小毛毛上戰場

小毛毛最近生咗粒眼瘡，睇咗３個醫生有兩個醫生都建議盡快做手術切除，因為手術需要連部分眼皮一齊切除，眼瘡再大ｄ，要切除嘅眼皮亦會大ｄ，結果日後可能會導致大細眼，雖然好唔捨得都決定盡快做手術，星期日決定，星期三就做手術。　　　

毛毛已經６歲９個月，本來準備明年幫毛毛洗牙，今次手術要全身麻醉咁就順便洗埋，另外毛毛左腳亦有一粒小粉瘤，已經好幾個月，本來醫生話唔會影響毛毛健康可以唔使割，但今次麻醉可以順便割埋，我哋都覺得割咗可以安心ｄ，所以今次做埋，知道毛毛一次做咁多嘢會好辛苦，但係我哋實在唔想佢麻醉咁多次，辛苦ｄ都一次做晒，麻醉少一次得一次呀～～～

今次好多謝歡歡家嘅幫助，除咗陪我哋去睇醫生，仲有好多其他問題都幫我哋解決埋，最後連歡歡個私家大蛇餅都借埋俾毛毛用，手術前一日，幫毛毛試戴，希望佢手術後會比較容易接受呢個大蛇餅～～～

2010年1月13日，小毛毛上戰場嘅日子，11點送咗毛毛去醫生度，手術本來喺12點做，但醫生話毛毛要吊半日鹽水先做得，最後４點幾先開始做，５點幾做完，７點我打去診所問時，毛毛已經醒咗，但未走得住，要再觀察一陣，所以我哋又要再等等等．．．啦！最難過就係呢幾個鐘，等待嘅時間真係好漫長，感覺就好似個鐘停止咗，一分鐘都好難過．．．

最後等到８點幾都未接到診所電話話可以接毛毛走，我哋都唔理咁多，直接去診所門口等，最終９點半先可以接返毛毛。

毛毛一見到媽咪就不斷鍚鍚，好似話俾我知佢會乖，唔好唔要佢，唔好再放佢喺度受苦咁，佢今日已經受咗好多苦啦！見到佢咁我ｄ眼淚已經停唔到，但呢隻小毛毛真係好乖，自己咁辛苦都仲會用條脷仔幫媽咪抺眼淚，毛毛媽咪一定唔會唔要你，亦唔會再俾你受苦，你要快ｄ好返，我哋一家人再一齊去日本玩，住你最鍾意嘅日式酒店，瞓你最鍾意榻榻米，好唔好？

返到屋企已經差唔多10點，毛毛已經26個鐘頭無食過嘢，而且佢洗咗牙，姑娘話唔好食固體嘢住，好在我今日已經煲好咗山斑魚湯，第一次俾咗小半碗佢飲，好快飲晒，再過15分鐘再俾半碗佢都差唔多飲晒，飲完佢已經好攰，返到屋企一定係輕鬆ｄ，好快就瞓咗，小朋友你安心瞓啦，媽咪會一直陪住你，唔會行開！

經過一晚嘅休息，毛毛今日已經精神咗好多，不過戴住個大蛇餅就食唔到嘢去唔到廁所，所以過一段時間就要餵水水俾佢同埋帶佢去廁所，星期日(17號)覆診，拆線就要等7-10日，要覆診時先決定到拆線嘅日子，呢11日我會同毛毛一齊閉關唔出街，我哋所有食嘅同用嘅嘢就由毛爸負責供應啦！

大家唔使擔心，手術做得好好，小毛毛會好快好返，到時再約大家一齊出嚟玩啦！