2014 英國巴庫＋冰島＋日本東京 Day 1 (17 Sep 2014 Wed)

2014 英國巴庫＋冰島＋日本東京 Day 1 (17 Sep 2014 Wed)

HK → London (LHR)

BA26 Hong Kong (HKG-T1) → London (LHR-T5) (23:15-04:50+1) 12:35 hrs (5,990 mls)

冰島一直喺我個must go list裡面，但真係估唔到佢會係排到而家先去得成，第一次想去時因為佢爆火山所以取得咗，覺得好可惜！

今次準備去時冰島又嚟爆火山，早幾個星期心情就好似坐過山車咁，上上落落，好不刺激呀，我應該真心好想去冰島，毛爸叫我做定個後備plan，如果真係爆火山就即轉...但佢叫咗我５日，我就一隻字都未寫到出嚟，所以都係決定唔轉啦，勇往直前！

之後加入咗一個台灣朋友開嘅冰島互助group，呢個group主要係俾最近去冰島嘅朋友互通消息同有咩事情發生時可以互相幫助，初初大家一聽到爆火山就好驚，諗要唔要轉地方好，到最近已經爆咗好幾次後，大家都已經好大膽，只係希望爆火山唔好影響航空交通，有機飛到去冰島就一定去，對於未見過溶岩嘅台灣人同香港人，對睇到爆火山都由驚慌變成期待！

(photo from Almannavarnadeild ríkislögreglustjóra)

去冰島前，我哋會先去毛爸讀大學時住嘅Bath行吓，聽講呢度好靚，沖上雲霄II都係喺呢度拍，本來毛爸畢業時我有諗過嚟睇佢行畢業禮，不過嗰時佢未係我正式男朋友，所以都係唔好咁益佢啦，到時以為我好易追咪弊...XDDD

呢個行程一年前已經開始plan，點解要咁早？因為又想用積分換商務位囉，如果唔係一出即book係無可能換到，點知人算不如天算，又換唔到商務位焗換頭等！換機票呢家嘢真係一門高深學問，我Ｄ分其實唔夠換CX頭等，因為一張要180,000分，但如果我用oneworld個計法頭等飛就只係要155,000分，但條件係要有聯盟裡面三間唔同嘅航空公司去組成呢張機票，所以最後揀咗停埋東京，咁樣去多一個地方又可以用少Ｄ積分，真係好抵！

詳細教學可以參考呢度：
http://www.travellife.org/forum/forumdisplay.php?fid=76

我都睇咗好多好多次先明白，想換飛嘅朋友們加油呀！

今日如常返工，放工返屋企攞行子就出機場，今年d假好緊，慳得一日就一日，今程坐英航～

英航喺香港係用Qantas個貴賓室，同CX比，真係差好多～

食物款式唔多，不過好在啱食～ 

有我最愛嘅菇菇^^

23:15 準時上機！

一上機就有禮物，不過點解無拖鞋呢？

空姐見我哋兩個大鄉里影得咁開心，主動話同我哋影合照，又影得唔錯喎！

有人一上機就俾人打暈咗，晚餐都無食，一直瞓到食早餐先醒，悶c我，好似我自己一個人坐飛機咁！

 不過英航就算頭等d伙食都係好慳，食唔飽，味道好一般，毛爸瞓咗無食都無蝕底！

生果竟然咁樣上，真係第一次見！碟同刀都係我問佢攞先俾...

 戲又唔啱睇，我食飽就瞓，瞓咗足足9個鐘，仲多過喺屋企瞓！

瞓醒又食，早餐個生果就正常d啦，切好晒！

呢個蛋餅幾好味，不過個早餐仍然係食唔飽囉，其實係咪我大食咗呢？點解餐餐都唔飽架！

我好珍惜個早餐架，食晒，一粒都無剩！

晨早4：30準時到達倫敦！旅程正式開始啦！