2010芭提雅+曼谷 (9 May 2010 - Day 2)

今朝都算叻，朝早起到身食早餐，早餐款式唔多，如果食開豐富早餐嘅人可能會失望，不過我哋就ok喎，因為喺泰國，基本上早餐我哋都係想食吓生果，唔想食太飽，外面仲有大把好嘢食要留返啲qouta晏啲用麻！　　　

早餐後，返房hea一陣就出發去揾食，途中見到兩隻小八八係度玩，好鬼得意，睇佢哋個樣好BB，應該未夠一歲，一隻拖鞋兩個爭，仲好好玩咁，仲唔係BB?

今日午餐去咗ZEN度食，全場得２張枱有人坐，紅衫軍再咁攪落去，其他泰國人仲使唔使揾食，見好就收啦，人哋俾晒落台階你都唔落，第日你無地自容時就唔好怪人!

又嚟叫到一枱都係，堆單都係860baht(HK$215)，真係好食又抵食！

　　　　　　　　　

碟咖哩豬扒飯先得人驚，150baht(HK$37.50)，個碟大過我個頭，件豬扒係勁大件，不過毛爸都係一個人食晒成碟，去旅行真係唔同ｄ，毛爸平時無咁大食架！

當我哋見到喱碟飯時，大家都諗起兩個人，就係大食family嗰兩位成員，大食你哋睇到喱幅相係咪好想食呢？記住喱間啦！

中場節目就係返酒店眠一眠，芭提雅下午有成3十幾40度，唔避一避，容乜易變黑人架！

係呀，你哋又估中咗啦，瞓飽又係食呀.....hehehe

以前嚟芭提雅，一定會去紅姐度食咖哩蟹，今次都唔例外，不過ｄ水準就差咗好多，ｄ蟹唔多新鮮，咖哩又唔係好夠味，最好食都算係個通菜，聽晚去揾過第2間先！650baht(HK$162)

泰國喱期唔知係唔係興小八八呢?紅姐度又有一隻八女叫大眼，佢好乖好靚女，不過就肥咗ｄ，一歲唔應該咁肥，要減吓啦！

食飽又係shopping嘅時間，PTY好好大部分舖頭都係收11點，食飽仲有大把時間行，而喱間Central係09年先開，而家PTY有ｄ咁大同咁勁冷氣嘅shopping mall就真係正正正呀！    

最估唔到嘅係有我同毛爸都好鍾意嘅泰國causelware品牌"Monkey See"喺度，以前淨係喺曼谷先有，仲以為今次入唔貨添，好，去掃貨啦！

我有兩件戰利品～～～

毛爸就得一件，唔知曼谷會唔會多ｄ款呢？