2013 玻利維亞+南極 - Day 6 Tupiza- Quetena

2013 玻利維亞+南極 Day 6 (11 Feb 2013 Mon)

今日開始喺玻利維亞嘅第一天行程

Tupiza(3,160 m)  ＝＞Quetena (3,900 m)

離開咗Tupiza市中心，我哋要經過條河再向山區進發，好在條河乾咗水，如果唔係，點行呢？

同我哋平時見嘅山好唔同！

見唔見山中有條路呀，我哋就係嗰條路上嚟架～

Ｄ路不至於好危險，不過有對頭車嚟都好驚吓，因為路旁係無圍欄，可以跌落山架！

第一次喺大草原見到駝羊，興奮呀！

駝羊原來好叻架，佢哋自己會搵個地方做廁所，個個都會去嗰度痾，唔會周圍痾，好聰明，我個女我都用咗兩個星期佢先識去自己個廁所呀！



駝羊個樣又傻有可愛，有Ｄ仲俾人用紅繩扎咗兩條辨喺對耳上面，仲傻Ｄ，原來扎紅辨仔係幫佢哋慶祝生日喎

睇完駝羊繼續我哋嘅漫漫長路啦～

呢Ｄ就係駝羊同佢主人住嘅地方，日頭D駝羊會出去食草，晚上會自己返嚟，唔洗人趕，好乖架！

呢個係個養駝羊嘅婆婆～

唔知經過咗幾多個山...

周圍都好大風，最後搵到間無人住嘅屋擋風，可以開餐啦！

今日午餐好簡單，有炒飯，煎蛋同Ｄ蔬果，幾好食，不過我怕有高山症所以唔敢食咁多，食晒呢碟就算啦！

我哋去到邊，總有Ｄ駝羊喺左緊

仲有Guanaco（L.guanicoe)

經過一個叫大城喎，唔記得叫咩名，佢哋無通訊設施架，如果有咩事，要搵咩人，或者有咩事要向大家宣佈就會走去呢間屋，佢屋頂有喇叭，用喇叭廣播通知你想通知嘅人，不過全村人都會聽到囉

呢度仲有教堂架！

跟住再繼續趕路啦，天黑前我哋一定要去到國家公園！

呢段路司機哥哥William要出動防滑手套，咁我哋就知呢段路一定唔易行啦！

沿途見到好多動物，有驢仔啦～

有駝鳥～

經過咗好多條河～

今次我同毛爸真真正正見識到四驅車嘅威力～

行行吓天開始黑，好似想落雨，而我都開始覺得唔舒服，似高山反應，個頭好痛...

係呢個咁嘅天氣同環境下，我哋竟然要經過呢個ghost city，呢度曾經係一個好繁華嘅地方，唔記得咩事就變咗死城（個頭痛到Ｃ，咩都聽唔入耳），好多人喺呢度見過鬼魂出沒，所以唔會有當地人嚟呢度，我哋係咁啱路過...

呢度人就唔敢嚟，不過有小動物唔怕喎，呢隻唔知係咩品種，個樣好cute呀！

嚟到玻利維亞我突破咗我對廁所嘅觀念，平時我喺香港，污漕少少嘅廁所我都唔肯去，情願行遠Ｄ，我唔會返大陸旅行都係怕鬼咗佢Ｄ廁所，但嚟到玻利維亞山區，唔似得Ｄ先進國家，有休息站同廁所俾你去，周圍都係荒山野嶺，人有三急，你自己落車搵啱地方就去啦！


雖然呢度叫鬼城，不過我都揀咗呢度去，貪佢有圍牆吖麻，我有講唔該借借架！

我哋喺度參觀時，William就去整車，辛苦晒！

呢度有海拔4,690米，唔怪之我個頭又痛有暈啦！影完呢張相仲開始落雪添呀，乜Ｄ天氣變得咁快架！

呢Ｄ地衣，每年只會向橫生長1cm，咁呢塊咁大睇怕都都有一千幾百年啦卦...

再行咗無幾耐，竟然上到海拔4,855米，我嚟之前查過Ｄ資料，應該最高只係會去到3,900米，點會去到咁高架，後來我問返個導遊，佢話好多旅行社驚Ｄ遊客怕太高有高山症唔嚟，所以都會寫低Ｄ，唔好嚇怕Ｄ遊客咁喎...

我高山反應，已經落唔到車，派毛爸落去影張到些一遊相！

經歷咗落雨，落雪，而家又出太陽啦！

過埋呢條都幾深水嘅河就到國家公園啦～

坐喺車度睇William揸車都好驚吓架！

國家公園入口


售票處，BOB150=HKD168/人

入咗國家公園無耐就到咗我哋住嘅旅社，呢間係我去旅行住過設施最差嘅地方，但我入到去無討厭嘅感覺，雖然環境差Ｄ，不過感覺還好呀，毛爸話無諗過住呢Ｄ地方我都肯嚟，仲話好在係我plan，如果係佢，一定唔夠膽book呢個tour，話驚我見到呢間嘢會剎Ｃ佢喎！

我高山反應好辛苦先爬到落車，跟住入咗房瞓一陣，William同我哋個local guide Gladys就去煮飯我哋食，佢哋見我咁辛苦，第一時間沖咗Coca茶俾我飲，再整咗個菜湯俾我，等我飲完舒服Ｄ，食飯喺係走廊，我身後面就係我哋間房～

個菜湯好好飲，我成碗飲晒，不過就食唔落其他嘢！

呢ｄ係駝羊肉，聽講好好味，不過我真係食唔落，無試...

今日仲有班老外係度住，有Ｄ小朋友喺度表演，佢哋咁落力表演都係為咗我哋請佢食粒糖！


廁所同埋洗面刷牙嘅地方～



叫做沖涼房，不過無熱水同埋個水龍頭係壞嘅，好在我都已經準備今晚唔沖涼啫！

今晚辛苦晒毛爸，又要照顧行李同相機，又要照顧我，又驚９點後無電，所以樣樣都好趕，佢要煲定熱水俾我夜Ｄ沖茶，又要同四部相機差電，仲要做按摩男同陪我去廁所同洗面，真係忙Ｃ佢吖！