毛毛的200狗月曆

毛毛月曆今日終於收到啦，本來諗住11月就訂架啦，不過懶吓懶吓

，諗住仲有大把時間，慢慢嚟啦，直到見到安安同BB嗰月曆印好咗先醒起

！都成１２月頭啦，仲要揀相，搞嚟搞去，實趕唔切啦！

哈哈，你都唔好話香港效率高，原來加拿大嗰邊ｄ效率仲高呀，Lobster知我12月尾會去旅行，佢又想我係08年尾可以收到，所以佢就趕工幫我整好同寄埋，今日終於收到，嗰月曆印刷真係好精美吖，絕對係快、靚、正嘅作品呀！

唔該晒你呀Lobster，我哋好鍾意呀！

Lobster ee我係咪同你整嘅月曆一樣咁靚呀？

嘻嘻．．．．

InterContinental - Sunday Brunch

呢排勁有食神，唔知係咪ｄ親朋戚友知我就嚟有遠行，會無啖好食，所以近排個個都約我食飯，仲有好多餐係有人請添，真係多謝晒各位，小妹願意以米芝蓮嘅身形嚟迎接各位嘅米芝蓮美食，放馬過嚟啦！

啱啱過咗嗰個星期日，得到毛爸細妹一家邀請，我哋去咗洲際食Sunday brunch，12點鐘準時去到，但見到已經人山人海啦，ｄ位仲擺得幾擠迫，心諗屎啦一陣使唔使搶先有得食架？

唔使驚，佢哋ｄ食物refill得超級快，所有食物兜都唔會有真空期，食物種類都好多，我就最鍾意食海鮮，呢個海鮮吧就最啱我啦，而呢幅相係食到尾段，準備走時先影嘅，就嚟收檔都有咁多海鮮，你諗到一開始時有多啦，不過開始時太多人圍住攞嘢，影唔到俾你哋睇～～～

我都唔記得自己究竟食咗幾多碟咁嘅組合～～～

魚生好新鮮，又多款揀！

個翅都幾好味，不過翅就少ｄ～～～

牛仔肉，鵝肝，銀雪魚同燒帶子都好好味！

食咗咁多好嘢，食ｄ菜清清個口先！

Pama ham 又係我好鍾意嘅，總共食咗３碟，味道幾好，真係睇住佢喺隻豬髀度新鮮切嘅，不過刀功就麻麻啦！　　　　　　　　　　

再嚟龍蝦，翡翠螺＋蟹！

甜品好唔掂，雖然有好多款式，但味道唔係太甜就係太酸，唯一覺得好味嘅就係嗰球Häagen-Dazs雪糕～～～　　

好睇唔好食嘅甜品～～～

埋單每人要７百幾蚊，好貴呀，如果自己俾錢我會好唔捨得嗰大半張金牛囉，有人請就多謝晒啦！

狗狗Calendar

星期四晚放工返屋企，例排去信相收埋信先返上樓，返咗一日工，對眼得返一條線咁大

，但當我打開信箱見到呢個Calendar時，對眼突然變大咗１０倍

，好鬼靚呀

！

原來係歡歡送俾我哋架，個狗狗Calendar裡面嘅狗狗全部都係我ｄ街方嚟架，好多仲成日見到架，而且每隻小狗嘅生日都mark咗係個calendar裡面，好方便，唔怕唔記得啦！真係好有心思吖，呢個calendar用完我會好好保存，多謝晒歡歡同咁多狗街方！　　　　　　　　　　　　　　　　　　　　　　　

我的近況

媽媽越嚟越懶，個幾星期都唔幫我update吓個blog，都唔知佢想點

，無嘢做都唔願郁，一日淨係撻係張梳化度，好似俾人拆咗骨，軟"lar lar"

，無晒力咁，唔知係咪之前搏命得濟

用晒ｄenergy，而家無電呢？

好啦，咁等我自己報告吓我嘅近況先啦！

星期六

我去咗PetMax買狗糧，我食開嗰隻狗糧以前係西貢買嘅，不過嗰間Pet Shop 成日都唔開，終於搞到我無糧食，不過好在俾媽媽搵到係PetMax嘅吉之家有得買，咁我哋就去行一轉啦，仲順便買埋３狗嘅餅餅返屋企嘆添！

星期日

Daddy公司family day，雖然我係黃家大小姐，但係都無得去，朝早唯有乖乖係屋企瞓吓覺啦，黃昏先同Daddy一齊出動去行街街，

平時多數都係媽媽同我落街行嘅，佢發現我識得睇紅綠燈過馬路，話俾Daddy聽，Daddy一直都唔信佢，唉！等我今日表演一次俾Daddy睇

，等佢唔好以為媽媽有神經錯亂啦！

當紅燈時我會乖乖企係度唔會亂咁郁，而一轉綠燈我就會好心急咁拖媽媽過馬路，快ｄ過啦，如果唔係會俾車車撞到架啦！咁大個人都唔識過馬路架，平時你自己出街都唔知你點過馬路嘅？

今晚我地去咗河畔花園度食打冷，其實嗰度ｄ食物一般啦，不過間間食店都有露天位，泊車只係HK$6.00/hr，帶埋我一齊去就梗係好方便啦！

連續兩日去咗街，好攰呀！返到屋企洗完手手腳腳就爬返上我個皇位度覺覺豬啦！　　　　　　　　　　　　　　　　　　　　　　　　　　　　　　　　

第二朝都唔願起身呀！