三分一未開，樓上就係咁情況，我諗仲有排先可以全部整返好～　　　　　

Central World 今期做電單車展，成個商場都佈滿唔同款式嘅電單車，我諗有過百架，架架都好靚～～～

跟住就係Shopping時間，點少得毛爸至愛Tee嘅Monkey See呀，而家做緊70% off，好抵，不過好多靚款都無size啦！

午餐當然係去food court整碗牛腩河啦，大滿足呀！

飯後啡一啡就梗係唔少得啦～

有人仲順便瞓個晏覺添呀！  

本來晏晝諗住去鬆吓骨，不過全部full晒，咁book定晒之後３日嘅時間就返酒店眠一眠啦～～～

題外話，去鬆骨店時經過我同毛爸都好心儀嘅一個泰國樓盤，而家已經入伙啦，如果有機會可以喺度住就好啦～～～　

Book咗6點半喺”Water Library”食晚餐，其實今次我已經喺第３次book佢架啦，不過上兩次都係因為有特發事件而取消，第一次喺毛毛病咗我哋取消咗行程，第二次因為紅衫軍事件，封晒路又去唔到，今次真係好希望可以去得成！

”Water Library”呢間咁特別嘅餐廳出乎意料竟然喺一個平平無奇嘅shopping mall裡面，而且佢嘅位置同我哋間酒店好近，十分鐘車程就到啦～～～

去門口已經好吸引，期待著之後發生嘅事情～

我同毛爸都唔係好飲得酒，咁就飲水啦，由佢個名你就知佢水嘅藏量一定有返咁上下，呢度有好多款水揀，來自世界各地，有氣，無氣，你想飲邊度嘅水都有！

我哋對水無特別研究就請佢哋幫我哋揀啦，不過一定要無氣，就係下面呢支啦，個樽好靚呀，好似酒樽，而呢支水嘅味道就係....................水味囉.....

毛爸話佢都係第一次有人攞支水嚟俾佢睇吓，然後問佢啱唔啱飲喎！

講完水，開餐啦！

好好味嘅牛角包，不過好快我哋就變咗心啦～～～

Home made新鮮麵包，超級好味，我一直覺得日本麵包喺最好食，估唔到今日我完完全全改觀呀，你試過入口溶化嘅麵包未？相中間圓嗰個，超級軟，超級香，加少少牛油，真係好食到呢............今晚我同毛爸總共食咗６個麵包！

唔飲酒都仲有其他選舉，呢兩杯果汁冰沙都好好味，好新鮮嘅味道！

頭盤：鮑魚冷意粉配黑松露汁

鮑魚鮮，冷意粉爽，黑松露汁香，從來未試過嘅味道，一試難忘呀！

頭盤：日式脆豆腐配鵝肝汁

豆腐皮脆，心滑，再加埋極香漲嘅鵝肝汁，味道真係夾到天衣無縫！呢款更加係毛爸全晚最愛呀！　　　　　　　　　　　

主菜：Seabass配白菌汁

單單係牛油炒什菇已經甘香味美，再咬一啖外脆內軟嘅seabass魚肉，絕對係一種難得嘅口感同味道～～～

Mango sherbert - 清新

主菜：和牛

真係望到幅相都想食，一ｄ都唔肥又唔油，肉質鬆軟，半生熟，時間掌握得超準確，俾我幾份我都食得晒！個賣相仲超級靚，成件藝術品咁呀！

甜品：蘋果批配vanilla雪糕

喺泰國食甜品，真係要有好甜嘅心理準備，呢個蘋果批如我哋所料真係好甜，但無辦法，泰國人係好食得甜，但我想講個蘋果批係整得唔錯架，個酥皮底好脆架！只係甜咗ｄ囉，vanilla雪糕都好好味，一冷一熱，如果個批淡返少少就正啦！

咖啡：同ｄ食物比較，唔算突出，不過都係水準之作，絕對可以為今晚呢美味及充滿驚喜嘅晚餐劃上一個完美嘅句號～～～　　　

你睇毛爸個滿意樣，証明我今次無揾錯地方啦！

呢餐飯食咗２個幾鍾，食吓，睇吓，影吓又一個晚上～～～

喺我哋臨走前，餐廳經理介紹咗大廚我哋識，真係估唔到佢咁後生，其實我同毛爸頭先一路食，已經一路估大廚係咩種人，會來自邊個國家嘅呢？煮嘢食煮到咁出神入化嘅竟然係來自新加坡一位後生仔，原來煮嘢食都真係好講天分架～～

Water Library, I will be back!!!!!!!                    

因為食得太飽，想行吓幫助消化，我哋無坐Taxi，改咗坐MRT返酒店，由MRT Lumphini 站行返酒店大概10分鐘，途中見到呢棵咁靚嘅聖誕樹，真係行吓有著數喎！　　　　　　　　　　　　　

今日酒店送嘅小禮物～～～

今日shopping 收穫～～～