今朝一早送咗隻小魔怪去嫲嫲度
，咁就順便買兩打蛋撻俾表妹做手信，佢同我都係最鍾意食曲奇皮嘅蛋撻，每次去BKK問佢要d咩手信，佢一定答我"買兩打超群蛋撻吖，唔該!”佢最高記錄係一次個食四個!!!!
雖然係中午時間嘅飛機，但係遲咗個幾鐘起飛再加上BKK好塞車，去到酒店已經差唔多5點啦!
係機場攞行李嘅時候，見到有隻狗仔係度做緊檢疫手續，所以又去八吓，剩底毛爸一個人係度等行李，自己都幾衰喎!
我最鍾意住新酒店，貪佢又新又平吖嘛!不過今次呢間有d失望,諗住係5星應該都會幾好喇啩!點知係check-in嘅時候已經俾蚊針咗兩啖，係泰國我好少俾蚊針架，係香港訂房時話有得upgrade，嚟到又話d房full晒，無得upgrade，咁都算啦，返到房睇吓，以泰國5星級酒店房嚟計，間房算係超細，仲有最重要係無免費上網，4星級酒店都有啦，仲話自己係5星嘅business hotel喎!仲有最賤格係佢哋提供嘅上網收費係350baht/hr，而出面d wifi 係收90baht/hr，佢都知自己唔夠人哋吸引架喇，咁就索性block晒其他d網絡，你淨係可以用佢提供嘅網絡上網，你話咁係咪等如搶吖! 5星喎!
不過都算數啦，今次係因為有ｄ開心嘢嚟還神嘛，唔同你計較啦!
放低晒ｄ行李就梗係第一時間去拜四面神啦！
今日晚餐當然係毛爸最愛嘅咖喱蟹同泰式炒通菜啦，毛爸超鍾意食，碟蟹放底之後，佢就一句嘢都無同我講過，直到食晒枱面所有嘢先再同我講返嘢，真係"豈有此理"喇!
又係食到一半先記得影添!
好快就渣都無得剩啦!
可能第三晚都係喺呢到食架啦~~~
5星!? ....係細咗啲喎.....唔似business....似精品酒店....算喇, 最緊要還神愉快啫
回覆刪除[版主回覆06/30/2008 12:10:00]我都係咁話,唔同佢計較啦,不過下次就一定唔住佢啦!
喂，老友，好似我地上次住嗰間正Ｄ喎！
回覆刪除[版主回覆06/30/2008 12:11:00]唔係正d, 係正好多呀!
ee 係機埸見到有狗仔做檢疫又去八下...唔通....毛毛想去泰國
回覆刪除[版主回覆06/30/2008 12:12:00]都想架,不過要幫毛毛剪晒d毛先去得,泰國好鬼熱架!
間房真係細咗啲喎﹗
回覆刪除[版主回覆06/30/2008 12:14:00]係囉,東京就差唔多,泰國起碼要大50%先合格吖!
如果 5 星就真係差 dd
回覆刪除[版主回覆06/30/2008 12:16:00]豆豆真係有口德啦, 我覺得最多俾4星佢!
咖喱蟹 ~ 咁款都可以算係 食到一半嘅 -----蟹爪都冇隻, 不過仲有咖喱....
回覆刪除[版主回覆06/30/2008 12:21:00]D 咖喱汁先係精華嚟架,有人剩係叫汁架咋,呢度有成半碟汁架啦! 我同毛爸都鍾意先苦後甜,食晒d蟹先,好嘢留返最尾食!
呢間酒店叫咩名？等我下次去曼谷留意吓先。
回覆刪除[版主回覆07/01/2008 00:48:00]唔記得幫佢賣吓廣告添, 記得唔好住啦!
Centara Grand at CentralWorld
我兩老都係曼谷痴, 以前一年去兩次, 不過近呢兩年發覺多d人去租serviced apartment住仲開心, 好似以前後生去camp咁.
回覆刪除[版主回覆07/02/2008 19:36:00]我哋都係一年最少去兩次架,最高記錄係4次! 其實我哋前兩次都係住serviced apartment架,不過今次見佢夠新,地點又好先落答咋!
4次..... 真係慶幸毛毛有個好嫲嫲呀!
回覆刪除[版主回覆07/04/2008 14:20:00]我都係咁話, 無個好嫲嫲,我哋邊有得周圍去吖 !
嘩..個厠所好大咁..好似大過間房咁........
回覆刪除[版主回覆07/04/2008 14:17:00]咪係囉,今次係住五星級嘅厠所~~~