曼谷之旅(4-8 March 2009)

今年嘅大假其實已經用得七七八八，但係ｄ航空公司好似驚你ｄ假同錢使唔晒咁，不斷咁掉ｄ平假機票出嚟去測驗你嘅定力，當然我對呢ｄ引誘係一ｄ抵抗力都無嘅！所以又放抵咗毛毛同毛爸去咗曼谷５日，順便同毛爸慶祝埋生日～～～

３月４日我哋一放工就坐夜機去曼谷，返到酒店已經夜間11點幾啦！今次又係住我哋最鐘意嘅Grand Centre Point，仲要今次好抵HK$660.00一晚仲包早餐，之前差唔多要成千蚊一晚架，你可以想像到曼谷而家經濟有幾差啦....

今次真係無特別要做嘅嘢，第２朝食飽早餐去同四面神請個安之後就開始我哋嘅食、揼、同買之旅啦！

今次去咗一間叫頌通嘅地道泰菜館食咖哩蟹，好好味，ｄ蟹又新鮮又大隻，仲好過我哋次次都一定要去嘅建興，不過今次都有去建興食，但已經覺得頌通已經代替咗佢一哥嘅哋位啦！嗰日我哋３個人食飯，叫咗一隻1KG嘅蟹，６隻燒中蝦（普通，燒大蝦好食ｄ），蠔餅（非常正），蝦餅（麻麻地），炒通菜（無得頂），3個白飯再加２個椰青，埋單都係HK$385.00，好抵呀！

另一個重要節目就梗係買啦，今次因為係坐AirAsia，每人只可以寄15KG行李，所以大家買嘢都緊手咗，費事俾人罰錢啦！

我淨係買咗呢６件Tee咋！

毛爸生日，收獲一定多過我啦，除咗５件Tee，仲買咗２條短褲，一條牛仔褲，仲一對鞋，邊個話女人鐘意買嘢多ｄ架！

仲有ｄ日常用品都幾平，掃ｄ返嚟先！

今次毛毛都有份吖！

好可愛嘅彩色棉花糖，買俾阿哥兩個女嘅～～～

有個friend係米奇老鼠fans，佢就嚟生日，買定返嚟送俾佢，一定好鐘意啫！

呢ｄ係朋友叫我代買嘅，牙膏就係自己嘅，呢ｄ細支牙膏香港賣成１０蚊支，呢度唔使３蚊支咋，買定去旅行用慳唔少呀！

今次做得最多嘅就係揼骨啦，日日都去，好爽呀！

曼谷經濟真係跌得好勁，所有百貨公司都做緊大減價，起碼都有７折，好多半價，但係都無人行，boots嘅化妝品同護膚品，全部買一送一，SPA間間都半價搶客，係我去咁多次泰國都無見過嘅，呢個海潚真係好勁，希望佢快ｄ過啦！

毛tel又有顧客入住啦！

我兩個朋友仔星期六又嚟咗我屋企陪我玩兩日啦，Creamy已經係我間"毛tel"嘅榮譽顧客，熟晒架啦，一嚟到就識得自己去揾嘢玩～～～

玩攰咗又識得自己入我個飛機籠瞓，最唔使媽咪照顧，所以媽咪日日都讚Creamy乖架，其實我都唔錯吖，攞晒ｄ玩具出嚟招呼朋友架！

星期日早餐我哋食三文魚同南瓜～～～

下午就去咗PetMax買狗糧，最初媽咪想帶晒我哋３個去架，不過驚搞唔掂，有咩閃失，去邊度揾個女俾人呀，最後想咗好耐，都係淨係帶咗我一個去！

媽咪見我同Cola早餐都食剩ｄ三文魚，驚我哋唔鐘意食，所以晚餐就再整埋鴨胸，今餐"正"囉，有三文魚同鴨胸，仲有媽咪唔知我哋唔鐘意食咩，所以唔敢"撈"，想測試吓我哋唔鐘意食咩，其實佢都傻傻地嘅，三文魚同鴨胸都係我哋食開嘅，淨係南瓜係新加嘅，我哋梗係唔鐘意南瓜啦，仲要試．．．．

喂！開飯啦～～～～～

唔使５分鐘，報告就出咗啦，Creamy最乖幫媽咪洗堆碗添！

我其實唔知點解好驚Cola架，媽咪叫我影幅相啫，就搞成咁嘅樣啦！

我都係鍾意Creamy多ｄ，企呢邊就無問題～～～

兩日好快就過咗啦，Creamy同Cola要返屋企啦，我哋又準備去大埔食飯，所以順路送埋佢哋返屋企，我同Creamy一早坐好等開車啦，Cola你唔走呀？

呢度好食好住，我唔走住吖，你哋走先啦！

Daddy返嚟啦！

星期日我同媽咪都無街去，天陰陰，無嘢做，最好就梗係瞓瞓瞓啦！

夜晚媽媽話帶我去接Daddy機喎，你講笑咋係咪呀，你揸得掂Daddy架車咩？搭的士咁貴你又唔會捨得，咁點去呀？

嘿！我都唔相信呀，我媽咪竟然帶我去坐巴士喎，佢最怕俾人話架啦，又驚俾人捉到要罰錢喎，今次竟然咁大膽！好！咁我就同你合作吓啦，全程車我都乖乖俾媽咪抱住睇街街，無吠

，無攪攪震

，唔知有無雞條做獎勵呢？

又話去接Daddy，一去到機場，媽咪就去咗板前買壽司食，仲要走去星巴整杯咖啡添，喂！媽咪，幾時先去接Daddy呀？

當媽咪飲飽食醉之後，佢終於肯同我去等Daddy啦！

好嘢，好嘢，好快就見到Daddy啦！

媽咪，點解我去旅行返嚟嗰陣唔係行呢度出嚟嘅？你有無去錯地方呀？

等得好心急呀！

見到Daddy時，媽咪可能好似我咁開心，連相都唔記得幫我影呀！

"爹"完Daddy之後，我哋又坐巴士返屋企啦，不過因為好耐無見Daddy，好興奮，喺巴士度兩頭郁，最後梗係俾媽咪罰坐監啦！

掛念Daddy的日子~~~

我已經兩日無見過Daddy啦，媽咪話Daddy去咗峇里上trainig，唔帶得我同媽咪去，星期日就返架啦，但係今日先星期五咋喎，咁咪有排等囉！

我而家成日都望住個門口架，好想Daddy快ｄ返嚟陪我玩呀！

我連瞓覺都會望住個房門口架，Daddy返嚟，我一定係第一個知！