今朝又係去Health Land鬆骨，午餐去咗Dean & Deluca Cafe，呢間喺一間來自美國嘅咖啡店品牌，亞洲只有台灣、日本同曼谷有分店，佢嘅位置好方便就係BTS嘅Chong Nonsi站旁邊，亦都係喺我同毛爸嘅dream house旁邊，當我哋睇中呢個樓盤時，呢間Cafe嗰時仲未係度開店架！
佢個入口真係唔多覺架，銀灰色嗰度就係入口啦！
裡面裝修好簡單，以白色為主，好多大玻璃，所以自然光充足，感覺好舒服！
今日我哋叫咗２個甜品同２杯咖啡，甜品（Tiramisu & Blueberry Cheesecake）真係唔得，甜到頂唔順呀！毛爸杯Cappucino都唔錯，但最期待嘅都係我叫嗰杯！
呢ｄ就係我一直期待想試，傳說中話係咖啡極品嘅貓屎咖啡(Kopi Luwak)，我相信喜歡飲咖啡嘅朋友，一定都希望可以試到呢ｄ咁珍貴嘅咖啡，Kopi Luwak年產量只有大約500kg，而每一磅零售價就要100-300英鎊。
Kopi Luwak產自印尼，Kopi指咖啡，Luwak指當地一種麝香貓(civet cat)，佢哋專揀成熟而優質嘅咖啡果實食用，果實內堅實嘅咖啡豆唔能夠消化，會原粒排出，所以叫做貓屎咖啡。而消化過程中，咖啡豆內的蛋白質會被分解，咖啡苦澀味就會大大降低。麝香貓咖啡有野生和養殖兩種，野生麝香貓專揀成熟而優質嘅咖啡豆食用，水準梗係有保證ｄ啦。至於養殖嘅麝香貓，麝香貓會被養在籠裡面，餵食咖啡豆同水果，出品參差，價錢就較低。
呢度會有專人嚟到你面前沖貓屎咖啡俾你飲，中間你有咩唔明都可以隨便問佢，佢好樂意解答同分享沖咖啡嘅技巧架，全套用具到齊，準備沖啦～
呢ｄ係已經炒好同磨碎咗嘅貓屎咖啡粉，好香，聞到真係唔捨得放抵！
索夠俾返阿哥哥佢就開始沖啦，呢位哥哥好熟手，熱水由外而內慢慢打圈咁沖～
經過幾輪嘅加水，一杯美味嘅貓屎咖啡即將誕生啦！
但唔好心急住，咖啡杯都要用熱水加熱先，以免影響咖啡嘅溫度～
原來有兩杯架，好想飲呀，快ｄ啦！
毛爸叫影相，我都唔理佢，飲咗先講，凍咗唔同味架！
貓屎咖啡有最頂級咖啡嘅稱譽，果然唔係浪得虛名，入口甘甜，完全無咖啡苦味，好似紅酒咁after taste時間好長，口裡面停留嘅係陣陣嘅咖啡香味，無飲完一般咖啡所遺留嘅酸味，叫人難忘。我淨係試咗black coffee，唔捨得加糖同奶去破壞佢嘅原味！
題外話：
學沖咖啡係我最近一直好想做嘅事，但一直無目標想去邊度學，跟邊個學，最近我個目標出現咗，不過唔知佢肯唔肯收我為徒，一切隨緣啦，既然大家互不相識，７年無見都可以再聯絡上，呢個已經係緣份，就算佢唔肯收我為徒，我都好希望再試到佢沖嘅咖啡，實在太出色啦，７年前嘅味道，我今日依然回味無窮！
飲完仲唔算數，沖完咖啡ｄ咖啡渣都要攞走做紀念品～～～
個哥哥仔仲俾咗兩粒原裝未炒嘅貓屎咖啡豆俾我留念呀！超級滿足嘅午餐～
聽日就返香港，今日真係要全力shopping啦，仲有好多order未買呀！
不停咁行同買，下午茶又係喺food court攪掂，要爭取時間～
晚餐就去咗Fuji食日本嘢，叫到一枱都係，都唔使２百蚊埋單，一個字”抵”！
宵夜有Mae Varee Fruits Shop嘅芒果糯米飯，今次仲好好彩食到一年只有11月至2月先有嘅「喔nong」，呢款芒果size比較細，而ｄ皮係青色嘅，不過就好好好甜，好好味，如果你11月至2月去記得要叫佢用「喔nong」，平時食嗰ｄ芒果糯米飯喺用「腩毒賣」芒果， 60baht一盒，不過用「喔nong」就要收80baht一盒，雖然貴少少，但真係值得嘅！
今日大部份收獲都係毛爸架！
