希望工程 - 第28天(25-10-2009)

連放三日假都無太多時間陪毛毛去玩，朝早同佢去麗豪食個brunch就開始我哋今日嘅緊密行程啦！　　　　　　　

首先返屋企，睇吓裝修進展如何，所有磚已經舖好啦！而且仲舖得好靚，磚與磚之間嘅空隙舖得好平均，而且師父仲特別幫我用咗啡色英泥嚟舖磚與磚之間嘅空隙，咁個地望落去就唔會有一個個白色格仔啦！

廚房同廳嘅燈槽都已經完成，我個廚房揀咗隻１ｘ３呎嘅磚，要舖得靚都有難度架，不過師父依然完成得好好，真係唔該晒！

牆已經批滑，底油都已經油咗，而房連面油都油咗，不過房嘅顏色同我心目中嘅顏色有好大嘅出入，深咗好多，而且仲有ｄ"娘"添！好唔開心呀，即刻打俾師父，師父話唔鍾意可以油過，唔使擔心喎！隻色係我哋自己揀嘅，今次出事唔關師父事佢都肯同我哋油過真係唔話得！又唔該晒啦！

跟住再去傢俬公司confirm埋ｄ傢俬嘅呎吋，早兩日傢俬公司已經上嚟覆咗呎，今日就要揀色同confirm傢俬最後嘅間隔同款式，足足傾咗４個半鐘頭，之後仲要去睇埋梳化，晚飯都無心機食，只係買咗ｄ外賣返酒店食咋！

裝修真係一件需要好多時間，金錢，心機同耐性嘅事！

毛毛今日跟足我哋一日，喺傢俬公司佢都係自己喺佢架車仔度瞓吓同望吓行過ｄ人，無搞搞震，好乖，返到酒店佢食咗晚餐之後就瞓到一隻豬豬咁啦！

傢俬要５個星期先起貨，而安裝最少要３日，所以我哋最快都要１２月頭先可以搬返屋企呀！

有無咁好玩呀？

去嫲嫲度做咗５日嘢（幫嫲嫲看門口呀），今晚可以放假返去Daddy同媽咪度啦，我每日嘅人工係雞條一條，好抵請架！

早兩日媽咪又買到我最愛嘅龜龜公仔，放咗係我張床床度等我放假返嚟玩，我好鍾意佢架，已經玩爛咗４個，呢個係第５個，一見到佢就咬咬咬．．．

足足咬咗個幾鍾，之後就不支倒地，覺覺豬啦！

希望工程 - 第14天(11-10-2009)

呢個星期大部分時間都係揾電器，為咗廳嗰部兩匹冷氣，身邊嘅朋友同師父幫我搵晒幾乎全港嘅大小電器舖，批發商，連日立個倉都揾埋先揾到一部日立兩匹冷氣，而家成個香港都無晒兩匹冷氣，咩牌子都無，最快要等到十月尾先有新貨到呀！又話經濟唔好嘅？好在搵到咋，如果唔係就會影響我哋嘅裝修進度架啦～～～

經過冷氣呢單嘢之後，決定一次過訂晒所有要買嘅電器，我要準時搬返屋企呀！

今次裝修好好彩，有好多街坊鼎力協助，又其事Foon pa，我哋嘅專業電器顧問，所有關於電器嘅問題佢都幫我哋一一解決，仲要幫我哋講埋價，訂埋貨，等我哋慳咗唔少時間同＄＄，搞足佢成個星期，真係唔該晒！

又到Weekend，好開心，可以接返毛毛，無見佢幾日，好痴身呀，我沖涼佢都會喺浴室門口等我，忍耐吓啦小朋友，好快可以返屋企住架啦～～～

毛毛 ： 好快即係仲要等幾耐呀？

星期日同毛毛一齊返去睇吓間屋先，呢個星期，師父們全力做電同水嘅嘢，所以間屋嘅外觀同之前無太大嘅分別，只係燈槽已經見到初型啦！

呢ｄ係以前嘅冷氣喉，裝得好求其，師父話會幫我哋跟返正佢～～～

房嘅燈槽已經完成咗～～～

希望工程 - 第7天(04-10-2009)

星期五，接返小毛毛同我哋一齊，24小時看實佢，有我哋係佢身邊佢就唔會吠，你哋睇佢個扮乖個樣都呃得吓人架！

呢兩日我哋去邊都會帶埋小毛毛，地盤都要一齊去呀！

兩間房打通之後，因為有條氣喉唔拆得，唯有加個燈槽去收埋佢！

拆咗牆之後，留抵好多線同喉，今日要同師父研究，ｄ線同喉嘅去同留問題！

搞完仲要去傢俬公司傾埋ｄ櫃嘅間隔，毛毛跟住我哋忙咗一日，返到去攰到佢呢...　　　　　　

小毛毛瞓醒起身又嚟揾食啦，噚日Foon ma送咗個Three dog月餅俾毛毛過節食，點知老人痴呆嘅阿媽唔記得，今晚追月先醒起！

毛毛為食樣逐格睇！　　　　　

毛毛：益力多味月餅，好好味，多謝晒欣ee！

希望工程 - 第4天(01-10-2009)

今日返去睇吓間屋，嘩！已經拆到全部爛晒，行都行唔到入去睇，師父話聽日會清泥頭，到時就可以睇到拆清晒之後嘅效果～～～