狗狗伊豆探秋之旅-準備篇(4)

今朝一早媽媽返到公司第一時間就係開email睇吓日本嗰邊有無覆佢貨運機位嘅問

題,一打開個email見到有回音喎,即刻開心到彈起,點知人地係對我地嘅order有

問題,要mama再打俾漁農處同國泰貨運嗰邊查清楚付貨單同提貨單嘅問題,mama

就好緊張咁週圍打電話,最後都係有驚無險咁攪掂咗,大約係下午3點幾,mama已經

收到香港國泰貨運打電話嚟同佢confirm我同小吉係日本返香港嘅機位啦!嗰個哥

哥仲好好人咁教咗mama一次回香港接返我地嘅程序,唔知佢係咪知我mama無記

性,仲留抵咗2個電話俾mama話有咩唔清楚可以隨時打俾佢地問吓,仲係24小時服

務潻架!

mama收咗線之後,個口就有成十分鍾合唔埋!!

就係好似呢個公仔咁,要過一段時間先冷靜到!

都唔怪得佢嘅,因為呢個係最難攪嘅一關!!

噚日我地返婆婆屋企食飯,東東舅父問起我地幾時去日本同幾時返,媽媽話咗俾佢聽,

順便問吓D提貨嘅程序,因為東舅父以前成日都要去機場提貨架,而家就少D,點知東

舅父話我地返嚟嗰日會去機場接D大人,順便車佢地去貨運站,幫佢地攪提貨D嘢,等

佢地可以快D接返我地兩隻小鬼喎!媽媽知道東舅父好忙,所以就無叫佢接我地,

不過東舅父話唔緊要喎,夜晚會好D無咁忙!可以同老細講早D走都無問題!媽媽話

東舅父自細都好錫佢架啦,估唔到而家錫埋我喎!!東舅父我會提媽媽買返份大手

信俾你,舅母同我兩個表妹仔架啦!!

媽媽話聽日再向日本政府申請辦理埋我同小吉由日本返香港嘅出口批文,手續就攪

得差唔多啦!剩底嘅就只有出發前健康証明咋!一定要好好慶祝吓啦!!

 

愉快的週末同週日!

星期六一早Daddy就叫我去叫我個懶媽媽起身,七點幾咋!咁咪即係叫我去俾媽媽鬧,

唔制,D咁危險嘅嘢我唔做架,我係小朋友嚟架咋!見我咁驚Daddy維有親自出馬啦!

今次媽媽好順灘咁起咗身喎!原來今日約咗嫲嫲同爺爺入西貢飲茶,因為嫲嫲同爺

爺飲慣早茶,所以咪咁早囉!

未夠9點已經入到西貢,原來我地去開嗰間茶樓,一早係唔使俾茶錢架,仲係現金交易,

唔使用點心咭,攞幾多籠就俾幾多錢,媽媽話佢都好耐無試過啦!今日仲要食到傳說中

嘅馬拉糕潻!我地大大話話去咗嗰間茶樓十幾次,今次係第一次食到咋,都真係幾好

食,我一隻小狗都食咗三分一件(因為嫲嫲同我一齊坐,係嫲嫲喂我食,Daddy同媽媽都

唔夠胆出聲)

飲完茶就去咗行海濱做運動,之後就送嫲嫲同爺爺返屋企,媽媽就繼續發埋佢個夢嘅

下半場!一返到屋企唔使三秒,媽媽已經瞓着咗啦!夜晚我地一家三口又返嫲嫲

屋企"痴"餐啦!

星期日,都係家庭日,今日又可以去酒店食嘢啦!今日小j姐姐留咗D好大粒嘅車厘茄俾

我食,真係又甜又好食呀,仲話第日再有就再留俾我食潻,小j姐姐真係好人啦,毛豬豬

鍚晒你吓!媽媽今日又迫阿大厨哥哥炒佢最鍾意嘅AOP意粉俾佢食,佢今日又成功

咗啦!唔知阿大厨哥哥會唔會好驚見到媽媽呢?次次都要佢老人家親自出馬!

另外今日見到Kim哥哥嗰兩隻小狗嘅相,好靚好得意呀,唔知幾時可以見到佢地呢!

狗狗伊豆探秋之旅-準備篇(3)

由資料搜集,驗血,填表申請,訂機票,租車,訂酒店,買保險,買飛機籠,攞健康證明...仲有

好多好多煩覆嘅手續,佢地四個大人攪到氹氹轉都係想我地兩隻小鬼感受一

下小動物應該得到的真正待遇,媽媽話香港人對狗狗嘅態度可以做到日本人嘅十分

之一已經非常之唔錯啦!所以我同吉吉一定會好好珍惜佢地四個大人嘅心意,玩得開

開心心,仲會聽聽話話添!不過,我同吉吉車就坐得多啦,但係飛機都係第一次坐咋,唔

知會點嘅呢?好期待呀!!

今日媽媽連我地兩隻小鬼係日本返香港嗰程貨運都已經出咗e-mail 訂咗啦,因為日本

嗰邊小狗貨運只接受一個月內嘅申請,所以要到星期一先可以confirm到我地小狗嘅

機位,我諗應該無問題卦!

如果貨運機位無問題,媽媽話再向日本政府申請辦理埋我同小吉由日本返香港嘅出

口批文,手續就攪得差唔多啦!剩底嘅就只有出發前健康証明咋!

狗狗伊豆探秋之旅-準備篇(2)

由5月中到10月,媽媽,Daddy,auntie小吉媽同uncle大吉都各自發揮佢地嘅強項去準備我

同小吉呢個夢幻之旅!媽媽咁懶更係負責做D唔使點郁嘅嘢啦!就係負責係網上搵

資料同出email啦!Daddy就負責做柴可夫司機同出發日嘅行程準備.Auntie小吉媽識

得人多,就負責幫我地問D帶過狗狗去日本嘅姨姨同叔叔攞料!Uncle大吉就負責

晒我地係香港要攪嘅手續,仲要包埋送件添,真係幫媽媽摼返唔少假同腳骨力!!

uncle大吉同Daddy 係我地今次行程嘅工程師,我同小吉坐飛機用嘅籠,佢地都用咗唔

少心機幫我同小吉安排掛食物盒的小鈎(要又靚,又安全,又好用,又容易清潔),裝係籠

底嘅轆(要易裝,易拆又可以鎖)!我同小吉錫晒你地呀!

Daddy 同 mama上次去旅行,都已經幫我地搵晒出發嗰日要去辦手續嘅地方!

狗狗伊豆探秋之旅-準備篇(1)

今年一月我個傻媽媽,Daddy,Volia姨姨同uncle Peter,一行四人到日本伊豆行咗一

轉,係嗰一次旅程裡面我媽媽見到好多狗狗嘅設施,樂園,商店同好多好開心嘅主人帶

住佢地嘅寶貝到狗狗樂園玩,媽咪見到簡直羨慕到痴咗線!於是就話佢已經搵到佢

2007年度嘅目標同大計(我媽媽幾十歲人都未試過話有目標同大計架!今次大鑊啦!)

媽媽係日本返嚟之後就不斷咁搵資料同睇資料,終於媽媽出手啦!2007年5月13號媽

媽帶咗我去醫生叔叔度,無端端話要抽我D血血喎! 嘩!一聲就俾醫生叔叔抽咗D血血

啦,佢話驗完血之後180日我就可以去日本浸溫泉同識返個日本仔喎!日本咩嚟架?我

淨係知我隻手手好痛咋!

呢D就係我媽媽嗰次買俾我嘅手信啦!你可以想像得到佢當時受咗幾大刺激啦!

BBQ

今日我地幾隻小鬼去咗Helen ee屋企燒嘢食,Helen ee約咗mama三點,不過我地兩點幾

 

已經到咗,點解咁早?一來我地一家三口,今日係坐小吉順風車,小吉有個咁專業嘅柴

 

可夫,點會遲呀!二來,我個傻mama咁懶,有人整埋等佢去食喎!仲唔拿拿臨去咩!

 

一去到已經有大埔馳名砵仔糕食啦!mama好貪心食咗一個半,雖然佢有俾"暗"口費,

 

不過太少啦!

 

大概5點我地就開始燒海鮮大餐啦!有鮑魚,花甲,大蝦,花蟹,大眼雞...D海鮮多到我都

 

記唔晒!仲有好多好多其他嘢食,D大人足足燒咗5個鍾頭先燒到七七八八咋

 

今日mama就最幸福啦!因為燒完嘢食,Helen ee整咗mama最鍾意嘅甜品Trimisu,而auntie

 

小吉媽又準備咗mama另一個甜品至愛芒果布甸,仲有一盒攞返屋企食潻!

 

mama唔知做咗D咩事,兩個ee都對mama咁好嘅

 

又飲又食足足攪咗Helen ee 一日,我地D小鬼同大人個個都攬住個肚咁返屋企!

 

今日有一個Crystal姐姐係我第一次見架咋,不過唔知點解又好鍾意佢喎,仲錫咗姐姐

 

一啖呀!於是姐姐就回敬返幾幅靚靚相俾我!

 

 

 

 

點解mama 咁忙?

近幾個月mama好似好忙咁,對住部電腦睇呀睇,查呀查,又對住d紙係度猛咁填,早一排

仲買咗個籠返嚟話幫我做飛行訓練,等我遲d坐飛機唔使咁驚喎!都唔知攪咩!

你睇吓我嗰樣就知我幾適應啦,仲使乜做訓練啫!