而家個個都講資源增值，我哋呢班打工一族就梗係要增值吓啦，今日同兩個為食同事一齊放半日假，實行我哋嘅”脂源增值”之旅啦！
一點放工，兩點就去到第一站，山林道嘅”菊日本料理”，由於太肚餓，所有嘢食晒先記起唔記得影相
，第一次去呢間餐廳，好正好抵食，魚生好新鮮，雖然我叫嗰個魚生飯定食只係HK$58.00，但係佢ｄ飯係暖架，魚生好新鮮，set lunch 仲唔使加一！
一餐好滿足嘅午餐之後，就要做吓運動啦，行吓街，好快又到下午茶時間，３點３食咩呢，Toast Box呀，３個茶餐，又全部報銷，勁！
上次去小吉家姐屋企見到佢張著鞋櫈好靚，今日出到城，更係要去睇吓張櫈仔仲有無存貨啦，就係呢間啦！佢嘅木器好靚，全部都唔用釘，係用入"筍"嘅方法做架！
就係佢啦，對佢一見鍾情，得返一張新貨咋，落咗訂，裝修好就帶你返屋企吓！老板好好人，同佢傾咗成個鐘，一位好可愛嘅伯伯，教咗我好多木嘅知識，呢張櫈係用春花木做架～～～
Shopping 完，又嚟食晚餐啦！今次去咗一間好耐無去嘅泰菜餐廳”泰禾美”，間餐廳係一位泰國人開嘅，老板娘好多年前嚟香港做泰傭 ，之後開咗一間得兩張枱嘅小店，嗰陣時我同毛爸好鍾意去同成日去，因為有ｄ似食私房菜咁，老板娘一邊同你傾計，一邊整嘢你食，好親切架！搬咗去而家呢間舖之後，反而少去咗，今次再嚟，個通菜依然咁好食～～～
串燒同蝦餅都超正呀！
呢個咖哩蝦就麻麻地，都係咖哩蟹好食ｄ～～～
芒果肉鬆炒飯......1個字”正”～～～
老友小鄉菇仲買埋外賣返去俾菇爺食，真係一個賢妻.....我要好好學習吓先！
返屋企前，仲要去口甜舌滑買埋碗楊枝甘露外賣先罷休，今日嘅”脂源增值”之旅亦都完滿結束啦，３個人抱住３個大肚腩返歸啦！
菊日本料理
地址 : 尖沙咀山林道4-4A地下
電話 : 2986 3337
Breadtalk & Toast Box
尖沙咀廣東道30號新港中心地下G18號舖
電話 : 2111 1841 / 2111 1842
永安號
地址 : 油麻地上海街335-339號
電話 : 2385 9891
泰禾美
地址 : 九龍城龍崗道6號地下(清真牛肉館斜對面)
電話 : 2718 3173
口甜舌滑
地址 : 九龍城衙前圍道7號A地下
電話 : 2718 2328
