2010芭提雅+曼谷 (12 May 2010 - Day 5)

喺芭提雅hea咗4日，今日要出返去曼谷，心情有ｄ緊張，唔知出面情況點呢？

早餐後就執行李準備走人，不過發現噚日喺food court食嘢買嗰張卡唔記得退，入面仲有150baht架，又蝕咗150baht俾Central，無計啦，鬼叫我哋無記性咩！

Book咗Mr.T嘅接送10點，司機哥哥9點半已經到咗等我哋，今次架車好大好舒服，仲好掋添呀，PTY->BKK全包都係收1,000bath(HK$250)，下次再嚟PTY一定揾返阿Mr.T

而家泰國好多車都轉咗用天然氣，空氣好咗好多，但係唔知泰國政府用咩政策令ｄ人換車呢，因為我哋上年嚟都未係咁多車轉咗，但一年後轉咗用天然氣可以多成咁，連ｄ40噸嘅大貨櫃車都已經轉咗，香港政府你去學吓人啦，唔好成日喺度得個講字，人哋個政府都叫做得吓嘢都俾人反，香港人真係有好好嘅容人之量呀！

 

半路中途又嚟落大雨同行雷，大雨到出面咩都睇唔到，大家都開住死火燈行～

不過一陣間又雨過天清啦，泰國ｄ天氣就係咁，唔會有長命雨架！

中途休息站都有Starbucks，真係梗有一間喺左緊～

今次住呢間係啱啱開咗幾個月嘅新酒店S31 Sukhumvit Hotel(http://www.s31hotel.com)，我哋book間房係分兩層，地下係客廳同廚房，樓上係睡房同浴室，都幾大間，而且地點都好方面，由酒店去BTS或者MRT站都係5分鐘步程，行去Emporium都係5分鐘，喺www.asiatravel.com 度book，2,950baht(HK$735)一晚，好抵住，不過喱個價做到7月尾咋！

 

喱張床有8呎闊，點反瞓都唔會蹗落床啦掛！

午餐:Emporium food hall

牛雜河X4，我同毛爸嘅飛弗，一人兩碗

下午努力shopping，不過無嘢啱，又返酒店度hea吓囉！

晚飯前準備去同四哥請個安，坐BTS去到Chitlom（即係而家紅衫軍示威區），見到ｄ紅衫軍（大部分係女人同細路）喺度休息，得ｄ紅衫領袖喺台上發言，情況都算平靜，咁我哋就行落去4哥度啦，去到先知無開，咁就拿拿臨影幾幅相就坐返BTS去National Stadium食晚飯...

平時塞滿車嘅馬路而家全部架起晒帳篷，ｄ紅衫就係喺度住咗兩個月，見到ｄ咁情形真係有ｄ心酸...喱度係我去嚫曼谷都愛行嘅一區，而家......

附近嘅酒店係全間閂晒～～～

Siam Paragon都已經成2個月都無開啦～～～

但BTS仍然係咁多人搭～～～

 由Nation Stadium站行去建興大約要15分鐘步程，沿途見到好多揸晒長槍嘅軍隊喺度布晒陣，嗰陣先覺得情形嚴重，相都唔敢影，就急急腳行去建興～～～

建興裡面比平時少人，但係大半枱都有人坐，唔好話我哋悶，咖哩蟹同通菜係我同毛爸嘅最愛，真係食極都唔厭架，而建興更加係毛爸嘅首選！

今次我哋自己揀咗隻大蟹，所以貴咗少少，埋單1,480baht(HK$370)，隻蟹真係好好肉，貴少少都值嘅！　　　　

食飽唔敢周圍行，坐車返酒店休息啦～～～