2013 玻利維亞+南極 - Day 17 Charcot Port / Lokroy Port (Antarctica)

2013 玻利維亞+南極 Day 17 (22 Feb 2013 Fri)

Cruise day 5 - Wilhelmina & Port Lockroy (Antarctica)

噚晚船長話，如果今日好天，朝早就俾我哋坐Zodiac遊吓Wilhelmina Bay，一起身好天呀！

房個大電視已經出咗今朝個行程，今日我哋係第一組出發，早餐都趕唔切食，每次出發我哋都係喺Main Lounge集合，而船嘅安排都好好，知我哋好趕，放咗Ｄ牛角包，乳酪，生果同新鮮果汁係Main Lounge，等我哋幾趕都好，都有Ｄ嘢落肚，抵讚呀！

大家都準備好出發啦！

每次毛爸落Zodiac都係最擔心整濕部相機

今日我咊坐Sophie艇！

出發啦！

今日呢度好多碎冰～

不過都係一個好平靜嘅海灣！
本來今日淨係遊船河，不過船長話發現一塊好大嘅sea ice，搵人睇過，上面安全，俾我哋上去玩吓呀，太好啦！

呢塊sea ice 好大，四邊都無掂坐陸地嗰Ｄ冰先算sea ice喎！不過要上呢片sea ice真係唔容易架，當我哋就到時，Sophie叫我哋坐穩，捉實條安全繩，跟住佢就加速...

要大半隻Zodiac摌上塊冰度先可以俾我哋上岸架！

一塊冰竟然可以咁大喎！

勞苦功高嘅工作人員！

玩咗大概一個鐘就要返上船啦！

今次呢個bonus太驚喜啦！

毛爸太受歡迎，個個都鍾意痴住佢坐！

我哋走咗又到第二批啦！

回程見到隻頑皮嘅海豹！

佢一直跟住我哋架Zodiac

玩咗一輪先肯走！

毛爸個樣好似幾滿意今朝個行程喎！



返去啦！

隻Zodiac都返艙休息

我返嚟啦！

因為對boot去玩完返嚟會好濕，所以返入室內前要除咗對boot先，呢個係俾我哋除boot嘅地方！


無食早餐好肚餓，餐廳閂咗，咁叫room service囉！好好味呀！

食飽無事做，出露台睇吓嘢，又見到兩隻海豹喺度曬太陽，真係舒服得佢哋吖！

攸攸閒咁睇吓景，太正啦！

呢塊sea ice都唔細喎！

Lunch hour，不過唔係幾餓，今餐食齋！

下午我哋會去Port Lockroy

英國個南極研究站就係喺呢度，未出發前有英國南極研究站嘅研究人員上嚟同我哋講解吓佢哋喺南極嘅工作同生活，佢哋亦都會喺我哋隻船度沖涼同食飯，因為佢哋平時只係食罐頭同無涼沖架，呢份工都好辛苦吓！

好啦，準備出發啦！

見到研究站啦！

好好彩我哋可以同研究員坐埋同一隻Zodiac~

見到佢哋隻手都凍傷晒！


碎石邊上岸！

見到好多媽咪喺度餵BB

好蠢又好可愛！

成個研究站都係企鵝！

成個南極得呢度可以shopping同寄信～

買咗少少嘢，佢哋嘅收益會用返喺呢個研究站架！

寄咗張post card，成個月先嚟到香港呀！

再參觀吓研究站裡面嘅設施，呢Ｄ係以前Ｄ人同，而家只係俾遊客參觀，Ｄ研究員唔係喺呢度住架！

睇完又出去影過！

周圍麵係企我，行路要好小心，如果唔係驚踩嚫Ｄ小企鵝！

搵完食返嚟！

ＢＢ仲肥過媽咪呀！

呢個媽咪要餵兩隻，真係慘慘呀！

爭食！

搶唔到食就要等下一轉啦！

企鵝媽媽話，下次生一隻好啦！

要返上船啦！拜拜啦！

晚餐！