復活節＠麗豪

好攰呀，已經連續去咗兩日街啦，仲去呀，唔好啦，俾我瞓多陣得唔得呀？

我已經不支倒地啦，你哋放過我啦，Daddy媽咪你哋幾時先放完假架？

好啦，見你哋咁想，咁我陪埋你哋今日啦，去麗豪食Brunch好唔好？

唉！佢哋兩個為食精一食又３個鍾，返屋企瞓個晏覺，又係我開餐嘅時間啦，我有幾攰？你睇吓我食飯都坐係度就知啦！

食完飯仲要去婆婆屋企同兩個表妹仔玩呀，真係攰屎狗啦，聽日係我嘅休息日，邊度都唔去，Daddy媽咪你哋放過我啦！

 

復活節@MoMo Home - House warming

細毛毛搬咗屋成個幾月，今日我哋成班朋友仔去搞吓佢屋先，因為各位媽咪有正經嘢做，所以佢哋３點已經去咗細毛毛屋企啦，日本狗狗團好快就出發啦，大家唔好誤會，我無份去架，係媽咪唔抵得人哋有得去，係要早ｄ去襯吓熱鬧喎！

我都話CoCo好嗲架啦！

細毛毛同金菇大戰咗幾十個回合，由天光玩到天黑都唔攰嘅？

金菇好得意架，媽咪罰佢坐，佢可以好乖乖坐好耐都唔郁～～～

成枱都係嘢食，今日大家要落力ｄ食啦，歡pa仲特登去西貢買咗ｄ新鮮魷魚，親手片剌身我哋食，藍色嗰兩碟就係啦，好好食！

CoCo媽可唔可以抱埋我呀～～～

星星好乖，無蝦小朋友，仲同佢合照添，我就一定唔得啦，唔吠都會"wu"佢呀！

個個阿媽都係廿四考架，攬住自己個女就滿足晒，有相為証架！

今日又有驚喜呀，成班朋友仔同我慶祝生日（梗係順便幫埋媽咪啦），多謝晒你哋呀！　　　　　　　

玩吓食吓終於搞到11點先捨得返屋企～～～

＊＊＊＊＊由於媽咪嗰晚偷懶，影得好少相，所以呢篇blog大部份嘅相都係喺星星同細毛blog度偷嘅，唔該晒星星媽咪同細毛媽咪借ｄ相我哋用呀！＊＊＊＊＊

復活節＠彭福公園

復活節假期第一日，媽咪都算係咁啦，朝早９點幾就帶我去玩啦，Daddy今日要返半日工，好在歡pa好人，今日我可以坐歡歡車去玩！

今日有歡歡，CoCo，同星星同我哋一齊出發去彭福公園玩，天氣好正又唔曬，真係一個好開始呀！

佢係CoCo，好嗲架！

CoCo媽咪架相機真係好正，你睇影到我幾咁眉清目秀！

歡歡又勁跑啦！（呢張靚相喺歡歡blog偷架）

星星都玩得好開心

呢位小朋友想挑戰歡歡喺媽咪心目中嘅地位喎

玩到差唔多12點就同ｄ朋友仔去食午餐啦，等埋Daddy放工，我哋就去咗新城市廣場揀生日禮物，今日有得玩有禮物，日日都係咁就好啦！

媽媽和毛毛的生日

媽媽噚日放工好準時返嚟，跟住同我講管理員叔叔話我有信收，叫我落去打返隻手印簽收喎，就係呢封啦！邊個咁好寫信俾我呢？

原來係３個靚仔LoNickB送俾我嘅生日禮物呀，多謝晒力力，佬佬同哈比仔！你哋真好記性同有心，我好鍾意呀！份禮物原來係一隻香蕉，雖然我９號先生日，媽媽可唔可以而家開俾我玩，我好想要呀！　　　　

俾媽媽影咗一張之後，玩玩玩.....，媽媽唔好阻住我玩啦！

噚日係媽媽生日，佢話想靜靜地過（通常年紀大嘅人先咁諗），咁Daddy都好識做，揀咗可以同我一齊去嘅泰屋同媽媽慶祝生日，之後就梗係會去”泛后”食埋媽媽最鍾意嘅甜品”楊枝甘露”啦，媽媽話去邊度食飯都唔重要，最緊要同埋我一齊就得啦！　　　　

媽媽噚日都有生日禮物收，係佢想買咗好耐嘅netbook呀，Daddy好耐未試過買到咁啱媽咪心水嘅禮物啦，噚晚Daddy攞滿分！

食完飯返屋企已經好夜啦，媽咪唔俾我玩蕉蕉，今朝一起身第一時間去搵返隻蕉蕉先，蕉蕉呀，蕉蕉好耐無見啦！

毛毛的第2個家

呢排成日去嫲嫲度住，等我介紹吓我係嫲嫲度嘅傢俱啦，我有私家床同地毯，都係長期放喺嫲嫲屋企架！

仲有食飯用嘅枱墊同水兜都係嫲嫲專登買俾我用，好靚架~~~

每次開飯我都好心急係廚房等架，嘻嘻．．．

呢兩日，我屋企嗰兩個為食精，連續２日去咗沙田麗豪食Brunch，佢哋話好耐無去，一定要去多ｄ補返數喎，我就淨係得個睇字囉！麗豪嘅Brunch真係好正，兩個為食精食咗４款主菜，仲有好多又新鮮又好味嘅沙律同甜品，佢哋真係咩本都返晒啦！

呢度ｄ哥哥姐姐都對我好好架，你睇吓有乳豬全體一隻！

我雖然無得食，不過有街去，有車車睇已經好開心啦！